Luka 1 - Kirimi New Testament

¹ Gusoko antu vaingë vadahie uandëka sayu ya mantu maingë nëatendekie mukhatë itu,

² mwino veeso vadahie udwëëya kunë sese gwa avoo unë ufuma mwandyo naa arë vamasudanga na atumami va ukhani.

³ Nene noo negaona vija, nënaa arë nawënkëya mantu oong'e gwa vija nanguu, nëgaramwua ugwandëkëa gwa mufango müküü Teofilo.

⁴ Uvii veve udahe umanya tutë nëëeghokee mantu unë veve wadahie ukhanëwaa.

Ufafo wamwa Yohana Mubadisi Ugutanantiwa

⁵ Ikhondo ramwa Herode, mutëmi wa Uyahudi, arë urëfo mukumbëki rina rakwe Sakaria, wa idae ramwa Abiya. Mukhema wakwe arë uguëtanwa Elisabeti umwe wa ancha va ugënyamwango gamwa Aroni.

⁶ Na voong'e vavëë arë anya tutë usonge a Muungu, na naa vakwatëëre maraghëëyo oong'e a Müküü na naa vëtina ihondo.

⁷ Ëgweeso veeso arë vatikweti mwana, gusoko Elisabeti arë mughumba, na voong'e vavëë arë vakhombifie ino.

⁸ Nënaa mweeso ugituma mwino mukumbëki usonge a Muungu, na idae rakwe ra utumami rëgafika.

⁹ Gwa uhonga na ntende a akumbëki, mweeso agahwaniwa gwa ukhwërwa kura uingëa u hekalu ra Müküü na utunchëya musalaka.

¹⁰ Na iburi rikuu ra antu arë vihangwëëye unjë vëuromba, ikhondo rasëë ra utunkëya musalaka.

¹¹ Na hafo malaika wa Müküü agamudwëëra mweeso agaëmëka gu uvaru wa gëlëlo wa masabahu a utunkëya musalaka.

¹² Sakaria narë wamwona mweeso agataka na agaoghofa.

¹³ Ë gweeso malaika agamukhanëa, “Utaoghofe, Sakaria, gusoko Muungu wateghëëye marombi ako. Na mukhema wako ugugufafëya veve mwana wa gëghosya, na rina rakwe ugumwëtana Yohana.

¹⁴ ‘Na veve uguyanja na ubankaara, na antu vaingë vëgiririsya gusoko a ufafwa kunë mweeso.

¹⁵ Ugutendeka müküü usonge a Müküü, na atëunywa divai na mbesa gëntu në gëlulu Na ugijuywa Mwahu Mweru mbesa ufuma unda amwa nyinya.

¹⁶ Na mweeso uguvasucha antu vainge vana va Isiraeli kunë Müküü Muungu wawe.

¹⁷ Na mweeso winjë usonge a Müküü mung'ë a nkhoo na gwa nguu yamwa Elia. Uguvakhuvëya va tata nanë vana vao itambëëmwe kangë. Na uguvatenda avoo në vatikweti utegheeyi vëhange ihaa ra tutë. Na uvaghondanëya antu gusoko a Müküü.’”

¹⁸ Na Sakaria agamuwëëya malaika agahanya, “Nene ngumanya wurë intu ërëë? Gusoko nene në munyampaa, mukhema wane noo mukheikuu.”

¹⁹ Malaika agamusucha, “Nene në Gabrieli, unë ngwëmëka usonge a Muungu Na Muungu wantumie nene urighëëtya na veve, na uguretea sayu ëyëë në njija.

²⁰ Na rarava, veve ugutendeka wë gëmumu na utëudaha urighëëtya faka kunë mantu ayaa ëjie udwëëra. Gusoko veve winahuvëa nkhani yane, unë ijie ukhondekeka gwa itungo rayo.”

²¹ Na antu narë vëmurindëe Sakaria, veeso vëgataka gusoko a utinya mung'ë a hekalu.

²² Na itungo narë wafuma unji, mweeso naa atiudaha urighëëtya na veeso, na veeso vëgamanya mwino waonaa gëntu mung'ë a hekalu Na mweeso agarighëëtya inao gwa ndolyo gusoko naa waja gëmumu.

²³ Nënaa itungo rakwe ra utumami rahira, mweeso agasuka ukhakwe.

²⁴ Nënaa matiku asaa akëa, Elisabeti mukhema akwe agaucha urito. Agagifiha unyumba mëërë etano, uguhanya,

²⁵ “Uvii Müküü wantendee nene mung'ëë a matiku itungo në mweeso wendie undarava nene, na ung'ëgheya mënyaa usonge antu.”

