Mathāi 1 - Pathian Lekhabū Ānthiang

Isuo Khristā Khūkrachī

¹ Abraham a nāipasal David, David a nāipasal Isuo Khristā khūkrachī anziakna:

² Abraham-in Isak a nei a, Isak-in Zakob a nei a, Zakob-in Zuda lē a paruol ngāi a nei a,

³ Zuda'n Tamar ātā Perez lē Zera chu a nei a, Perez-in Hezron a nei a, Hezron-in Ram a nei a,

⁴ Ramin Aminadab a nei a, Aminadab-in Naāson a nei a, Naāson-in Salmon a nei a,

⁵ Salmon-in Rahab ātā Boaz a nei a, Boaz-in Rūt ātā Obed a nei a, Obed-in Zesāi a nei a,

⁶ Zesāi-in rēng David a nei a. Rēng David-in Uria a thāinū nātā Solomon a nei a,

⁷ Solomon-in Rehoboam a nei a, Rehoboam-in Abiza a nei a. Abiza'n Asa a nei a.

⁸ Asa'n Zehosafat a nei a, Zehosafat-in Zoram a nei a, Zoram-in Uzia a nei a,

⁹ Uzia'n Zotham a nei a, Zotham-in Ahaz a nei a, Ahaz-in Hezekia a nei a,

¹⁰ Hezekia'n Menase a nei a, Menase'n Amon a nei a, Amon-in Zosia a nei a,

¹¹ Babulon rama selkeia anruoi u lāia han, Zosia'n Zekonia lē a paruol ngāi chu a nei a.

¹² Babulon selkei ātā a hong ākīr suo u na, Zekonia'n Sealtiel a nei a, Sealtiel-in Zerubabel a nei a,

¹³ Zerubabel-in Abiud a nei a, Abiud-in Eliakim a nei a, Eliakim-in Azor a nei a,

¹⁴ Azor-in Zadok a nei a, Zadok-in Akim a nei a, Akim-in Eliud a nei a,

¹⁵ Eliud-in Eliazar a nei a, Eliazar-in Mathan a nei a, Mathan-in Zakob a nei a,

¹⁶ Zakob-in Zosef, Mari a tangsā chu a nei a, Hiva Mari nātā Isuo, Khristā ei ti u chu anzir a.

¹⁷ Hantin han Abraham ātā David tena, aloma khūk sōmleimanli a ni na, David ātā Babulon rama selkeia ānruoi tena, khūk sōmleimanli a ni na, Babulon selkei ātā Khristā tena, khūk sōmleimanli a ni.

Isuo Khristā Anzirna

¹⁸ Isuo Khristā ei ānzirna chu hintin hin a ni: a nū Mari chu Zosef le han innei ranga chong ansūk suo u na, tenchu zāmun tāngkhat a khang u māna, ama chu Rathā Ānthianga nāi a vong tīna anriat a.

¹⁹ A tangsā Zosef chu midik ei ni sika, ama chu vāntāng mitmūna māimōk asak rang zōt mak a. Hasikhan maruka āmāk ranga a mandon a.

²⁰ Tenchu, hava rui chu a mandon lāitak han, entā, Puma vānpalāi khat chu a ramanga a hong anlang a, a kōma, “David nāipasal Zosef, na thāinū ranga Mari ālāk hi āchi nō ro. Asik chu a von sūnga nāi ei vong hi Rathā Ānthiang ātā kēng.

²¹ Amā'n nāipasal mazir in tia, a raming chu Isuo phuo na ti. Asik chu amā'n a mi ngāi chu ei siat u nātā mazōk in ti,” a tī na.

²² Deari amanga Puma a chongril chu ei hong kip theina ranga, hiva ngāi dōra hi ei hong om a ni.

²³ Asik chu dearī'n hintin hin a lei tī na: “Entā, nungāk anthiangin nāi vong in tia, amā'n nāipasal mazir in ti. A raming chu Imanuel phuo u'n ti,” (Isa 7:14) A omzia chu, “Pathian koini bila om,” tīna a ni.

²⁴ Hatuka Zosef chu ei in ātā anthui a. Puma vānpalāiin a kōma chong ei ril anga a thō na, Mari chu a thāinū ranga a lāk a.

²⁵ Tenchu a nāipasal vong atontīr a mazir māseng chu, zāmun tāngkhat khangpui mak a. Hatuka nāitē raming chu Isuo a phuo na.