MARKIN 1 - Pathian Lekhabū Ānthiang

Baptispū Zohan-in Lampui a Sāt

¹ Pathian Nāipasal Isuo Khristā thangahui ei ānphutna.

² Deari lekhabūna ānziak anga, “Entā, ka palāi chu na matona ka tīr a. Amā'n na matona na lampui chu sin in ti.” (Mal 3:1)

³ “Mibuirama mī khat ānkhēk rōlin, ‘Puma lampui chu sin u ro. A lampui ngāi chu manzīk u ro,’ ” (Isa 40:3) a tī na.

⁴ Zohan chu a hong a, mibuirama baptisma a pēk a, āsia anduolna ranga ansīrna baptisma rui a ril a.

⁵ Hatuka chu Zudāi ram dōra lē Zerusalem ātā mi ngāi chu a kōma a sē u na, āsia ei thō u ngāi anpuong u na, a kōma Zordan dunga alom una baptisma a lāk u na.

⁶ Zohan chu mākingkang mul a rasil a, a kōnga mevun kōngkhit a khit a. Ama chu khāi lē ram khuoining a sāk chachak a.

⁷ Amā'n, “Ka nūka ka nēka ranakanei mī khat a lā hong. Koi chu anbūna a kekok khitna rī āsūtruo ngal ni mak ung.

⁸ Koi chu tī le baptisma ka na pēk u chachak a, tenchu amā'n Rathā Ānthiang le han baptisma na pēk u'n ti,” a tī na.

Isuo Baptisma lē Anthēmna

⁹ Hava lāi han Isuo chu Galili rama Nazaret khuo nātā a hong a, Zordan dunga Zohan a kōma baptisma a hong lāk a.

¹⁰ Tī nātā ei hong suok phingle, anvān anlong a, Rathā chu vasū anga a chunga a hong āchuma a mū na.

¹¹ Hatuka anvān ātā hē a hong āsuok a, “Nang hi ka Nāipasal madit tak nā ni. Na chunga hin achālaka ka rāi asān,” a tī na.

¹² Hava suona Rathā'n ama chu mibuirama a tīr a.

¹³ Mibuirama han Setan anthēmnāna ni 40 a om a, ramsa ngāi bila a om a. Vānpalāi ngāiin a dorbō ā dom u na.

Isuo'n a Dorbōndomna a Phut

¹⁴ Zohan ha ankhumna-ina ankhum suole, Isuo chu Galili rama a hong a, Pathian rēngram thangahui a ril a.

¹⁵ Amā'n, “Hun chu a hong ātung zei, Pathian rēngram chu a hong ānāi zei. Sīranrim u tānla, thangahui chu iam u ro,” a tī na.

Isuo'n a Zolāi Mānsa ngāi ei Pāina

¹⁶ Isuo chu Galili tīndīl kōla kal a chōi lāi han, Simon lē a paruol Andria chu tīndila lēn a dēng a, a va mū na. Amāni chu ngāsūrpū a ni u na.

¹⁷ Isuo'n a kōm u na, “Na hong zī u ro, miring asūra na sin u ka ting,” a tī na.

¹⁸ Hatuka, a lēn u ngāi chu a māk rak u na, a nūk a zī u na.

¹⁹ Hava nātā a la uola a sē na, Zebedai a nāipasal Zakob lē a paruol Zohan chu a va mū na. Amānī'm rakuonga a lēn anlianga a lei om a ni u na.

²⁰ Amānī'm a pāi len a. A pā u Zebedai chu anlō ranga ei ruoi u ngāi bila rakuonga a māk u na, ama nūk a va zī u na.

Isuo'n Ratha Sanōk Khat a Razūl

²¹ Amāni chu Kapernaum khuona a vā lūt u na, sabat nikhuona han ama chu sinagog-a a lūt a, a manchū na.

²² A mi manchūna han mi ngāi a boi a dong u na. Asik chu dānmīnchūpū ngāi anga ni luia, ningneina dōn sabak anga a manchū na.

