Arumi 1 - Kirimi New Testament

¹ Faulo, mutumwa wa Yesu Kiristo, waëtaniwe atendeke mutumami, nëwahwaniywe gusoko a Sayu Njija a Muungu.

² Muungu mweeso waraghanie ufuma khae ukëërëa anyagëdaghu vakwe mu maandëko në meru.

³ Sayu Njija nëëmughokee Mwanakwe, unë arë ufafo ufuma kunë Daudi gwa uhanga na mwëërë.

⁴ Mweeso agahwaniwa Mwana wa Muungu mung'ë a udaho gwa uhonga na Mwahu wa weru gwa ufetyo wakwe ufuma gwa kuyi, Yesu Kiristo Müküü witu.

⁵ Gwa ukëërëa kunë mweeso sese gwaghenyifie mboto nanë utumumami gwa gweeta ikuryo ra uhuvëi ra uhuvëi gusoko a rina rakwe mukhatë a ndughu yoong'e.

⁶ Gwa ukhuvëywa aghonjo unë mwaëtaniwa mutendeke antu vamwa Yesu Kiristo.

⁷ Uvii, ngumwandëkëa nyenye nyoong'e në mwëkuuko uRumi, ayanjwi va Muungu, nëmwataaniwe mutende antu vakwe: Mboto nanë majëghana ufuma kunë Muungu Tata witu nanë Müküü Yesu Kiristo ëtendeke kunë nyenye.

Irumbi kunë Muungu

⁸ Mwandyo wa oong'e, ngumurumba Muungu wanë gwa njëa amwa Yesu Kiristo gusoko anyu nyoong'e, gusoko uhuvëi wanyu utegheeyeekie urëmi woong'e.

⁹ Gusoko Muungu në masudanga wane, unë nene ngumwitumëkëa itambëëmwe munkhoo ane mung'ë a Sayu Njija a Mwanakwe, uvii nene faka ntinarekaa umutaana nyenye mung'ë a marombi ane.

¹⁰ Nene nguromba mwino gwa mafenji a Muungu nene itungwee mwitungo ra umpeo nëdahe uja kunë nyenye.

¹¹ Gusoko nëhuunukiwe ino umwona gwa mafenji a Muungu nëdahe umufa gëfewa ga munkhoo ga umukhomia,

¹² gwa uvii, guje gëkhomia, gwa uhuvëi wa muu muntu, uhuvëi wanyu unkhomie nene, nanë wanë umukhomie nyee.

¹³ Aunaanë, ngufenja mumanye mwino mëhënjo mingë nafenjie uja umusoya (ëgweeso faka itungwee nagëëywe), gusoko a uhanga ntënange mukhatë anyu na mukhatë a antu va Ndughu ingëja.

¹⁴ Nene nëonyenywe kunë Ayunani nanë kunë asenji, na kunë anya mahaa nanë kunë afutu.

¹⁵ Uvii nëna nkumbu utanantya Sayu Njija kunë nyeenoo në mwë uRumi.

Nguu ya Sayu Njija

¹⁶ Gusoko ësëë nene ntina mënyaa gwa Sayu Njija: unë nguu ya Muungu gwa utyoi gwa muu muntu nëwina uhuvëi, gwa Muyahudi tanju kangënoo gwa Muyunani.

¹⁷ Gusoko mukhatë ayo weru nanë tutë a Muungu wakunukuwe gwa njëa a uhuvëi gwa uhuvëi, mwino yiandëkiwe, “Wasuu në gwa njëa a uhuvëi unë mweru na wë mututë wasuu uguduva.”

Ihutye ra Mwaamuntu

¹⁸ Gusoko ikuwo ra Muungu rakunukuwe ufuma girunde hiya na voong'e nëvëtiumukuryaa Muungu nanë uvaya wa antu unë gwa uvoya wawe vëumëkunëkëa tutë.

¹⁹ Gusoko oong'e nëëgudaha umanyëka nëëmughookee Muungu ëë daaji kunë veeso, gusoko Muungu wayakunukue.

²⁰ Udua fana Muungu watundie urëmi udaho wakwe wa khae na khae nëutigoonekaa, uu nguu na urungu wakwe wa khae oong'e, wamanyëkie daaji gwa mantu në atundiwe. Gwa uvii, vëtina njëa mbanduvë a ginegha.

²¹ Gusoko, nënaavamumanya Muungu vëgadëa umukurya mwino mweeso unë Muungu mbesa umurumba, ëgweeso vëgayaghaa mu mëbëëduko awe në ti atutë, na nkhoo yawe niina ufutu ëgatendeka kiti.

²² Vëgitendaa mwino vina ihaa ngwë afuu.

²³ Na veeso vëukhanëkëya üküü wa Muungu nëatiukuyaa gusoko a sanamu nëyikhwete na muntu nëugukuyaa mba nyonyi mba maimwana mba maimwana ayo në ina saghami ndyoku.

²⁴ Gwa uvii Muungu agavareka munkumbu ya nkhoo yawe, vëuwuhonga uvë, nanë gëtendea mantu a mënyaa tutë mëërë awe.

²⁵ Gusoko vëgakhanëkëya tutë nëëmughookëe Muungu gwa weegheeghe na vëgakurya na utumamëa ntundo hiya na Matunda, wasuu nëunoneye ukutwa khae na khae! Amina.

²⁶ Gusoko ëyëë Muungu agavareka vëhonge nkumbu nëtiyaikuryo. Akhema awe vëgakhanëkëëya ntendo nëinoneye na ntundo a mëërë awe gwa ësëë nëyitinoneye mu ntundo.

²⁷ Aghosya noo vii uvii, vëgareka uhonga ntendo ya ntundo a mughosya na mukhema vëgihuunukwa veeso gwa veeso. Aghosya vëgitendea mantu a mënyaa veeso gwa veeso vëgahanga munkhoo yawe asaa nënaaëvagwëëre mu uyaghoo wawe.

²⁸ Na gusoko antu vëgahita umumanya Muungu mu mahaa awe, Muungu agavareka vëhonge mahaa awe a futu, vëyatende nëëtivanoneye.

²⁹ Veeso arë vijuwe itambëëmwe na mantu oong'e a uvë, uvayo, uhunukwi, uvaya. Vijue wiru wuraghi, wikhuvi, wegheeghe, nkhoo nëmbë, veeso në ateti antu,

³⁰ atendereyi nanë vëmuhwëte Muungu. Antu në vëtina untu, anya gëdida, anya gitenda, anya utunda në mavë nanë vëtiakuriye afafi vawe.

³¹ Veeso afutu, vëtina uhuvëi, vëtina nkhoo në njija nanë antu nëvëtikeere antu.

³² Mbesa vëmanyie ino maragheeyo a tutë wa Muungu, mwino anya uyatenda asaa ivanoneye ikuya, veeso vëtëuyatenda asaa gutufu, ëgweeso vëgiyanjëyaa na vasaa nëvëuyatendaa.