Rōm Khopuia Kuibing kōma Paul a Lekhamathuon 1 - Pathian Lekhabū Ānthiang

Chubai Thōna

¹ Paul, Isuo Khristā suok lē kuitīr āchang ranga ānkui, Pathian thangahui āril ranga khāibing kā nī na.

² Hava thangahui ha Pathianin tianlāi ātā a lekhabū anthianga deari ngāi mūr amanga a chongtin a ni.

³ Hava thangahui ha a Nāipasal, koini na Puma Isuo Khristā rui a ni. Taksā anga chu David a khūk ātā a hong ānzir a ni.

⁴ Anthiangna Rathā anga chu āthī nātā ānthuirētna amanga thōtheina ranak le han Pathian Nāipasal ei ni tī chu anpuong a.

⁵ Ama zāra lē ama a raming sika hin koinī'n hiva lungkhamna le kuitīr sin hi nei chang a ni. Nam tin kāra iamna lama hē āntel ranga nei chang a ni.

⁶ Nangnī'm hava nam ngāi bila Isuo Khristā'n ei na kuina bila ānchel nā ni u.

⁷ Rōm khuona Pathianin ei madit ngāi dōra lē mīnthiang āni ranga ānkui ngāi dōra kōma, Koini na Pā Pathian lē Puma Isuo Khristā nātā lungkhamna lē phūkdāina chu na kōm una om rase.

Rōm-a Āsē ranga Paul ei Zōtna

⁸ Mānsāna chu Isuo Khristā sika na lom u ranga ka Pathian kōma rāisānchong ka mantung a. Asik chu maniapūr pumpuia nangni nei iam una rui chu ānthang kēng a ni zei.

⁹ Asik chu ka zārzongna tina na raming u ngāi mongluia kei chin chachak a ni. Hava ha a nāipasal thangahui sika ka malung tataka a dorbō kei dom Pathian len a om ka zārzong anā riatpui.

¹⁰ Nukhōna luo chu Pathian zōt anga nangni kōma hongna lampui ei ānlong theina ranga zār kei zong chian a ni.

¹¹ Asik chu nangni ngāi adettita nei om thei una ranga rathalam neinun kong khat luo chu kei nā'n sempui thei una ranga anā mu rang kei zōt a ni.

¹² Hava kei tina omzia chu, koi lē nangni ngāi lōko anruola nei iamna le han anhar anlōm u rei ti na a ni.

¹³ Ūnāi ngāi, namtei ngāi kōma marā kei man anga nangni kōmā'm marā āman ranga voi ituk mo āhong ranga kei val chachak tī hi anā riat u ranga kei na zōt u. Tenchu atun tena hin a na khār a lā omtit a.

¹⁴ Grik lē Grik mī ni lui ngāi kōma, āhian le āmo ngāi kōma anruol chianga a kōm una āntāng kā ni.

¹⁵ Hasikhan nangni Rōm khuona mi ngāi kōmā'm kei thei dōr thangahui chu āril ranga kei zōt sabak a ni.

¹⁶ Khristā Thangahui chu anzakpui mak ung a. Asik chu tūkareng hiva āiam tak chu sandamna ranga Pathian sinthōtheina a ni. Mānsā chu Zehudi ngāi ranga lē Grik mi ngāi rangā'm a ni.

¹⁷ Hiva Thangahuia hin Pathian dikna chu iamna nātā iamnāna anlang a, “Midik chu iamna le dam in ti,” (Hab 2:4) tīna a lei ānziak anga.

Miring ngāi Chunga Pathian Taksilumna

¹⁸ Pathian a biak nōk le ādik nōk ngāi dōra chunga anvān ātā Pathian taksitna chu a hong anlang zei. Asik chu amānī'n chongtak chu ādik nōk le han kēng ei dui u a ni.

¹⁹ Asik chu Pathian rui ei riatthei u rang lampui chu amāni kōma Pathianin anthiang vanga ei hong manlang a ni.

²⁰ Asik chu mita mutheilui tāituona a sinthōtheina le han a Pathian nizia chu leilung ansin len ātā a kutsuok ngāi dōrā'n anthiang vanga ei hong manlang kēng a ni zei. Hasikhan nōntāk apēkruo reng dōn u lāi mak.

²¹ Amānī'n Pathian a riat u nam ni sela Pathian anga manpāk u mak, a kōma rāisānchong um ril u mak. Tenchu a mandon u chu akoronga le a malung a chu ei zīngpē u a ni.

²² Amānī'n ahian ei ānti u tenchu āmō kēng ei ānlō a ni u zei.

²³ Siattheilui Pathian lianna chu āsiat thei miring, va ngāi, sakemanlī ran ngāi lē nukanei ālōn ngāi le han a thūl u na.

²⁴ Hava sik han a taksā u chu anzakpuiruo sabaka ānmangpui ranga a malung u ningōl anga antīrruo om ānnim athō Pathianin ei betōk kēng a ni zei.

²⁵ Pathian chongtak chu milaka ei manchang u a ni. Ama āsinpū nēka amā'n ei sin ngāi ha ei biaka a dorbō ei dom u. Tenchu āsinpū chu tāituona anpāka om ruo kēng. Amen.

²⁶ Hava ngāi sika han Pathianin anzakpuiruo hurna tianga anmang ranga ei betōk rak a ni. A nupang u ngāiin nupang omdān pangāia zorō anlāk amāka, alet tianga kēng ei ānmang u a ni zei.

²⁷ Havan tin dēn han pasal ngāi um ni sela, nupang le omdān pana zorō anlāk a māk a, ahun riat lui khopa hurna tianga ei ānmang u a ni. Pasal le pasal anōk tianga om ei ānthō u. Havan tin han om āsia ei thō una marā chu a taksā u chung chipa ei man u a ni.

²⁸ Hanūk chu amānī'n Pathian ruia riatna malung reng dōn zōt u mak. Hasikhan Pathianin āsia thō nōkruo ngāi athō ranga malung āsia tianga ei betōk a ni zei.

²⁹ Havan tin han ādik nōk dōra, hurna, om āsa nōk, huotanhamna, mandon āsia, khāmaret, mī that, ansuolna, anhuongna, malung salui, chongporchonok le han abita ei om u.

³⁰ Mīsiat aril lē Pathian siat aril, lalchi dōnna bui, malung anphū, chongpākansal, āsia lama rui athar ansuok ngāi, nūpā hē tel lui ngāi a ni u na.

³¹ Malung vārna bui, a chongtin sūr theilui, miring lungkhamna dōnlui, anngoina zōtlui le lungkham mūna dōnlui ngāi a ni u na.

³² Havan tina om athō ngāi chu Pathian a ruiril anga athi ruo a ni u ti ānriat u nā'm ni sela havan tin han om ei la thō bang u a ni. Hava rong ha la ni rēt mak, mīteiin ei thō u ngāi um ei mahampui u chachak a ni.