Obadia 1 - Pathian Lekhabū Ānthiang

¹ Obadia anlārna. Puma, Zehova'n Edom ruia hintin hin a ti: (Zehova kōm ātā koinī'n ruitāng na riat a, Nam ngāi kāra palāi khat antīra om a, “Anthui u ro, thota amā le ānduipui ranga anthui u rei,” a tī na.)

Edom Chunga Ruirilna

² Entā, nang chu nam ngāi kāra asīntēna na sin ka ting. Nang chu sumdem sabaka om na ti.

³ Na malung chongpākansalnā'n a na huong a, Nang lungpui kochepa ommun ākhuor, Mun ansānga āom, Na malulunga, “Tū mo phila a na hong ānsum rang?” na tī na.

⁴ Muliang ānsānga ei kal anga ngal kal tānla, Ārsi ngāi kāra ngal rabū khuor tānla, Hava nātā na masum ka ting, Koi, Zehova'n ka ti.

⁵ Marūsā ngāi na kōma hong u sela, Mīsuom ngāi zāna hong u sela, O nei ānpei biang rang zia chu o! Tōng ei khop u tuk ei maruk u rang ni mak mo? Theirapom ākhampū ngāi chu na kōma a hong u ten, Amānī'n a khamruo senkhat māk u nō ni mo?

⁶ O, Esau a neinun anroka ei om rang zia chu o! A dōngluo anthup ngāi anmana ei om rang zia chu o!

⁷ Nang le dān akhit mi ngāi dōrā'n Ramrī tiang na nōng u'n ti; Phūkdāia nei ompui mi ngāiin Na huonga, na zui u'n ti. Na bū anēk ngāiin na ranga chāng do u'n ti. Tūtē'n riattheina lei dōn mak a.

⁸ Koiin hava nikhuo tika, Edom a mihian ngāi le Esau muolpui ātā riattheina ngāi masiat nō ning mo? Koi, Zehova'n ka ti.

⁹ Na mī ranakanei ngāi, O Teman, a rathā ta u'n ti, A hek tika chu Esau muolpui ātā mitin anthat zita anpei in ti.

Edom-in Zakob Chunga Āsiat a Thō

¹⁰ Na paruol Zakob a chunga therkhaka nei dui sika, Māimōknā'n na mankhū in ti, Hatuka tāituona anpeia om in na ti.

¹¹ Son tiang changa nā'n ding nikhuo han, Ramtei mi ngāiin a dōngluo a chōi u lāi nikhuona, Ramtei mi ngāiin a rapalsuokkhār una a lūt u lāi le Zerusalem ranga dō andāi u lāi han, Nang um amāni bila angkhat ang nā nī na.

¹² Tenchu na paruol nikhuona a vānduoina nikhuona han Ama tianga na lei en ngong rang ni mak ba; Zuda nāi ngāi chungā'm ei ānpei u nikhuona Na rāi na lei mansān u rang ni mak ba. Antak nikhuonā'm chongpākansala na lei chong u rang ni mak ba.

¹³ Ka mi ngāi antak u nikhuona a rapalsuokkhār u na, Na lei lūt u rang ni mak ba. Ataktaka, amāni pēngsōma a om u lāia Antaka a om u nikhuo han na lei en ngong u rang ni mak ba, Antak u nikhuona a neinun ngāi chunga na lei tōn u rang ni mak ba.

¹⁴ Lamsuo anchunna ngāia nang ha Ārot ngāi bila mī āthat ranga nei ānding nōk ranga kēng ba; Antak nikhuona ānniang ngāi bilā'm A kut una nei va betōk nōk rang kēng ba.

Zehova Nikhuo

¹⁵ Asik chu nam tin chunga Zehova nikhuo hi a nāi kēng a ni zei, Nangin nei thō anga, na chung u nā'm hong ānthō in ti. Na sinthō anga na lu chunga hong chul in ti.

¹⁶ Asik chu ka muolpui anthianga nei buong u anga, Nam tinin hong buong chian u'n ti; A ni, amānī'n buonga a vol u'n ti, Hatuka amāni chu ei la ni ngal u ngāi nōk anga hong ni u'n ti.

Israel Malam Zuina

¹⁷ Tenchu Zion Muola chu zōkna om in ti, Hava han anthiangna om in ti; Zakob a insūngkuo ngāiin a dōngluo u chu luo u'n ti.

¹⁸ Zakob a insūngkuo chu moi ni u'n ti, Zosef a insūngkuo chu moidon nī'n ti, Tenchu Esau insūngkuo chu sanārā ni u'n ti. Amānī'n bela hālbiang u'n ti. Hantin han Esau insūngkuo mī chu angkhat ngal adama om u nō ni, Asik chu Zehova'n a tī na.

¹⁹ Negev rama om mi ngāiin Esau a muolpui chu hong luo u'n ti, Sefela rama mi ngāiin Filistia ngāi ram hong luo u'n ti, Hatuka amānī'n Efraim phāi ngāi lē Samaria phāi ngāi chu hong luo u'n ti. Benzamin-in Giliad hong luo'n ti.

²⁰ Hatuka hiva Israel nāi selkeia om ruol ngāiin Kanān mi ngāi ram Zarefat tenpei hong luo u'n ti. Hatuka Zerusalem-a selkei, Sefarad-a āom ngāiin Negev rama khopui ngāi hong luo u'n ti.

²¹ Hatuka Esau muolpui ngāi chunga rui āril ranga Zion Muol ātā ānzōk rang pū ngāi hong u'n ti, Hatuka rēngram chu Zehova ta chang in ti.