Zosua 1 - Pathian Lekhabū Ānthiang

Zosua Kōma Pathian Chongpēk

¹ Zehova suok Mōsi a thi suona hintin hin a nī na, Zehova'n Mōsi a dorbōndompū, Nun a nāipasal Zosua a chongpui a,

² “Ka suok Mōsi chu a thi zei. Hasikhan atun hin, anthui tānla, nang lē hiva mipui ngāi dōra chu Zordan vā'n kā'n u tānla, Israel nāi ngāi kei pēk u rang rama, sē u ro.

³ Mōsi a kōma kei ti suo anga, na kephā'n ei āthinna mun dōra chu kei na pēk suo kēng a ni zei.

⁴ Ha mibuiram le Lebanon ātā tidung lian, Eufretis tidung ten, Het mi ngāi ram dōra, ani lūtna tianga Tipui Lian ten chu na ramrī u chang in ti.

⁵ Na damsūnga mī tūtē na matona ānding thei rang om mak; Mōsi a bila kei om anga, na bilā'm om ka ting. Na māk nō ning, na heng um nō ning.

⁶ Arāta lē angama om ro, amāni āpēk ranga a pā ngāi kōma ka lei tin ram chu hiva mi ngāi dōngluo ranga nei sem rang.

⁷ Ka suok Mōsī'n dān ei na pēk ngāi dōra nei zī theina rang, arāta lē angam sabaka pei om ro. Nei sēna taka bārī nei tungtheina rang, hava nātā chang tiang mo ole voi tiang mo a ni nei ānhoi rang ni mak.

⁸ Hiva dān lekhabū hi na mūr ātā ankhāi nō rase, havana ānziak anga nei mang theina rang, hava ngāi chu asūn azān nei lungchia rang a ni. Hantin han na lampui chu tuontunga bārītung na ti.

⁹ Chong kei na pēk suo ni mak mo? Arāta lē angama om ro, āchi nō ro, na dok manchuoi nō ro, asik chu Zehova na Pathian chu nei sēna taka na ompui in ti,” a tī na.

Zordan Ankān Ranga Chongpēk

¹⁰ Hatuka Zosua'n mipui ngāi ruoipū ngāi kōma chong a pēk a,

¹¹ “Riabuk lāia sē u tānla, mipui ngāi kōma hintin hin, ‘Na ning una rang nēksāk mansūk u ro, nīnthum sūnga Zehova na Pathian u'n nei va luo u ranga ei na pēk u rang ram chu avā luo ranga, hiva Zordan chu rakān u na ti,’ ” tīna, chong va pēk ro.

¹² Hatuka Ruben mi ngāi, Gad mi ngāi lē Menase mi ngāi ānbāk kōma Zosua-in hintin hin a ti:

¹³ “Zehova suok Mōsī'n chong ei na pēk u ha riattit u ro, ‘Zehova na Pathian u'n pōngansana na pēk u'n ti, hiva ram na pēk u'n ti,’ a tī na.

¹⁴ Na nungāk u ngāi, na naite u ngāi, na ranruol u ngāi chu Mōsī'n ei na pēk u Zordan ram hin tiang rāla lei om in ti. Tenchu ranakanei na rālrāt u ngāi chu rālthuom le anthuoma na paruol ngāi matona sēna, amāni chu san u'n ti.

¹⁵ Zehova'n ei na pēk u anga, na paruol u ngāi chu Zehova'n pōng a mansa māseng a, Zehova a Pathian u'n ei pēk u rang ram, amānī'n um luo u'n ti. Hatuka ram nei luo u ranga Zehova suok Mōsī'n Zordan hin tiang rāla ani suokna changa ei na pēk una han hong kīr u na tia, luo u na ti,” a ril a.

¹⁶ Amānī'n Zosua kōma, “Chong nei na pēk dōra chu thō in ti, nei na tīrna taka koini chu sē in ti.

¹⁷ Rui tina Mōsi a chong nei tel anga, na chong tel in ti. Mōsi a bila ei om anga han, Zehova na Pathian rong hi na bila om rase.

¹⁸ Na chongpēk aduia asel takpei lē na chongpēk chongkam ngāi dōra tellui chu ei ānthat rang. Arāta lē angama pei om ro,” tīna Zosua chu a masang u na.