²³ A sinagog una han raluoiin ei sūr mī khat a om a. Ama chu anringa ankhēk a,

²⁴ “Nazaret Isuo, nang le koini hong mo nei ānzomna? Koini anā pei ranga āhong mo nā ni? Tū mo nā ni ka na riat! Pathian Mi Ānthiang kēng nā ni,” a tī na.

²⁵ Tenchu Isuo'n, “Dāirek ro, asūng ātā hong suok ro,” tīna ā ngō na.

²⁶ Ratha sanōkin ama chu a khiak a, anringpāna ankhēk a, a sūng ātā a hong āsuok a.

²⁷ Alom una a boi a dong u na, “Hiva hi hong tina mo? Hong anchūna thar khat mo ei ni hi? Ratha sanōk ngāi um ningneina dōn chunga chong a pēk a, a hē a tel u na!” tīna, amāni lē amāni ankel u na.

²⁸ Galili rauopa ram tina a thang chu anthek a.

Isuo'n Peter a Tarpī ei Mandamna

²⁹ Sinagog ātā ei hong suok phing u le, Zakob lē Zohan le han, Simon lē Andria ngāi ina a vā lūt u na.

³⁰ Simon a tarpī chu rāitun atonga a lei zāl a, a rui chu Isuo kōma a lei ril len u na.

³¹ Isuo chu a kōma a hong a, a kut a sūr a, a mathui a, rāitunin a mathān len a, amāni dorbō a dom a.

Isuo'n Mī Tampā a Mandam

³² Khuluia, anī bui suole han āna ngāi dōra lē raluoiin ei sūr ngāi chu a kōma a hong ruoi u na.

³³ A khopui pumpui chu suokkhār kōla a hong ānbūm u na.

³⁴ Hatuka rikhuo ateteia āna ngāi mī tampā a mandam a, raluoi atampā a razūl a. Ama chu ei riat u sika, raluoi ngāi chu āchong ranga phal mak a.

Galili-na Isuo a Pathian Chongril

³⁵ Zīnga, khuo avār mān anthui a, apanga a suok a, mibuina muna a sē na, hava han zār a va zong a.

³⁶ Simon lē a lōm ngāiin ama chu a thūn u na.

³⁷ Ama chu a va mū u le, “Mī tinin a na rok u sole,” a ti u na.

³⁸ Tenchu amā'n a kōm u na, “Khuo tei anāi uolā'm chong kei va riltheina ranga sē u rei. Asik chu hava sik piala āhong kā ni,” a tī na.

³⁹ Ama chu Galili ram pumpuia a sinagog u ngāia han chong a ril a, raluoi ngāi chu a razūl a.

Isuo'n Āphār khat a Mandam

⁴⁰ Āphār khat chu Isuo kōm a hong a, “Nā zōt ten, na na manthiang thei,” tīna a matona mankhūk a bila a hong mathēm a.

⁴¹ Isuo'n lungkham a mū na, a kut a sōn a, a va tōn a, “Kā zōt, anthiang ta ro,” a tī na.

⁴² Ei ti suole, ei phārnā'n a māk len a, a hong ānthiang a.

⁴³ Isuo'n anrēngna chong ankhir a pēk a, a mansē len a.

⁴⁴ Amā'n a kōma, “En ro, tūtē kōma va ril nō ro. Tenchu sē tānla, chāizūng kōma vā'n en ro. Amāni kōma riatpuina ranga, Mōsi a chongpēk anga nei ānthiangna ranga dāli chu dar ro,” a tī na.

⁴⁵ Tenchu, ama chu a suok a, hava thang ha tāng a vā hāi a, a vā thek a. Hasikhan Isuo chu khopuia han anlangpuma lūt thei lāi mak a. Tenchu apanga mibuina muna a vā om a. Mun tin ātā mi ngāi chu a kōma a hong u na.