Zefania 1 - Pathian Lekhabū Ānthiang

Zuda lē Zerusalem Ranga Anrēngna

¹ Zuda rēng Zosia, Amon a nāipasal hunlāia, Zefania kōma Zehova chong a hong ātung ha. Ama chu Kusi a nāipasal, ama chu Gedalia a nāipasal, ama chu Amaria a nāipasal, ama chu Hezekia a nāipasal a ni.

² “Phil chung ātā alompeia pei biang ka ting, Koi, Zehova'n ka ti.

³ Miring lē ran chu pei biang ka ting, Chunga va zuong ngāi lē Tipuia nga ngāi dōra lē Mi ānbā ngāi chu misalui ngāi le han pei biang ka ting. Miring chu phil chung ātā pei biang ka ting, Koi, Zehova'n ka ti.

⁴ Zuda aduia ka kut ālek ka ting, Zerusalem āom ngāi dōra chungā'm. Hiva mun ātā Baāl anmōkna ngāi dōra lē Miramīl abiak chāizūng ngāi raming lē chāizūng ngāi le han pei biang ka ting.

⁵ Inchungsīpa anvāna āom ngāi abiak chachak ngāi, Zehova kōma khomāk ansam chunga Milkom a kōm um chong atin ngāi,

⁶ Zehova nūk āzī nātā ākīr ngāi, Zehova ārok lui ngāi lē ama ravān lui ngāi chu Pei biang ka ting.”

Zehova Nikhuo Lian

⁷ Puma, Zehova makunga dāiriam u ro, Asik chu Zehova nikhuo chu a nāi zei, Zehova'n anbōlna a mansūk zei, A khuol ngāi chu a khāibing zei.

⁸ Hintin hin hong nī'n tia, Zehova anbōlna nikhuona chu, “Milian ngāi lē rēng nāi ngāi lē Ram atei puon le anthuom ngāi dōra chu sinsak ka ting.

⁹ Hava nikhuo len han makot ālēn ngāi dōra chu, A puma in ngāi sukansuonna lē anhuongna ānbit ngāi chu sinsak ka ting.

¹⁰ “Hava nikhuo tik chu, koi, Zehova'n ka ti, Nga suokkhār ātā chapanngūina rasā om in ti, Anni changna nātā ankhēka chapna rasā, Tāng ngāi ātā āchim rasā anring sabak chu om in ti.

¹¹ Maktes-a āom ngāi ankhēka chap u ro! Asik chu sadāipū ngāi dōra anpei biang u zei; Sumrū apēl ngāi dōra anpei biang u zei.

¹² Hava hun tika chu hintin hin hong nī'n ti, Zerusalem chu lēm le ravān ka ting, Anhuna anbēna āom mi ngāi, A malungrīla, ‘Zehova'n asa thō nō ni, Āsiā'm thō nō ni,’ āti ngāi chu sinsak ka ting.

¹³ Hasikhan a neinun u ngāi chu rālrūn neinun chang in ti, A in u ngāi chu peianchang in ti. Amānī'n in chu sin u'n tia, tenchu luo thei u nō ni. Amānī'n theirapom rahuon thō u'n ti, tenchu hava na theirapomningtī chu buong u nō ni,”

¹⁴ Zehova nikhuo lian chu a nāi zei, Hiva hi ānāi kēng a ni zei, a hong ātung lilīp rang kēng. Zehova nikhuo rasā chu ākhā kēng, Hava han mi arāt ngāi ankhēk sabak u'n ti.

¹⁵ Hava nikhuo chu taksitna nikhuo a ni, Anpōnna le antakna nikhuo a ni, Siatnalian lē arambiangna nikhuo a ni, Azīng lē khuonnīm khap nikhuo a ni. Ansūm lē azīngkhapna nikhuo a ni.

¹⁶ Rakul anhuol khopui ngāi lē In ansāng ngāi aduia, Tōtorōt maring lē rālkāp ankhēkna nikhuo a ni.

¹⁷ “Miring ngāi chunga anpōnna mantung ka ting, Hatuka amāni chu āchō anga kal chōi u'n ti, Zehova aduia āsia a lei thō u sika, A thisen u chu philvut anga lē, A taksā u chu ēk anga bun ka ting.”

¹⁸ Zehova taksitna nikhuo tik chu, A sumrū u ngāi lē a rāngkachak u ngāiin um mazōk thei u nō ni. Tenchu a manarasia moi le han A ram pumpui chu kāng biang in ti, Asik chu amā'n a rama ommun akhuor ngāi dōra chu, Anlāiseka hong pei in ti.