Mariko 1 - Kirimi New Testament

Yohana Mubadisi ugutanantya Ukhani

¹ Mwandyo wa Sayu Njija amwa Yesu Kiristo, Mwana wa Muungu. Ëgandya

² mwino naa ëgandikwa mu gëtabu gamwa munyagëdaghu Isaya: “Raraava, natuma ntumwa anë agutongeere, mweeso ugumëghondanëya njia ako.

³ Ruri wa muntu wategheyekaa mumbugha: ‘Mughondanëyi Müküü njia akwe, vighoori vikëro vyakwë.’”

⁴ Yohana Mubadisi naagadwëra mumbugha, agatanantya mwino mu muntu afëe mahutye na ubadiswa Muungu avafe irekea ra mahutye.

⁵ Antu voong'e ufuma ng'andi yoong'e ya Uyudea na venyeji voong'e va uYerusalemu vëgamwendea, vëufëa mahutye awe, mweeso noo agavabadisa muyongo ra Yorodani.

⁶ Yohana naa urie isaa nënaa rëtumiwe gwa makinga a ngamëa na mukhova mugëno gakwe. Ilëwa rakwe naa nkumbë na wukë wa mwihaka.

⁷ Mweeso agatanantya uguhanya, “Muntu umwe në una udaho ukëra nene waja unyuma anë, nene ntinoneye ginama na udondoa mëkhova a maantu akwe.

⁸ Nene ngumubadisa gwa majë ëgweeso mweeso ujie umubadisa gwa Mwahu Mweru.”

Ubadiswa nanë ughemwa kunë Yesu

⁹ Matiku asaa, Yesu naagaja ufuma Unasareti, muji wa Ugalilaya, agabadiswa na Yohana muyongo ra Yorodani.

¹⁰ Gënyafaafo nënaa wafuma mumajë, agona irunde ratemanuka, na Mwahu agamutununtëa mwino nkurwi.

¹¹ Ruri ugategheyeeka ufuma girunde: “Veve wi Mwananë muyanjwi wanë, nayanjisiwaa na vee,”

¹² Gënyafaafo agatongeerwa na Mwahu gwenda umbugha,

¹³ agëkhaa kuuko matiku makumi ane ugughemwa na Setani. Naa wëë kuuko itambëëmwe na maimwana a mwihaka, vamalaëka noo naavëumwitumamëa.

Yesu Uguvataana auta somba vane

¹⁴ Yohana nënaawatungwa ugeresa Yesu agemda Ugalilaya agatanantya Sayu Njija a Muungu, uguhanya,

¹⁵ “Itungo rafikaa, na Utemi wa Muungu wahumberaa. Fei na umëhuvëa Sayu Njija!”

¹⁶ Nënaa ukëëre gitumbë ra irambo ra Ugalilaya, agavaona vauta somba vavëë: Simoni ina Anderea mwunaakwe, vëguuta somba na ikwantya somba.

¹⁷ Yesu agavakhanëa, “ng'ongi nëë nëënoo ngumutenda nyee auta va antu.”

¹⁸ Gënyafaafo vëgayareka makwatya somba awe, vëgamuhonga.

¹⁹ Agafwaghëëra usonge nduvëngë, agavaona Yakobo ina Yohana, vana vamwa Sebedayo. Veeso noo naa vëë mumasua vëuyaning'anëëya makwatya somba awe.

²⁰ Yesu agavataana gënyafaafo, veeso noo vëgamureka tata wawe Sebadayo mumasua itambëëmwe na atumami, vëgamuhonga.

Muntu nëuna gënyonyinyonyi nëgëbë

²¹ Vëgafika umuji wa Ukafarenaumu, na gënyafaafo nënaa afika Sabato, Yesu agëngia munyumba adini a Gëyahudi, agandya usëya.

²² Antu voong'e nëvëgamutegheeya vëgataka ino masëyo akwe, gusoko naatiusëya mwino asëyi vawe va seria ëgweeso mwino muntu nëuna nguu ya wibali.

