Zohan 1 - Pathian Lekhabū Ānthiang

Chong Taksā ei Changna

¹ Aphuta chu chong a om. Chong chu Pathian kōma a om. Hava chong chu Pathian a ni.

² Aphuta ama chu Pathian kōma a om.

³ Ii dōra hi ama nāta ānsin kiar a ni. Ānsin ngāi dōra hi ama nātā niluia ānsin khat ngal om mak.

⁴ Amāna damna a om a. Hava damna chu miring ngāi raāng a ni.

⁵ Hava raāng chu azīng kāra a ēl a, āzīngin hava ha mandōk mak a.

⁶ Mī khat Pathianin ei hong tīr a om a. Ama raming chu Zohan a ni.

⁷ Ama zāra mī dōrā'n ei iam thei una ranga, ama chu hava raāng ruia āriatpuipū āni ranga āriatpū anga a hong a.

⁸ Ama chu hava raāng ha ni mak. Tenchu hava raāng ruia āriatpuipū āni ranga āhong kēng.

⁹ Raāng tak, mitin raāng āpēkpū chu maniapūra a hong.

¹⁰ Ama chu maniapūra om a. Maniapūr chu ama nāta ānsin a ni ngalā'm, maniapūrin ama chu lei riat mak.

¹¹ Ama a mi ngāi kōma a hong a, tenchu a mi ngāiin lei pom mak a.

¹² Tenchu ama āpom dōra lē ama raming āiam dōra kōma, Pathian nāi changna ningneina a pēk a.

¹³ Amāni chu thisen ātā ānzir ni u mak, taksā zōt ātā lē miring zōt ātā'm ni u mak, tenchu Pathian ātā kēng.

¹⁴ Hava chong chu taksā a hong āchang a. Koini na kāra ommun a khuor a. Ama ei ānlianna, Pā'n Nāipasal ei nei selep anlianna ha koinī'n nei mu. Ama chu lungkhamna lē ataka ābit a ni.

¹⁵ (Zohan chu ama ruia āriatpuipū a chang a, “ ‘Ka nūka āhongpū chu ka māna āom ei ni sika, ei na hong khēl kēng a ni zei,’ tīna a rui ka lei ril chachak pū chu ama kēng,” tīna ankhēk a.)

¹⁶ Ama ei bitna nātā koinī'n lungkhamna chunga lungkhamna nei man kiar a ni.

¹⁷ Pathianin dān chu Mōsi amanga a hong pēk a. Tenchu lungkhamna lē atak chu Isuo Khristā amanga āhong kēng.

¹⁸ Pathian chu tūtē'n la mu ngāi mak. Pā rōpsuoma om Nāipasal nei selep rongin, ama chu a manlang zei.

Baptispū Zohan chu Khristā ni mak

¹⁹ Chāizūng ngāi lē Levi mi ngāiin Zerusalem ātā a kōma, “Tū mo nā ni?” tīna, ānkel ranga Zehudi ngāiin a tīr u lāi han Zohan-in hiva chong hi a lei ril a.

²⁰ Amā'n ipluia a puong a, “Khristā ni mak ung,” tīna anpuong a.

²¹ Amānī'n ama chu, “Hanle tū mo nā ni? Eliza mo nā ni?” tīna a rakel u na. Amā'n, “Ni mak ung,” a tī na. “Deari ha mo nā ni?” Amā'n, “Ni mak ung,” tīna a masang a.

²² Amānī'n a kōma, “A na hong ātīr ngāi kōma nei va masang theina ranga tū mo nā ni? Nang hong mo nei āntī?” a ti u na.

²³ Amā'n, “Koi hi, Deari Isaia'n ei tī anga, ‘Puma lampui chu manzīk u ro,’ tīna mibuirama ānkhēkpū rōl chu kā ni,” (Isa 40:3) a tī na.

²⁴ Hava āntīr ngāi ha Farisāi ngāi bila a ni u na.

²⁵ Amānī'n a kōma, “Khristā ha nā ni nōka, Eliza'm nā ni nōka, dearī'm nā ni nōk anten, hong sik mo baptisma nei pēk?” tīna, a rakel u na.

²⁶ Zohan-in amāni chu, “Koiin tī le baptisma kei pēk, tenchu na kār una nei riat u nōk mī khat andinga om a.

²⁷ Ka nūka āhong rang pū a kekok khitna rī āsūtruo ngal ni mak ung,” tīna, a masang a.

²⁸ Hiva rui ngāi dōra ei omna chu Zordan dung varāl Bethani-na a ni. Hava ha Zohan-in baptisma ei pēkna mun a ni.

