Vaeburania 1 - Kirimi New Testament

Muungu ugurighëtya gwa njëa a Mwanakwe

¹ Afoo khae Muungu agarighëtya na vaa kükü vitu mëhënjo mingi na gwa njëa nyingi gwa ukëëra anyagëdaghu,

² ëgweeso matiku ayaa a mpeo, warighitëye nasee gwa njëa a Mwanakwe. Mweeso unë chuu gwa njëa akwe Muungu agautunda urëmi na agamuhwania ayibale mantu oong'e.

³ Mweeso unë weru wa üküü wa Muungu, na nyinkhori në a tütë tütë a mwino Muungu mughonjo, uguusinkamya urëmi gwa ukhani wakwe në wina nguu. Nënaa wawafa anaarëmi irekewa ra mahutye awe, agëkhaa kuuko gunto girunde guu uvaru wa gëlëlo wa Muungu Müküü.

Üküü wa Mwana wa Muungu

⁴ Mwana unë müküü nanguu ukëra malaëka, mwino rina nëwafewe na Muungu unë iküü nanguu ukëra rina rawe.

⁵ Gusoko Muungu inamukhanëa mbanduvë mba umwe waa malaëka vakwe: “Veve wëë Mwananë, Nene rëo natendaa Tata wako.” Mbesa kangë: “Ngutenda kunë mweeso tata na mweeso ugutenda kunë nëë mwananë.”

⁶ Na kangë nënaa ugumütüma Mwanakwe mufafwa wa mwandyo, muurëmi, agahanya, “Malaëka voong'e va Muungu ivanoneye ümükürya.”

⁷ Gwa malaëka uguhanya, “Muungu uguvatenda malaëka vakwe vëtendeke mpefo, na atumami vakwe ndëmë ya moto.”

⁸ Ëgweeso gwa Mwanakwe, Muungu agahanya: “Utemi wako vee Muungu, ugutendeka wa khae na khae. Veve uguvibala antu vako gwa fana tütë.

⁹ Veve uyanjëte uduvi në uja na uhuite üvë. Gwa uvii Muungu, Muungu wako, waguhwaania na ugumiminëa uyanjo üküü nanguu ükëra ayako.”

¹⁰ Na agahanya: “Müküü, veve ugautunda urëmi afo mwandyo, maunde unë mwëmo wa mëkhono ako.

¹¹ Asaa ëguwura, ëgweeso veve ugusigha matiku oong'e, oong'e ëgukhakhayuka mwino ikoti,

¹² mweesonoo ëgukhaanëkëëywa mwino isaa. Ëgweeso veve unë wëë uyuuyo uyuuyo matiku oong'e, na uduvi wako utina mpëo.”

¹³ Muungu inamukhanëaa mbanduvë mbesa umwe wa malaëka vakwe: “Ikhaa guuvaru wanë wagëlëlo, faka nëatende arughu vako mwino ibao ra uhaghamëëya mëghuu ako.”

¹⁴ Malaëka unë nkhoo gutufu nëvëumutumamëa Muungu, na Muungu uguvatumaa vëvaarëëye avoo nëvëuwughenyifa ukhomoi.