Rūt 1 - Pathian Lekhabū Ānthiang

Elimelek Insūngkuo Moab-a a Sē u

¹ Atun chu hintin hin a nī na, ruirilpū ngāiin rui a ril u lāia, hava rama han māitām a chul a. Zuda rama Betlehem mī khat Moab rama āom rang ama lē a thāinū lē a nāipasal anni le han a sē u na.

² Hava pasal raming chu Elimelek a ni, a thāinū raming chu Naomi a ni, a nāipasal anni ngāi raming chu Mahalon lē Kilion, ama chu Zuda rama Betlehem, Efrat mī a ni. Hatuka amāni chu Moab rama a sē u na, hava han ommun a khuor u na.

³ Hankēng Elimelek, Naomi ruothar chu a thī na, ama lē a nāipasal anni ngāi chu a māk a.

⁴ Atun chu amānī'n Moab nupang chu nungāka a lāk u na: angkhatpū raming chu Orpa lē angkhat rēt pū raming chu Rūt a ni. Hava han kum sōm tāng a om u na.

⁵ Mahalon lē Kilion um a thi u na. Naomi chu a nāipasal anni lē a tangsā'n a māk u na.

Naomi chu Rūt le han Betlehem-a a Kīr Rēt u

⁶ Hatuka Naomi chu a muinū ngāi le han Moab ram ātā ākīr rēt ranga anthui a, asik chu Zehova'n a mi ngāi nēksāk apēka ei hong en tī thang chu Moab ram ātā a lei riat a.

⁷ Hasikhan ama chu ei omna nātā a muinū anni ngāi lē a sē na. Amāni chu Zuda ram tiang ākīr rēt ranga lampuia kal a chōi u na.

⁸ Naomi'n a muinū anni ngāi kōma, “Na nū u ngāi in chipa kīr rēt u ro. Āthi ngāi chunga lē ka chunga nei thō ang thapa han, Zehova'n na chung una lungkham na mu u rase.

⁹ Zehova'n nā ninī'n u chu na tangsā u in chipa pōng nei ānsa thei una rang, na phal u rase,” a tī na. Hankēng amāni chu a tum a, amāni chu anringa a chap u na.

¹⁰ Amānī'n a kōma, “Ataktaka koini chu nang na bila na mi ngāi kōma hong kīr in ti,” a ti u na.

¹¹ Tenchu Naomi'n, “Kīr u ro, ka nāinupang ngāi. Irang mo ka bila nei hong u rang? Na tangsā u ranga ka tekoka nāipasal atun ten a lā om mo?

¹² Ka nāinupang ngāi, kīr u ro, na lam pan u ro. Ataktaka ruothar ālāk ranga kā tar tet zei. Sabeina kā dōn a tī na, atun zān ruothar lāka, nāipasal ngal nei in lang,

¹³ bārī atung u māseng nei maruong u rang mo? Ruothar lāk luia na lei om chian u rang mo? Ni mak, ka nāinupang ngāi, asik chu nangni sika ka malung a na sabak a, Zehova kut chu ka chunga a hong āchul a!” a tī na.

¹⁴ Hankēng ankhēka a chap rēt u na, Orpa'n a tarpī a tum a, tenchu Rūt-in chu ā kuo na.

¹⁵ Hatuka Naomi'n, “Entā, na sāruinū chu a mi ngāi kōma lē a Pathian kōma a kīr rēt zei a. Nang um na sāruinū bila kīr rēt ta ro,” a tī na.

¹⁶ Tenchu Rūt-in: “Nang a nā mak a, na nūk anā zī rang ātā ākīr rēt ranga chu na mathēm zām nō ro, asik chu nei sē nā tak, sē ka ting. Nei riakna tak, riak ka ting. Na mi ngāi chu ka mī nī'n ti, na Pathian chu, ka Pathian.

¹⁷ Nei thina taka, thi ka ting, hava han anphūm len ka ting. Nang lē koi hi thīna rong nōk chu neinun ateiin ana mansen rang ten, Zehova'n ei zozōt na thō rase, hiva nēkā'm,” a tī na.

¹⁸ Naomi'n a bila ei sē zōt ngēt tī a hong riat le chu, amā'n ei chongpui chu a mong a.

¹⁹ Betlehem atung u māseng amāni anni chu kal a chōi u na. Hatuka hintin hin a nī na, Betlehem a hong āsuok u le chu, amāni sika khopui pumpui chu anlāirak u na, nupang ngāiin, “Hiva hi Naomi mo?” a ti u na.

²⁰ Tenchu Naomi'n amāni kōma, “Naomi na ti u nō ro, Mara na ti u ro, asik chu Āthōtheikiarpū'n akha sabaka ka chunga ei na lōt ke a ni zei.

²¹ Abita kā suok a, Zehova'n akoronga ina a na hong ruoi rēt a. Hong sika mo Naomi nei na ti u, Zehova'n ei na duina chu a manlang zei hale, Āthōtheikiarpū'n ka chunga vānduoina ei mantung a ni?” a tī na.

²² Hankēng Naomi chu a muinū Moab mī Rūt le han Moab ram ātā a hong ākīr u na. Amāni chu bārlī āt ei phut tianga Betlehem-a a hong u na.