²³ Gënyafaafo agandwëra mukhatë a sunagogi muntu umwe nëuna gënyonyinyonyi gëbë,

²⁴ aganga, “wina ntuni nasee, veve Yesu wa Unasareti? Wurë, wajie ugumeeyana? Nëmanyie mwino veve wë anyu: veve wë Mweru wa Muungu!”

²⁵ Yesu agamukenea, “Kira mudue muntu uyu.”

²⁶ Yakhonda, gënyonyinyonyi gësëë nëgëbë gëgamuhingisya muntu wasuu, agakuta gwa ruri aküü, agamudua.

²⁷ Antu voong'e vegataka, vëgiurya, “Ayaa mantu këë? Wurë, u masëyo në mafyana? Muntu uyuu unaudaho wa uyëkhanëa vinyonyinyonyi në vibë, vyeeso noo vëuhonga mwino uguhanya!”

²⁸ Maküra amwaYesu ëgakundanëa gënyafaafo goong'e mu wilaya a Ugalilaya.

Yesu uguvaforya antu vingë

²⁹ Vëgadua musunagogi, vëgenda vëgookie faka ukhaya amwa Simoni ina Anderea, Yakobo ina Yohana vëgenda itambëëmwe inaawe.

³⁰ Nyinya në mukhwe wamwa Simoni naa wë guurëë, naa urue ino ugukaghata. Vëgamukhanëa Yesu mugënyafaafo nënaa wafika.

³¹ Yesu agamuhumbeera mama wasuu, agamukwata mukhono, agamuvucha. Urue wasuu ugamurekea, agandya uvitumëa.

³² Mpëndë, nënaa gwira yuva rahaarëa, vëgamwetea Yesu arue voong'e na antu nënaa vina vinyonyinyonyi nëvibë.

³³ Antu voong'e va umuji wasuu vëgihwaangiya umufita.

³⁴ Yesu mweeso noo agavaforya antu vingë nënaa vina marue hiya hiya, agajuncha vinyonyinyonyi vingë, ëgweeso ainavirekaa vinyonyinyonyi virighëtye intu gusoko naa vimumanyie mweeso u anyu.

Yesu ugutanantya Ugalilaya

³⁵ Fadiu ayo, diu në nküü, Yesu agadua, agenda fana naagutie antu agaromba kuuko.

³⁶ Simoni na ayakwe vëgenda umufenja.

³⁷ Nënaa vamwona vëgamwëra, “Antu voong'e vëugufenja.”

³⁸ Yesu agavakhanëa, “Kwendi u miji ingija nëëfifë nende utanantya kuuko noo, gusoko najie gusoko a ësëë.”

³⁹ Uvii, agenda mu itumbë ra Ugalilaya ugutanantya mu masunagogi awe na ujuncha vinyonyinyonyi.

Yesu ugumuforya muntu nëuna matana

⁴⁰ Muntu umwe munya matana agamwendea Yesu, agatungama, agamuromba, “Nëwayanja, udahite unjerya!”

⁴¹ Yesu agamwonea uvavi, agaghoora mukhono wakwe, agamutenia na umwëëra, “Nayanjaa, fora!”

⁴² Gënyafaafo matana ëgamureka muntu wasuu, agafora.

⁴³ Yesu agamukhanëa ende kunu winjë gënyafaafo na umwëra gwa umukhanya,

⁴⁴ “Tanjaa ukhanie muntu intu ërë, ëgweeso enda widuëye kunë mukumbëki, uduye ikumbëko sadaka gusoko ooforiwa kunë vee mwino Musa naawahanyiye imanyike kunë veeso mwino waforaa.”

⁴⁵ Ëgweeso muntu usuu agenda, agandya utanantya sayu ësëë, na gitambwëya ng'andë yoong'e anë Yesu atadahee kangë gingëa mu muji mbarumwe daaji, agëkhaa gunji, fana naa gutie antu. Antu vëgamwendea udua ng'andë yoong'e.