Nahum 1 - Pathian Lekhabū Ānthiang

¹ Nineve ruia chongpuong, Elkos mī Nahum anlarna lekhabū:

Nineve Chunga Pathian Taksitna

² Pathian chu manarasia lē phubā alāk chachak Zehova a ni. Zehova chu phubā alāk chachak lē taksī lum a ni. Zehova'n ama ādui ngāi chunga phubā lāk in ti. A rāldui ngāi ranga taksitna chu a mantīng a.

³ Zehova chu a tak asi anraplui le sinthōtheina liantak a ni, Hatuka mīsiat ngāi mazōk pial nō ni. Zehova lampui chu kēllāiher le phāivuo kēng, Hatuka ansūm ngāi chu a kē thuoia philvut kēng.

⁴ Tipui chu chūnngō a thō na, a manchār, Tidung ngāi dōra a makhang kiar a. Basan lē Kārmel chu a thēm a, Lebanon pār chu a chuoi a.

⁵ Muolpui ngāi a makunga annik u, Tāng ngāi azōi u, A makunga phil chu apō a, A ni, maniapūr le havana ommun akhuor ngāi dōrā'm.

⁶ A taksitna makunga tū mo ānding thei rang? Tū mo a taksitna lum chu a diar thei rang? A taksitna chu moi anga anleia om a, Hatuka amā'n lungpui ngāi chu a khui a.

⁷ Zehova chu asa a ni, Antak lāia kulpui adet a ni, Hatuka amā'n anngampui ngāi chu a riat a.

⁸ Tenchu tiliansāng le hiva mun chu manhek phat in ti, A rāldui ngāi chu āzīngin razūl u'n ti.

⁹ Zehova dui rang imo nei mandon u? Hava ha amā'n manhek in ti. Dūknatna chu voi annina hong ānding rēt lāi nō ni.

¹⁰ Raling ankher chuok anga, Zūnēk ngāi anrī u lāi anga, Amāni chu sapon achār akāng anga kāng biang u'n ti.

¹¹ Nang ātā mī khat, Zehova chunga mandon asiat achōia suoka, Ama chu huongvārpū nemnabui a ni.

¹² Hintin hin Zehova'n a ti: “Ranak abit lē ātampā a ni ngal u nā'm, Amāni chu antana om u'n tia, Hatuka anpei biang u'n ti. Na dūk ka na lei manna ngal u nā'm, Na dūk na manna u lāi nō ning.

¹³ Atun chu na kōm ātā a rīngkol chu khiak ka ting, Nei ānkhitna chu masat ka ting.”

¹⁴ Nang na ruia Zehova'n chong a na pēk a, “Na raming a sūr ranga chi om lāi nō ni. Na pathian in ātā ānkhok ramīl lē Sutbuok ramīl chu masiat ka ting. Na thānkhur a huot ka ting, Asik chu mīsiat kēng nā ni.”

¹⁵ Entā, muolpui ngāia thangahui a hong āchōi ngāi le, Phūkdāina a hong puong ngāi kē so! O Zuda, anthang suo pāntā ngāi chu mang u ro, Na chongtin ngāi chu len ro. Asik chu mīsiatpū chu nang apala kal chōi lāi nō ni; Ama chu ansiat biang zei.