Pathian Beratē Isuo

²⁹ Hanūk nikhuona Zohan-in Isuo a tianga ei hong chu a mū na, “Entā, Pathian Beratē, maniapūr siatna āchōi so.

³⁰ Hiva mī rui hi ka lei ril chu a ni, ‘Ka nūka mī khat a hong, ama chu ka nēka ālian a ni, asik chu ka māna a lei om a ni.’

³¹ Ama chu kei riat nōk a ni. Tenchu Pathianin ama chu Israel ngāi kōma ei manlangna rang, koiin tī le baptisma kei hong pēk a ni,” a tī na.

³² Zohan-in ei riatpuina a ril a, “Rathā chu vānram ātā vasū anga a hong āchum ka mū na, ama chunga a hong āom a.

³³ Ama chu kei riat nōk a ni, tenchu tī le baptisma āpēk ranga a na hong ātīrpū'n ka kōma, ‘Rathā ei hong chum a, a chunga ei hong omna pū tak ha, Rathā Anthiang le baptisma āpēk rang chu a ni.’

³⁴ Ka mū na, ama hi Pathian Nāipasal tīna kei puong a ni,” a tī na.

Isuo Nūk a Zī Zolāi Mānsa ngāi

³⁵ Hanūka nikhuo rēta Zohan chu a zolāi anni le anding a.

³⁶ Isuo kal ei chōi chu amā'n a en a, “Entā, Pathian Beratē so,” a tī na.

³⁷ Zolāi anni ngāiin a chongril a riat u na, amānī'n Isuo a zī u na.

³⁸ Isuo chu anhoi a, ama ei zī u a mū na, a kōm u na, “Imo nei ārok u?” a tī na. Amānī'n a kōma, “Rabi,” (Rabi chu Mīnchūpū tīna a ni) “Hovan mo nei om?” a ti u na.

³⁹ Amā'n a kōm u na, “Hong u tānla, mu u na ti,” a tipē na. Amāni chu a hong u na, ei omna chu a mū u na. Hava nikhuo han ama bila a om len u na. Dar manlī tāng a ni zei.

⁴⁰ Zohan a chong a riat a, Isuo nūk a zī anni ngāi bila angkhat chu Andria, Simon Peter a paruol a ni.

⁴¹ Amā'n mānsa khīta a paruol Simon a va mū na, a kōma, “Koinī'n Mesia na mu zei,” a tī na. (Mesia chu Khristā tīna a ni.)

⁴² Andria'n ama chu Isuo kōma a hong ruoi a. Isuo'n ama chu a lei en a, amā'n, “Nang hi Zona nāipasal Simon nā ni. Kefa tīna anpāi in na ti.” (Kefa chu lung tīna a ni.)

Filip lē Nathanael Isuo'n a Pāi

⁴³ Hanūk nikhuona Isuo chu Galili-na āsē rang a zōt a. Filip chu a va mū na, a kōma, “Na zī ro,” a tī na.

⁴⁴ Filip chu Andria lē Peter a khuo Betsaida mī a ni.

⁴⁵ Filip-in Nathanael a mū na, a kōma, “Ama ruia Mōsi a dāna lē deari ngāiin a lei maziak u Nazaret Isuo, Zosef a nāipasal chu koinī'n na mū zei,” a tī na.

⁴⁶ Nathanael-in a kōma, “Nazaret ātā āsa angkhattē ngal hi a suok mo thei ngāi?” a tī na. Filip-in ama kōma, “Hong tānla, hong en ro,” a tī na.

⁴⁷ Isuo'n Nathanael chu ama tianga ei hong a mū na, a kōma, “Entā, Israel mi tatak so, amāna anhuongna ābui thak,” a tī na.

⁴⁸ Nathanael-in, “Hontin mo nei na riat?” a tī na. Isuo'n a masang a, a kōma, “Filip-in a na kui mān ātā, theichang kung thuoia nā om lāi han kei na mū kēng,” a tī na.

⁴⁹ Nathanael-in a masang a, a kōma, “Rabi, nang hi Pathian Nāipasal nā ni! Israel ngāi rēng nā ni,” a tī na.

⁵⁰ Isuo'n a masang a, a kōma, “ ‘Theichang kung thuoia ka na mū,’ kei na ti sika mo nei iam? Hiva ngāi nēka rui alian la mū'n na ti,” a tī na.

⁵¹ Amā'n a kōma, “Ataktaka kei na ril a ni zei, nangin vānram anlong a, Miring Nāipasal chunga Pathian vānpalāi ngāiin ei kal ei chum chu mu in na ti,” a tī na.