Ifafwa ramwa Yesu Ratanantywa

²⁶ Mweri wa mutandatu malaika Gabrieli agatumwa na Muungu ende u muji nëuguëtanwa Nasareti në uGalilaya,

²⁷ kunë muncha nënaa uturëywe ikhomwa na muntu rina rakwe Yosefu, wa ugënyamwango gamwa Daudi. Na rina ra muncha wasuu naa Maria.

²⁸ Na malaika agaja kunë mweeso agamwëëra, “Veve, unë Muungu wa gufaa mboto, Müküü wë itambëëmwe na vee.”

²⁹ Ëgweeso Maria narë wategheeya nkhani ëyëë ihaa rakwe rëgahangënkhana. Na agaghema nkhani iyii ryana rayo në ntuni?

³⁰ Na malaika agamukhanëa, “Utaoghofe, Maria gusoko Muungu wagufaa mboto

³¹ Na kengea, veve uguucha wito mung'ëë a nda ako na ugufafa mwana wa geghosya na ugumwëtana rina rakwe Yesu.

³² Mweeso ugutendeka mukuu, na ugwëtanwa Mwana amwa uyoo wë gunto a oong'e. Na Müküü Muungu ugumufa mweeso itumbë ra utëmi ramwa tata wakwe Daudi.

³³ Na mweeso ujie utema u gënyamwango gamwa Yakobo khae na khae. Na utemi wakwe ugutendeka utikweti mpeo.”

³⁴ Na Maria agamukhanëa malaika, “Ërëë rëutendeka urë, gusoko nene ntiroghowe?”

³⁵ Na malaika agamusucha mweeso agahanya, “Mwahu Mweru ugugusimëa gunto ako, na udaho wa Muungu në wë gunto a oong'e ugugukunëkëa veve. Uvii mwana në ugufafwa ujie uëtaanwa mweru, Mwana wa Muungu.

³⁶ Na rarava, munyandughu wako Elisabeti mung'ë a ukheikuu wakwe wadahie guucha urito wa mwana wa gëghosya. Na uruu në mweri wa mutandatu kunë mweeso unë naa antu vëumwëtaana mughumba.

³⁷ Gusoko gutie nërëtiudahëka kunë Muungu.”

³⁸ Na Maria agahanya, “Rarava, nene në mutumwa wa Müküü; nërëtendeke kunë nene uhonga na ukhani wako.” Na malaika agatunguya agamureka mweeso.

Maria Wenda Umusoya Elisabeti

³⁹ Mung'ë a matiku asaa, Maria agatunga muhënjo urë agaenda ung'e a gëtanto, u muji umwe wa Uyahudi.

⁴⁰ Na mweeso agahefea unyumba amwa Sakaria na agamuramucha Elisabeti.

⁴¹ Na itungo narë Elisabeti wategheeya iramucheyo ramwa Mariamu, gana ganyui gëgariima mung'ë unda amwa Elisabeti. Na Elisabeti agagëjuywa Mwahu Mweru,

⁴² na mweeso agarighëëtya gwa ruri aküü, “Muungu waguforiye veve mukhatë a akhema na Muungu noo ugumuforya mwana nëujie umufafa.

⁴³ Na gusoko kë në Muungu wantendea nene vii ërëë radwëëra kunë nene, nyinya wa Müküü wane aje kunë nene?

⁴⁴ Gusoko rarava, itungo nënaa nategheeya ruri wako wa iramucho, gana ganyui agahweta unda anë gwa uyanjo.

⁴⁵ Bahu akwe mweeso nëuguhuvëa gusoko asaa në Muungu waaraghanie ijie udwëëra, mwino malaika warighëtëye gwa rina ra Müküü.”

Wëmbo wamwa Maria wa Ikuryo

⁴⁶ Na Maria agahanya, “Nkhoo ane ëgumukurya Müküü,

⁴⁷ na nkhoo ane ayanjaa mung'ëë a Muungu Mutyoi wane.

⁴⁸ Gusoko wendie umwihenga mutughwa wakwe në wënyumpiye. Gusoko rarava, ufafo woong'e vëjie untaana muforiwa.

⁴⁹ Gusoko mweeso unë munyanguu watendie mantu në makuu gusoko ane, na rina rakwe në ryëru.

⁵⁰ Na gëhe gakwe gë kunë vasaa unë vëmutegheeye mweeso, ufuma ufafo faka ufafo.

⁵¹ Mweeso wendie uraghëëra nguu itambëëmwe na mukhono wakwe, mweeso wavafaghatëye anya gëdida mung'ëë a masëgho a nkhoo yawe.

