Zuda 1 - Pathian Lekhabū Ānthiang

Chubai Thōna

¹ Zuda, Isuo Khristā suok lē Zakob a paruolin, Pā Pathianin ei kui, ei manthiang suo, Isuo Khristā'n ei hōi ngāi kōma kei maziak.

² Lungkhamna, phūkdāina lē anditna chu na chung una pung rase.

Mīnchūpū Rothol ngāi Hekna

³ Kei madit ngāi, anruola nei chang sandamna ruia na kōm una ānziak ranga kā zōt sabak a. Mīnthiang ngāi kōma voi khata anbetōk suo ha, ārungtit ranga lungngamna chong anziak ei nāng tī ka riat a.

⁴ Mī senkhat chu maruka a hong ālūt u na, hava ngāi chu tianlāi ātā siatanlō ranga āndang suo, Pathian tellui ngāi, koini na Pathian a lungkhamna chu hurnāna ānchang ngāi, Puma Pathian angkhat dak lē koini na Puma Isuo Khristā āheng ngāi a ni u.

⁵ Nangnī'n voi khat chu alompeia na riat zit suonā'm ni sela, kei na manriat rēt zōt u a ni. Pumā'n Āigupta ram ātā a mi ngāi a mazōk a, nukhōna chu āiam nōk ngāi chu a pei zit a.

⁶ Vānpalāi ngāi, a dingmun u rēng luia, ei om una mun āmāk ngāi chu, nikhuo aliana ruiril tika ranga azīng kāra tāituon zīngzira ankhita Pathianin ei siak a ni.

⁷ Sodom lē Gomora lē a ravēla khopui ngāi um hantin dēn han a om u na. Antīr aruoi hurnāna lē taksa zōtdān salui anpēk u na. Amāni chu tāituon moipuia antakna atiara enruona a sin a.

Mīnchūpū ngāi Nunchang

⁸ Hantin dēn han hiva mi ngāiin a ramang u ngāia anboi a, a taksa u ngāi chu mannim u na, ningneipū ngāi tel u mak a, milian ngāi siat a ril u na.

⁹ Tenchu vānpalāi ulian khīt Mikhael-in Mōsi a ruok ruia diabola ankhalpui lāi han, amā'n āsiat manlō ngam mak a, tenchu, “Pumā'n na chūnngō na thō rase,” a tī na.

¹⁰ Tenchu hiva ngāi chu ei riat u nōk ngāi kēng asiat ei ril u. Andon theina dōnlui ramsa ngāi anga ei ānzirpui riatna ngāia han amāni chu ei siat u a ni.

¹¹ Amāni chu khomāk tung u rase! Asik chu Kain a lampui a zī u na. Manna ranga huotanham sabaka Balām diknōkna lampuia a tān u na, hatuka Kora selnāna anpei u na.

¹² Hiva ngāi hi anditna bukhalāi pāntā nei kāi unāna kāp a ni u. Amāni chu anchina bui thaka bukhalāi ei na kāipui u, amāni chu berapū a ninga anvāi u kēng. Amāni chu tī bui ansūm, thīnthī'n ei chōi titir a ni u. Thimanuia marā bui thingkung, khēp annīna āthī, razung anphōi u kēng.

¹³ Tipuia tiduar ansok anrāt, a ning una a muolphuina ānhuon, cheikhuonlēng ārsī, amāni ranga tāituon azīngkhapna chu ei hōi a ni.

¹⁴ Enok chu Adam ātā khūk sarina mī a ni, amā'n hiva mi ngāi ruia dēchong a lei ril a, “Entā, Puma chu a mī ānthiang ngāi asāng sōm le a hong.

¹⁵ Mitin chunga rui aril rang lē Pathian tellui ngāi, Pathian telnōknāna a sinthō u dōra, Pathian telluia a sinthō u ngāi, hanūk chu Pathian tellui misalui ngāiin ama aduia chong anrum ei ril u ngāi dōra ruia āsia anlō ranga a hong.”

¹⁶ Hiva ngāi chu āchiar lē bāiankham mī a ni u. Amāni a ning una āsia ningōlna āzī ngāi a ni u. A mūr u ngāiin chongpākansalna lian kēng ei ril, takna ranga mī lōp chachak ngāi a ni u.

Lungngamsakna Chong

¹⁷ Tenchu, kei madit ngāi, koini na Puma Isuo Khristā kuitīr ngāiin aphāmāna chong a lei ril u ngāi chu riattit u ro.

¹⁸ Amānī'n na kōm u na, “Hun heka chu, maniērō thō ngāi la om u'n ti, amāni'n a ning una Pathian telluina ningōlna lampui zī u'n ti,” a na ti u na.

¹⁹ Hiva mi ngāi hi taksa mī, ansenna āsin ngāi, Ratha dōnlui a ni u na.

²⁰ Tenchu nangni kei madit ngāi, nei iam una anthiang khīt chunga andinga ansōn u ro. Rathā Ānthianga zārzong u ro.

²¹ Pathian anditnāna om u ro, tāituon damna tenpei koini na Puma Isuo Khristā a riangvāimūna chu ngāk u ro.

²² Malung songankharna dōn ngāi chung riangvāi mu u ro.

²³ Senkhat chu anchi chunga mazōk u ro, moi ātā nuk ving u ro. A taksā'n ei manim raliang ngāi ngal matīr u ro.

Bōrsāng Pēkna

²⁴ Atun hin nei ānbā rang ātā a na rung theipū, ei lianna matona rāisān taka lē demnābuia a na dar theipū,

²⁵ koini na Sandampū Pathian, ama rong āhian kōma anlianna, anlalna, ruirilna lē ningneina ngāi chu atun ātā tāituona om chian rase. Amen.