Mika 1 - Pathian Lekhabū Ānthiang

A Lekhabū Mēl Anriatna

¹ Zuda rēng Zotham, Ahaz lē Hezekia ngāi a rēng chang u lāia Moreset mī Mika kōma Zehova chongkam a hong ātung, Samaria lē Zerusalem a ruia ei mū chu.

Israel Chunga Ruirilna a Hong Ātung Rang

² Nangni mi ngāi dōra, riat u ro! O phil le asūnga om ngāi dōra, rangāi u ro! Puma chu a tempul anthiang ngēt ātā, Puma, Zehova ngēt chu Nangni aduia āriatpuipū ni rase.

³ Asik chu entā, Zehova chu ei omna mun ātā a hong āsuok so, Ama chu hong chum in tia, phila tāngsīp ansāng ngāi chu hong āchīl in ti.

⁴ Muolpui ngāi chu ama thuoia zōi u'n ti, Phāiruom ngāi chu ansensāi u'n ti, Khuoiliang moi kōla ei zōi anga, Mun ankāia tī lei ānga a ni.

⁵ Hiva ngāi dōra hi Zakob a hekhēlna sika lē Israel insūng siatna sika a ni. Zakob a hekhēlna chu imo? Samaria ni mak mo? Zuda rama tāngsīp ansāng ngāi chu hong mo ei ni? Zerusalem ni mak mo?

⁶ “Hasikhan Samaria chu phāi lāia neinun asiat anbūm lup anga sin ka ting, Theirapom rahuon thō na muna sin ka ting. Hatuka a lung ngāi chu phāiruoma bun ka ting, Abul ei ānsutna ngāi chu manlangpē ka ting.

⁷ Ama ānkhok ramīl ngāi dōra chu razīka khui nek ka ting, Nōtī ei ānzuorna man dōra chu moia anhāl zit in ti; A miramīl ngāi dōra chu pei manchang biang ka ting, Asik chu hava ngāi chu nōtī ei ānzuorna man ātā ei mantīng ngāi chu a ni, Hava ngāi ha nōtīzuorna dēna kīr rēt in ti,” a tī na.

Zuda lē Israel Ranga Chapchānna

⁸ Hasikhan anring sabaka lungnāna chap ka ting. Anlīka lē sāikoronga sē ka ting; Khoringbo anga anrām ka ting, Varīngsei anga chapanngūi ka ting.

⁹ Asik chu ei popna chu dam theilui a ni. Asik chu hiva hi Zuda a hong pha zei; Hiva hi mipui ngāi rapalsuokkhār, Zerusalem tenpei a hong āsuok zei.

¹⁰ Gat rama ril nō ro, chap pial nō ro, Bet Ofra-na philvuta na ninga anluoi ro.

¹¹ Nang Safir-a khuochuon mī, Sāikoronga anzaka na lampuia pal ro, Zanan-a khuochuon mī chu apanga suok mak. Bet-Ezel chapanngūina chu, Ei andingna mun chu na kōm ātā anlāk zei.

¹² Asik chu Marot-a khuochuon mī chu āsā a ngāka a om, Tenchu Zehova nātā vānduoina lian chu Zerusalem rapalsuokkhār tenpei a hong āchum a.

¹³ O Lakis-a khuochuon mī, Sakortolāi chu sakor anchara zom ro, Ama chu Zion nāinupang ngāi ranga siatna bul a ni, Asik chu Israel hekhēlna chu nanga han anman a.

¹⁴ Hasikhan nangin Moreset-Gat chu anthānna nuompēk ngāi pēk na ti, Akzib a in ngāi chu Israel rēng ngāi ranga milak nī'n ti.

¹⁵ Hanum ni sela, O Maresa-na khuochuon mī, Na dōngluo āluo rang pū chu na kōma la hong ruoi ka ting. Israel ei lianna chu Adullam-a lūt in ti.

¹⁶ Na nāi madit ngāi sika, Na lū mankol tānla, na sam achēp ro, Sarakurū anga na lū kol chu manzar ro, Asik chu amāni chu na kōm ātā selkeia ei sē u rang sika.