Zona 1 - Pathian Lekhabū Ānthiang

Zona a Hetelnōkna

¹ Amitai a nāipasal Zona kōma Zehova chongkam a hong ātung chu,

² “Anthui ro, Nineve khopui aliana sē tān, khopui aduia va puong ro. Asik chu ei siat una chu ka matona a hong ātung zei.”

³ Tenchu Zona chu Zehova makung ātā Tarsis tiang ārot ranga anthui a. Zopa-na a vā chum a, Tarsis āpan rang rakuongpui chu a va mū na. Amā'n a chuongman chu a pēk a, Zehova mitmū nātā, amāni le han Tarsis āpan ranga, rakuongpuia a chuong a.

Tipuia Phāivuo

⁴ Tenchu Zehova'n thirum chu tipuia a manhong a. Tipuia han phāivuo anrik sabak a, rakuongpui chu āsiat rang khopa a hong ānī na.

⁵ Hatuka rakuongpuia sin athō ngāi chu ā chī u na, mī dōrā'n a pathian u chip a pāi u na. Hatuka a neinun u ngāi chu rakuongpuia āom ngāi ei manzāng thei una rang, tipuia a masul u na. Tenchu Zona chu rakuongpui athuoi khīt muna a chum a, a vā zāl a, athibira a in a.

⁶ Hatuka rakuongpui ruoipū chu a kōma a hong a, amā'n a kōma, “Āinpū imo nei mandon? Anthui ro, na pathian pāi ro. Na pathianin koini nei thi nōkna rang, a na mandonpē ving thei ngāi,” a tī na.

⁷ Amāni lē amānī'n, “Hong u ro, ravānenna vōr u rei, hatuka tū sika mo hiva antakna koini chunga ei hong tung hi nei riattheina rang,” a ti u na. Hatuka ravānenna a vōr u na, Zona a chunga a chul a.

⁸ Hatuka amānī'n a kōm u na, “Lungkhama na ril ro! Tū sika mo hiva antakna hi koini chunga ei hong chul? Hong mo na sinthō? Hova nātā āhong mo nā ni? Hova ram mī mo nā ni? Hova nama mī mo nā ni?” tīna, a rakel u na.

⁹ Hankēng amā'n, “Koi chu Hebrāi mi kā ni, tipui lē phil ahul āsinpū, Zehova vānram Pathian chu ka chī na,” a tī na.

Zona Tipuia ei Ānsulna

¹⁰ Hatuka mi ngāiin achālaka ā chi u na, a kōma, “Hong sika mo hiva hi nei thō?” a ti u na. Asik chu mi ngāiin Zehova mitmū nātā ei rot ha a riat u na, amā'n ei ril suo sika.

¹¹ Hatuka amānī'n a kōma, “Koini ranga tipui ei hong ngīr theina rang na chunga imo nei thō rang?” tīna a rakel u na. Asik chu tipui phāivuo chu anrik riam a.

¹² Amā'n a kōm u na, “Nā dom u tānla, tipuia na masul u ro. Hatuka nangni ranga tipui chu hong ngīr in ti. Asik chu hiva phāivuo anrik hi koi ka sika kēng tī hi ka riat,” a tī na.

¹³ Hanum ni sela, mi ngāiin tānga āchōi ranga apūt sabaka a vei u na, tenchu thō thei u mak a. Asik chu tipui phāivuo chu amāni chunga a hong ānrikpē riam u na.

¹⁴ Hasikhan amāni chu Zehova a pāi u na, “O Zehova, na kōma na na zong, lungkhama hiva nāi ei damna sika na masiat biang nō ro, masial dōnlui thisen chu koini chunga masul nō ro. Asik chu O Zehova, nang chu nei zōtdān anga sin nei thō a ni,” a ti u na.

¹⁵ Zona chu a dom u na, tipuia a masul u na. Hatuka tipui tiduar ansok chu a hong āngīr a.

¹⁶ Hatuka mi ngāiin Zehova chu āchi sabak u na, amāni chu Zehova kōma anbōlna dāli a dar u na, chong a tin u na.

Zona a Zārzongna lē ei Zōkna

¹⁷ Zehova'n ngapui chu Zona ānvol ranga a mansūk a. Zona chu ngapui von sūnga sūn anthum lē zān anthum a om a.