2 Fetero 1 - Kirimi New Testament

¹ Simioni Fetero, mutumwa na mutumami wamwa Yesu Kiristo, kunë nyenye në mwahangie uhuvëi ururo mwino sese gwahangie ukëëra tütë a Muungu Tata witu nanë Yesu Kiristo Mutyoi.

² Mboto nanë majëghana ëtendeke gwa wingë kunë nyee mu umanyi wa Muungu nanë Yesu Müküü witu.

Iëtaana ra Muungu nanë Uhwanii wa Muungu

³ Udaho wakwe wa gërungu wagufie sese mantu oong'e nëënoneye gwa ufanga na uduva uduvi wa umuyanjisya Muungu, ukëërëa umanyi wa Muungu unë wagwëtanie sese gwa üküü wakwe nanë uja në uja ino.

⁴ Gusoko ëyëë mweeso wagufie sese maraghano në ina ughuri üküü nanë ina urito üküü, gwa ukëërëa mboto iyii nyenye mudahe ginegha ufuma ughoru në wë mu urëmi gusoko a nkumbu në mbë, na gutende gwina ukhuvëi mukhatë a ntundo a gëMuungu.

⁵ Gusoko a soko ëyëë nyenye mwitintarye gongeeya uhuvëi wanyu itambëëmwe na uja, na uja itambëëmwe na umanyi.

⁶ Kangë umanyi itambëëmwe na gibala mughonjo, na gibala mughonjo, itambëëmwe na ughëmu, na ughëmu itambëëmwe na uduvi wa umuyanjisya Muungu.

⁷ Gunto a asaa, uduvi wa umuyanjisya Muungu itambëëmwe na uyanjo wa gënyandughu, na uyanjo wa gënyandughu itambëëmwe na uyanjo.

⁸ Gusoko nësa mantu ayaa ëgutendeka anyu gwa wingë, meeso ëgumtenda nyee mukhome na ufafa nkhari munkhoo yanyu mung'ë a umanyi wa Müküü witu Yesu Kiristo.

⁹ Gusoko muntu woong'e nëwayawurya mantu ayaa wë mwino muntu në mufoku nëatighune na waëviwe mwino Muungu wamwoyiye ufuma u mahutye a khae.

¹⁰ Gwa uvii, aruna ane, tintaari gwa nguu uraghëëra iëtaanwa ranyu na uhwanii wanyu. Gusoko nësa nyenye mutenda uvii nyenye mutinjë ugwa u mahutye.

¹¹ Uvii mupewa gwa gëhë gingëa mung'ë a utemi wa khae na khae wa Müküü witu Mutyoi Yesu Kiristo.

Ndolyo a Keeti Ëyëë

¹² Gwa uvii nene naramwua ufwaghëëra umukumbukëya nyenye mantu ayaa, mbesa nyenye muyamanyie na ahinëntëe munkhoo yanyu gwa umëmanya tütë në nyenye mumëkweti.

¹³ Nene ngughema në mwëmo wane, matungo oong'e në nëduvie mung'ë a mwëëre uruu, umufëtya nyenye gwa umukumbukëya.

¹⁴ Gusoko nene nëmanyie mwino ikuya rane rahu mbeeraa mwino Müküü witu Yesu Kiristo wankhanëe nene.

¹⁵ Na nene ninjë utintaara gwa nguu itungo nënahegha ufuma mu uduvi urui umutenda nyenye mudahe ukumbukwa mantu ayaa matungo oong'e.

Fetero nanë atumami vangëja vamuune Kiristo

¹⁶ Gusoko sese gwinahongaa daaji mahumo nëëtendiwe na urëmu waanantu itungo nënaa sese gwendie umumanyisya udaho nanë ija ra Müküü witu Yesu Kiristo. Ëgweeso sese gwaghune gwa miho itu aghonjo weru wakwe në ukuu.

¹⁷ Gusoko itungo në mweeso waghenyifa ikuryo nanë üküü ufuma kunë Muungu Tata na ruri ugaja kunë mweeso gwa üküü në üküü “Uyuu në Mwanane në muyanjwi wane, në nene nguyanjisiwa na mweeso ino.”

¹⁸ Sese gwategheeye ruri urui ufuma girunde, gusoko sese arë gwitambëëmwe ginawe gunto a gëtanto në gëëru.

¹⁹ Sese gwina ukhani wa gëdaghu watendie wa tutë nanguu. Nyenye mwinjë utenda vija go nëmwawutegheeya ukhani uruu. Ukhani uruu wë mwino gëmwëë nëgëëriye mung'ë a kiti. Gëmwëë ëkëë gëgwerya faka itiku nëgwacha na njota a diu nëadwëëra munkhoo yanyu.

²⁰ Intu në iküü nyenye inoneye mumanye ërëë mwino gutie udaghui wa Maandëko në Meru në muntu ugudaha uwudona gwa mafenji akwe.

²¹ Gusoko gutie udaghui mbanduvë nëwajie ufuma gwa anantu, ëgweeso Mwahu Mweru wendie uveheera antu munkhoo yawe urighëëtya sayu nëëfumie kunë Muungu.