Zekaria 1 - Pathian Lekhabū Ānthiang

Ānsīr Ranga Kuina

¹ Darias a rēng chang lāi kum annina, thā ariatna han, Ido a nāipasal Berekia, ama nāipasal deari Zekaria a kōma han hintin hin Zehova chongkam chu a hong ātung a:

² “Zehova chu na pā u ngāi chunga a tak asi sabak.

³ Hasikhan a kōm una hintin hin ti ro: Āthōtheikiarpū Zehova'n hintin hin a ti: Ka kōma hong kīr u ro, koi, Āthōtheikiarpū Zehova'n ka ti. Na kōm una hong kīr ka ting, koi, Āthōtheikiarpū Zehova'n ka ti.

⁴ Nangni chu na pā u ngāi anga ni u nō ro. Tianlāia deari ngāiin a kōm u na, ‘Āthōtheikiarpū Zehova'n hintin hin a ti: na omdān u salui ātā le na sinthō u salui ātā hong kīr u ro,’ a lei ti u chachak a. Tenchu amānī'n lei rangāi u mak a, na poisak um u mak a, koi, Zehova'n ka ti.

⁵ Na pā u ngāi chu hon mo ei om u a ni zei? Deari ngāi chu tāituona a dam u mo?

⁶ Tenchu ka suok deari ngāi kōma chong ka lei pēk ngāi, ka dān ngāi lē ka dānphun ngāi chu na pā u ngāi nēka ādiar ni mak mo? Hatuka amāni chu a hong ākīr a, hintin hin a ti u, koini na omdān ngāi lē na sinthō ngāi anga, koini chunga āthō rang ei tī anga, Āthōtheikiarpū Zehova'n koini chunga ei thō a ni zei,” a tī na.

Sakor ngāi Ruia Anlārna

⁷ Darias a rēng chang lāi kum annina tha sōmleikhatna ni 24na, Shebat thāna han, Ido nāipasal Berekia, ama a nāipasal deari Zekaria a kōma han hintin hin Zehova chongkam chu a hong ātung a.

⁸ Zāna hintin hin ka mū na, entā, mī khat chu sakor sena a chuong a, mun koronga pākchorpār thingkung ngāi ānding a. A nūk tiang changa sakor sen, senduk le angui chu a om u na.

⁹ Hatuka koiin, “Ka puma, hiva ngāi hi hong mo?” ka tī na. Hatuka vānpalāi koi anā chongpuipū'n ka kōma, “Hiva ngāi hi hong mo ei nī na manmu ka ting,” a tī na.

¹⁰ Pākchorpār thingkung ngāi bila ānding mi hān, “Hiva ngāi hi Zehova'n leilunga cheikhuonlēng ranga ei hong tīr ngāi chu a ni,” tīna a masang a.

¹¹ Hantin han pākchorpār thingkung ngāi bila ānding, Zehova Vānpalāiin, “Leilunga cheikhuo nā'n lēng zei, hatuka entā, phil dōra chu adāiriama pōngansa zei,” tīna a masang a.

Zion Chunga Zehova Lungngamsakna

¹² Hatuka Zehova Vānpalāiin, “Āthōtheikiarpū Zehova, Zuda khopui ngāi lē Zerusalem chunga hiva kum 70 sūng na tak na lei mansi zei a, hotuk ten mo lungkham nei la mū nōk rang?” a tī na.

¹³ Hatuka Zehova'n anā chongpuipū vānpalāi chu chongkam asāna le lungngam chong le a masang a.

¹⁴ Hankēng anā chongpuipū vānpalāiin ka kōma, “Puong ro, Āthōtheikiarpū Zehova'n hintin hin a ti: Zerusalem lē Zion ranga hin ānrāl sabak kā ni.

¹⁵ Ahui ahēka om nam ngāi chunga ka tak asi sabak. Asik chu ka tak asi lak lāi han vānduoina āntung ranga a na lei san u na.

¹⁶ Hasikhan Zehova'n hintin hin a ti: Zerusalem-a lungkhamna le hong kīr ka ting. Hava han ka in chu ansin in ti, koi, Āthōtheikiarpū Zehova'n ka ti. Zerusalem chunga ankhīna rī chu lā'n kei in ti.

¹⁷ Puong rēt tānla, Āthōtheikiarpū Zehova'n hintin hin a ti: Ka khopui ngāi chu bārī tungnāna hong luong rēt in ti. Zehova'n Zion chu lungngam hong sak rēt in ti, Zerusalem chu a thang rēt in ti.”

Raki Manli Ruia Anlārna

¹⁸ Hatuka ka tang a, ka en a, entā, raki manlī a om a.

¹⁹ Anā chongpuipū vānpalāi kōma, “Hiva ngāi hi hong mo?” ka tī na. Hankēng amā'n a na masang a, “Hiva raki ngāi hi Zuda, Israel le Zerusalem anthek rak ngāi pū chu a ni,” a tī na.

²⁰ Hatuka Zehova'n kut thiamthei manli ngāi chu a na manmū na.

²¹ Hatuka koiin, “Hiva ngāi hi hong mo ei hong thō u rang?” ka tī na. Hankēng amā'n, “Hiva raki ngāi hi a ni Zuda anthek rak ngāi pū chu, hasikhan tūtē'n a lū chu alāng thei u lāi mak. Tenchu Zuda ram anthek rak ranga a raki ansāng nam raki ngāi chu rathatāk asak ranga le āpei ranga, hiva kut thiamthei ngāi chu a hong u na,” a tī na.