Ukunukuo 1 - Kirimi New Testament

¹ Ëyëë ünë sayu ya mantu nëadahie ukunukuwa na Yesu Kiristo. Muungu agamufa Kiristo ukunukuo uruu avaraghëëre atumami vakwe mantu nëënoneye udwëëra fifëyii. Kiristo agamutuma malaëka wakwe amumanyisye Yohana mutumami wakwe, mantu ayoo,

² mweeso Yohana wayarighitëye oong'e nëwayagune. Na ëyëë unë sayu akwe uhonga ukhani wa Muungu na tutë nëakunukuwe na Yesu Kiristo.

³ Bahu akwe muntu nëugugësoma gëtabu ëkëë; bahu awe vasaa nëvëtëghëëye nkhani ya ukhani uruu wa udaghui na ukwatëëra nëëandikiwe mukhatë ayo, gusoko itungo rahumbeera në mantu ayaa injëe udwëëra.

Iramucho gwa makanisa ëmufungatë

⁴ Nene Yohana nguyandëkëa makanisa nëëmukoa në wa Asia. Mboto në majëghana ufuma kunë mweeso nëurëfo, nënaarëfo nanë ujie; nanë ufuma gwa nkhoo ëmufangatë nëyiusonge a itumbë rakwe ra utëmi,

⁵ nanë ufuma kunë Yesu Kiristo, musudangei në muhuvëi, wa mwandyo ufëtëwa ufuma gwakuyi, na unë mwibali wa atëmi va muurëmi. Mweeso uguyanjete, na gwa saghami akwe wagutarugwëëre ufuma muvitungo vya mahutye itü,

⁶ agagutënda sese gwë utëmi wa akumbëki, gumutumamëe Muungu, Tata wakwe. Kunë Yesu Kiristo ëtëndeke weru nanë nguu, khae na khae! Amina.

⁷ Raraava! Ujie mung'ë a marunde! Mu muntu ujie umwona, mbesa në vasaa nëvamuhomie. Ndughu yoong'e muurëmi ijie uhongeeya gusoko akwe. Nhaa! Amina.

⁸ “Nene në Alfa na Omega,” uguhanya Müküü Muungu Munya Udaho, nëurëfo, nënaaurëfo nanë ujie.

Ndoti ya Mwaamuntu

⁹ Nene në Yohana, muuna anyu; na gwa ukhuvëa na Kiristo ngukhuvëa itambëëmwe na nyee mu ughëmiëyi wa makhaseko nëuguvahanga vasaa nëvëë muwibali wakwe. Nene nëgavëkwa Ufatimo, ng'e në emukhatë a irambo gusoko a utanantya ukhani wa Muungu na tutë amwa Yesu.

¹⁰ Uvii, itungo rëmwe, itiku ra Müküü, nëgahangwa na Mwahu, nëgatëgheeya unyuma ane ruri üküü mwino ruri wa ifembe.

¹¹ Gwesonoo ugahanya, “Andëka mugëtabu oong'e nëuguyaona, uyatewe u makanisa ayaa në ëmufungatë: Efeso, Smurna, Pergamoni, Thuatira, Sarde, Filadelfia nanë Laodikea.”

¹² Uvii, nëgëkeengeya nëmwone wasuu nënaugurëghitya nanee, nëgaona chengo vya vimwëë vimufungatë vya sahabu,

¹³ na mukhatëkhatë ayo nagwina gëntu mwino muntu, mweeso naa urie nkhaanju ndifu na mukhova wa sahabu ugëkuva.

¹⁴ Ntuka yakwe naa njeru mwino wesa në uja, mwino seluji, miho akwe ëgumisamisa mwino moto;

¹⁵ mëghuu akwe ëeriye mwino saba nëoyiwe mwi tanuru ra moto na uhutwa, na ruri wakwe na wë mwino ruri wa majë nëëgutununta ufuma gunto.

¹⁶ Mu mukhono wakwe wa gëlëlo naa wina njota ëmufungatë, na umomo wakwe rëgadua itëmeo nënaa ryëghe mbaru yoong'e. Usyu wakwe naaweriye mwino yuva.

¹⁷ Uvii, nënaa namwona gutufu nëgagwa usonge a mëghuu akwe mwino muntu në ukure. Ëgweeso mweeso agavëka mukhono wakwe wa gëlëlo gunto ane, agahanya, “Utaoghofee.” Nene në Alfa na Omega, Mwandyo nanë Mpeo.

¹⁸ Nene në mweeso në nëmufanga! Naa arë nakure, ë gweeso, raraava, itungwee nëmufanga khae na khae. Nena udaho mu ikuya nanë gwaarungu.

¹⁹ Uvii, itungwee andëka mantu ayaa nëuguyihenga, mantu nëëgudwëëra itungwee na ayoo në ëjie udwëëra usonge.

²⁰ Gëmpihe ga njota ëyoo në ëmufungatë nënaa wayigune u mukhono wane wa gëlëlo, nane gëmpihe ga chengo ëyoo ya vëmwëë në vimufungatë vya sahabu në chiiye; njota ëyoo në ëmufungatë në Vamalaika va makanisa mufungatë; na chengo ëyoo në ëmufungatë ya vimwëë në makanisa mufungatë.