Vafilifi 1 - Kirimi New Testament

¹ Faulo na Timoteo atumami wamwa Kiristo Yesu kunë antu va Muungu në vë uFilifi, itambëëmwe na maaskofu nanë masemasi.

² Mboto kunë nyenye na majëghana ufuma kunë Muungu Tata witu na kunë Müküü Yesu Kiristo.

Irombi ramwa Faulo gwa Asomi vakwe

³ Ngumurumba Muungu wane gusoko anyu muikhondo nëngumughema nyenye,

⁴ na matiku oong'e mu marombi ane oong'e gusoko anyu ngurombaa gwa uyanjo.

⁵ Ngurumba gusoko a ukhuvëi wanyu mung'ë a Sayu Njija ufuma itiku ërëë ra mwandyo faka itungwee.

⁶ Na nëmanyie tutë mwino mweeso wasuu në waandiye mwëmo në uja mukhatë anyu uguukhondeya muitiku rasëë ra mwa Yesu Kiristo.

⁷ Viuyi viuyi mwino urë mwëëmo wane ughema ayaa nëëmughokee nyenye nyong'e. Gusoko nyenye nyoong'e mwë munkhoo ane. Gusoko mung'ë a gëtungo gane na mung'ë a mwëëmo wa umikhuëra Sayu Njija na umihinëntëya, nyenye nyoong'e mwakhuvëe na nee mu mboto ëyëë.

⁸ Muungu në masundanga wane, mwino nene nëna nkümbü nküü gusoko anyu nyoong'e itambëëmwe na uyanjo wamwa Kiristo Yesu.

⁹ Na irombi rane në mwino uyanjo wanyu udahe ugijua na ugijua itambëmwedu na umanyi na mahaa në maküü.

¹⁰ Uvii nyenye mudahe umanya në maja nanguu na mudahe utendeka mwë veeruchwë na ëse mutikweti mahutye faka itiku rasëë ra mwa Kiristo,

¹¹ Nyenye mwijuywe itambëmwedu na nkhari ya tutë nëifumie ukëërëa kunë Yesu Kiristo, gwa üküüna ikuryo ra Muungu.

Uduva në Kiristo

¹² Nene nësëghëëte nyenye aruuna vane, mumanye, mwino chu mantu oong'e nëandwëre nene antoe usonge ino umetanantya sayu asëë njija,

¹³ vii adahie umanyëka gwa atughwa voong'e va ikulu na kunë antu vangëja voong'e, mwino getungo gane në gusoko amwa Kiristo.

¹⁴ Na ahuvëi vaingë vëgatendeka akhamug'i kunë Müküü gusoko a gëtungo gane na vëgafwaghëëra na udaho wa utanantya ukhani wa Muungu vatikweti vova.

¹⁵ Vangëja tutë vëumutanantya Kiristo gusoko a wiru na ghusia, ëgweeso vangëja gwa nkhoo në njija.

¹⁶ Vangëja vëutanantya vii gwa uyanjo kunu vamanyie naikëwë hafai gusoko a umikhuëra sayu në njija.

¹⁷ Vangëja vëumutanantya Kiristo gwa ghusëa, ti gwa uja ëgweeso, veeso vëughema mwino vadahëte uongeya ino makhasëko kunë nene mungë a gëtungo gane.

¹⁸ Ti gëntu! Gwa njëa yoong'e, mbesa gwa uregheeghe mba gwa tutë, Kiristo ugutanantiwa. Na gwa uvii nene nëyanjëte.

¹⁹ Nhaa, na nene ninjë uyanja. Gusoko nene nëmanyie mwino ukëërëa marombi anyu na warëëyi wa Nkhoo amwa Yesu Kiristo ëyëë injë ufëuka gusoko a utyoi wane.

²⁰ Mwino naa nkümbüane urarava usonge na ighonje rane mwino ntiuira menyaa kamwe. Ëgweeso itambëëmwe na ukhamu woong'e mwino matiku oong'e na itungwe viuyi viuyi Kiristo ugukuriwa mu mwëërë wane, nambesa gwa ufanga wane mba ikuya rane.

²¹ Gusoko kunë nene uduva në Kiristo na ukuya në sao.

²² Nëmbesa në fwaghëëre uduva mu mwërë asëë në nkhari ya mwëmo kunë nene. Kë rafei nëngurëhwania tirëmanyie.

²³ Nene nëfanyankëywe mukhatëkhatë a njëa ëvëë. Nkümbü yanë në uhegha uenda ugikhaa itambëëmwe na Kiristo, gusoko uvii guuja ino.

²⁴ Ëgweeso gusoko anyu nëguuja ino nene nësaghe nëduvie.

²⁵ Nëhuvëe ërëë, nene nëmanyie mwino chu nëjie usagha na ufwaghëëra ugikhaa itambëëmwe ginanyu nyoong'e, faka nyenye mufwaghëëre na uyanjo mung'ë a uhuvëi,

²⁶ uvii mukhatë anë nyenye mudaha uhanga soko a gikurya mukhatë amwa Kiristo, gusoko a ija rane kunë nyenye kangë.

²⁷ Ëgweeso gutufu nyenenda anyu uduvi ëtendeke ikhwete na Sayu Njija amwa Kiristo, uvii nëmbesa nëëje na umwona nyenye nampa nëëdëe uja, nene nëdahëte umutegheeya nyenye mwino mwëmëkëe mwakhamugi mu nkhoo ëmwedu, na ihaa rëmwedu nyenye mugihoma itambëmwedu gusoko a uhuvëi wa sayu në njija.

²⁸ Na mutaje uvaoghofa arughu vanyu mung'ë a intu mba rëmwe. Ëyëë në ndolyo nëëdaaji kunë veeso a uyaghao wao, ëgweeso kunë nyenye në utyoi në nëufumie kunë Muungu.

²⁹ Gusoko nyenye mwafiwe gusoko amwa Kiristo, tiese gutufu umuhuvëa mweeso, ëgweeso noo ukhasëka gusoko akwe,

³⁰ Në mbesa mwina wihomi ururo ururo nëmwawune kunë nene, na utegheeya mwino nene nëakweti faka itungwee.