⁵² Mweeso waatununtiye anya nguu ufuma u matumbë awe a utemi, agavahumbua anyaginyumpya.

⁵³ Mweeso agavijuya anya njaa gwa mantu në maja, na aghwarë agavareka vende mëkhono mëtufu.

⁵⁴ Mweeso agamwarëya mutumwa wakwe Isiraeli, ukumbukwa gëhe gakwe,

⁵⁵ mwino mweeso warighëtëye kunë va tata vitu, kunë Iburahimu nanë kunë ufafo wakwe khae na khae.”

⁵⁶ Na Maria agagikhaa itambëëmwe na Elisabeti gëntu mwino mëeri ëtatu na mweeso agasuka ukhaakwe.

Ifafo Ramwa Yohana Mubadisi

⁵⁷ Ikhondo ra ugitungua kunë Elisabeti rëgafika, na mweeso agagitungua mwana wa gëghosya.

⁵⁸ Na anyafife vakwe nanë anyandughu vakwe vëgategheeya mwino Müküü wamutendee mweeso gëhe gëkuu, na veeso vëgayanja itambëëmwe na mweeso.

⁵⁹ Na itiku ra munana veeso vëgaja umutoa mwana ihungu, na veeso vëgafenja umwëtana Zakaria, rina ramwa ihe.

⁶⁰ Ëgweeso nyinya wakwe agahanya, “Ëtiuyi; mweeso winjë utaamwa Yohana.”

⁶¹ Na veeso vëgamukhanëa, “Anju gutie muntu mpa umwedu mu anyandughu vako në wina rina ërëë.”

⁶² Na veeso vëgatenda ndolyo kunë ihe, vëumuwëëya mwino mweeso ugufenja mwana atanwe nyanyu.

⁶³ Na mweeso agaromba gëbao gagwandëkëa, na agaandëka, “Rina rakwe në Yohana.” Na voong'e vëgataka.

⁶⁴ Na gënyahafo momo nanë urimi wakwe vëgatarughwërwa, na agarighëëtya ugumukurya Muungu.

⁶⁵ Na wova ugavahanga anyafifë vakwe. Na sayu yasii yoong'e igarigheetiwa ung'ë oong'e a uvitanto vya Uyuda.

⁶⁶ Na voong'e narë vategheeya mantu ayaa vëgagiwëëya munkhoo yawe vëuhanya, “Mwana uyi ujieutenda wë urë?” Gusoko mukhono wa Müküü naa wë gunto akwe.

Uraghui wamwa Sakaria

⁶⁷ Na Sakaria tata wakwe agijuywa Mwahu Mweru agatanantya uguhanya,

⁶⁸ “Aforiwe Müküü Muungu wa Isiraeli, gusoko wajie uvaarëya na uvakhomwoa antu vakwe.

⁶⁹ Waguhumbwëyë ufembe wa utyoi witu mung'ëë a nyumba a mutumami wakwe Daudi,

⁷⁰ mwino warighëëtëye gwa mëomo a anyagëdaghu vakwe në veeru ufuma khae,

⁷¹ mwino gudahe utyowa ufuma gwa arughu vitu, na ufuma u mukhono wa voong'e unë vëguhwete sese.

⁷² Utenda gëhe mwino wendie uvëka iraghano gwa va tata vitu na ukumbukwa iraghano rakwe në ryeru.

⁷³ Irafiyo unë mweeso warafie kunë tata witu Iburahimu,

⁷⁴ ugufa sese, uvii sese, gwa ukhomwowa ufuma u mukhono wa arughu vitu, gudahe umutumamëa ësë gutina wova.

⁷⁵ Mung'e a weru nanë tutë usonge akwe matiku oong'e a uduvi witu.

⁷⁶ Na veve, mwana, ugutanwa munyagëdaghu wamwa wasau në wegunto a mantu oong'e; gusoko veve winjë ugumutongeera Müküü gwa unëng'anëya njia yakwe.

⁷⁷ Uvafa umanyi wa utyoi gwa antu vakwe mung'ëë a irekewa ra mahuye awe.

⁷⁸ Ukëërëa gëhe ga Muungu witu itungo ra itiku në rejie kunë sese ufuma gunto.

⁷⁹ Uvafa weru vasaa unë vikhee u kitë na mung'ëë a muurë wa ikuya, utongeera mëghuu itu mung'ëë a njëa a majëghana.”

⁸⁰ Na mwana agakura na agatendeka wina nguu munkhoo, na naa wë gëhaka faka itiku rasëë në mweeso wajie udwëëra gwa Isiraeli.