Zoel 1 - Pathian Lekhabū Ānthiang

¹ Hiva hi Pethuel a nāipasal Zoel a kōma Zehova chong a hong ātung chu a ni.

Khāiin ei Masiatna

² Nangni pātar ngāi, hiva hi rangāi u ro, Hiva rama āom ngāi dōra, na kuor sung u ro! Nangni hunlāi le na pā u ngāi hunlāia Hivan tin hin a ni mo ngāi zei?

³ Hiva ruia hi na nāi u ngāi ril u ro, Na nāi u ngāiin a nāi u ngāi ril u rase, A nāi u ngāiin khūk atei ngāi kōma ril u rase.

⁴ Khāiruol khatin ei sāk maniang chu, khāiruol ateiin a sāk a. Khāiruol ateiin ei sāk maniang chu khāiruol atei rētin a sāk a. Khāiruol atei rētin ei sāk maniang chu khāiruol atei khat rētin a sāk a.

⁵ Nangni anrī ngāi, anthui tān chap u ro, Nangni theirapomningtī a nēk ngāi dōra, chārchā u ro. Asik chu na mūr u nātā theirapomningtī thar chu anpei zei.

⁶ Asik chu nam chu ka ram aduia anthui zei, Ama chu ranakanei le atelsuo salui a ni; A hā chu akoibaknei ngāi hā a ni, Ama chu akoibakneipui uihā ādōn a ni.

⁷ Ama chu ka theirapomrāng a masiat a, Ka theichang kung chu a makhiak chit a; Akōr chu a līk a, a pei a, A bāk ngāi chu a manlang chei a.

⁸ Nungāk anthiangin puontumbū ei rasil a, A vānglāia a tangsā ranga ei ānngūi anga chap sabak u ro.

⁹ Sahūm dāli le ābuong dāli chu Zehova in ātā ankhār zei a. Zehova dorbōndom Chāizūng ngāi chu chapanngūi u na.

¹⁰ Phāi chu ansiat biang a, Phil chu chapanngūi a; Asik chu sāng chu ansiat biang a, Theirapomningtī chu a kang a, Sariak chu a hek a.

¹¹ Nangni sinmi ngāi, anzak u ro, Nangni theirapom rahuon āthōpū ngāi, Gōm le bārlī ranga chārchā u ro; Asik chu phāia sāngātruo ngāi chu a siat biang zei.

¹² Theirapomrāng chu a chār zei a, Theichang kung chu a thēm a; Theirubit kung, theiletūm kung lē theithāi kung um, Phāia thingkung dōra a chār kiar zei; Ataktaka miring nāipasal ngāi kōm ātā Rāisānna chu a chuoi zei a.

Ram Ranga Chapanngūina

¹³ Nangni chāizūng ngāi, anliang tānla, chapanngūi u ro; Nangni māichām a dorbōndom ngāi chārchā u ro; Nangni ka Pathian dorbōndom ngāi Hong u ro, puontumbū ansila zānsōt zāl u ro. Asik chu sahūm dāli le ābuong dāli chu Na Pathian in u nātā ankhār zei a.

¹⁴ Angoina hun anthiang aruot u ro, Khōmpui anthiang kui u ro. Pātar ngāi le hava rama om ngāi dōra chu Zehova, na Pathian ina būm ro. Zehova kōma chap u ro.

¹⁵ Hatukō hava nikhuo chu! Zehova nikhuo hi anāi zei; Āthōtheikiarpū nātā anpeibiangna anga hong tung in ti.

¹⁶ Koini na mitmūna nēksāk hi ānkhāi ni zei mak mo? Rāisānna le phāmna chu koini Pathian in ātā anpei ni zei mak mo?

¹⁷ Chimuru chu philtang thuoia ankuna om a, Neinunsiakna-in ngāi chu anrūna om a; Sasiar in ngāi chu a chiam a, Asik chu sāng chu a thēm zei a.

¹⁸ Ran ngāi chu ankūi u na! Ranruol ngāi chu a chang a dong u na, Asik chu sūlring dōn u lāi mak a; Beraruol ngāi ngalin ansinsakna atuor u na.

¹⁹ O Zehova, na kōma kā'n khēk; Asik chu mibuiram sūlring ngāi chu moiin a hāl biang zei, Phāia thingkung ngāi dōra chu moidonin a hāl biang zei.

²⁰ Rama ran ngāiin um na kōma a chap u, Asik chu tiva dunga ti ngāi chu akang suo u zei, Mibuiram sūlring ngāi chu moiin a hāl biang zei.