Zōb 1 - Pathian Lekhabū Ānthiang

Zōb a Nunchang lē ei Ānchongna

¹ Uz rama mī khat a om a, a raming chu Zōb a ni. Hava mī chu demnabui lē ānzīk, Pathian ānchi lē āsiat alōi mī a ni.

² Ama nātā nāipasal sari le nāinupang anthum anzir a.

³ Amā'n dōngluo chu bera 7,000, mākingkang 3,000, sarāttang rabo 500, sakuorpar nupang 500 lē suok atampā a dōn a. Ama chu suolam tianga mi ngāi dōra kāra ālian khīt a ni.

⁴ A nāipasal ngāi chu anikhuo ānruot u chipa han, angkhakhat seng ina han anbūm u chachak a, pāntā a mansūk u na, a sarnū anthum ngāi chu amāni le āsāk ānēk ranga a thēmpāi u chachak a.

⁵ Hintin hin a hong ānī na, a pāntā zar u nikhuo ngāi chu a hong āhek tikle han, Zōb-in amāni chu a pāi a, a manthiang a. Ama chu zīnga anthui a, amāni ei tam u zāt ang chipa hālbiang dāli chu a dar chachak a. Asik chu Zōb-in, “Ka nāipasal ngāi chu āsia a thō u na, a malung una Pathian khomāk a lei sam ving u ngāi,” a tī na. Hantin han Zōb-in a thō babang a.

Setan-in Zōb Siat a Manlō

⁶ Nikhat chu Pathian nāipasal ngāi chu Zehova matona ānlang ranga a hong u na, Setan um a kār una a hong a.

⁷ Zehova'n Setan kōma, “Hova nātā āhong mo nā ni?” a tī na. Hankēng Setan-in Zehova a masang a, “Phila ka hong anlēng ka vā'n lēng a, kei hong chei kei va chei suona hong kā ni,” a tī na.

⁸ Zehova'n Setan kōma, “Ka suok Zōb chu na mandon chu ngāi mo zei? Asik chu ama anga phila hin tūtē om mak, miring demnabui le ānzīk, Pathian ānchī le āsiat ālōi mī a ni,” a tī na.

⁹ Setan-in Zehova chu a masang a, “Zōb chu asik abuia Pathian ei āchī mo?

¹⁰ Ama anhīl vinga, a insūngkuo anhīl vinga lē ei dōn dōra anhīl vinga rapal le han nei mankul biang ni mak mo? Nangin a kut sinthō chu bōr na pēk a, hiva ram hin a dōngluo chu a pung a.

¹¹ Tenchu, atun hin na kut chu alek tānla, ei dōn dōra chu razīkpē ro. Amā'n na makunga khomāk na la sam ngēt in ti,” a tī na.

¹² Zehova'n Setan kōma, “Entā, ei dōn dōra chu na kut chunga om; ama chunga rong na kut alāng nō ro,” a tī na. Hantin han Setan chu Zehova makung ātā a sē na.

Zōb-in a Dōngluo lē a Nāi ngāi ei Machānna

¹³ Nikhat chu a ūpā ulian khīt ina Zōb a nāipasal ngāi lē a nāinupang ngāi chu, anēk asāka theirapomningtī a buong u lāi han,

¹⁴ palāi khat chu Zōb a kōma a hong a, amā'n, “Sarāttang ngāiin phāi a rit u lāi han, sakuorpar ngāi chu a kōl una sūl ansāka om u lāi han,

¹⁵ Seba mi ngāiin amāni chu a hong rūn a, a lāk u na. Amānī'n suok ngāi chu khendāi le han a that u na. Koi rong hi azōka kei na hong ril a ni zei,” tīna a ril a.

¹⁶ Ama chu a lā chong lāitak han, mītei khat a hong a, a kōma, “Pathian moi chu anvān ātā a hong āchul a, bera ngāi lē suok ngāi chu a kāng a, a hāl biang zei. Koi rong hi azōka kei na hong ril a ni zei,” a tī na.

¹⁷ Ama chu a lā chong lāitak han, mītei a hong rēt a, “Kaldia mi ngāi chu phom anthuma ansena, mākingkang ngāi chu a hong rūn u na, a lāk u na, hanūk chu suok ngāi chu khendāi le han a that u na. Koi rong hi azōka kei na hong ril a ni zei,” a tī na.

¹⁸ Ama chu a lā chong lāitak han, atei rēt pū a hong rēt a, “Na nāipasal ngāi lē na nāinupang ngāi chu a ūpā ulian khīt ina anēk asāka, theirapomningtī a buong u lāi han,

¹⁹ anlāiseka mibuiram tiang ātā thirum a hong a, a in kil manlī chu a hong razīk a, hava chu vānglāi ngāi chunga a hong āchul a, amāni chu a thi u zei. Koi rong hi azōka kei na hong ril a ni zei,” a tī na.

²⁰ Hatuka Zōb chu anthui a, a kultāi anchuol chu a thēt a, a lū chu a vūi a. Ama chu phila anbok a, ā mōk a.

²¹ Amā'n, “Ka nū tekok ātā sāikoronga kei hong, Sāikorong dēna hava han kīr ka ting. Zehova'n ei na pēk, Zehova'n ei lāk a ni zei. Zehova raming chu anpāka om rase,” a tī na.

²² Hiva ngāi dōra hin Zōb-in āsia thō mak a, Pathian chungā'm āsia nō'n mak a.