Malaki 1 - Pathian Lekhabū Ānthiang

¹ Malaki amanga chongpuong, Israel ngāi ranga Zehova chongkam chu:

Pathianin Israel ei Āditna

² “Ka nā dit u na,” Zehova'n a ti. Hanum nangnī'n, “Hontin chang mo nangnī'n koini nei nā dit,” na ti u na? “Esau ha Zakob a paruol ni mak mo? Zehova'n a ti. Hanum Zakob chu kā dit a.

³ Tenchu Esau chu ka mūmāk a, A muolpui ngāi chu peianchang a, A chang-āi chu mibuiram khoringbo ngāi ka pēk a,” a ti.

⁴ Edom-in, “Nei omna a siat biangā'm, tenchu hong kīr rēta, āchiam ngāi chu hong buok in ti,” a lei ti ngalā'm, Āthōtheikiarpū Zehova'n hintin hin a ti: “A hong buok u thei a, Tenchu masiatpē u ka ting. Amāni chu ‘nunsiatnā ramopbāk’ tīna anpāi in ti, ‘A chung una Zehova taksitna chu kumkhuona ei omna mi ngāi’ antī'n ti.

⁵ Na mit u'n la mū'n tia, ‘Israel ramrī khēla Zehova chu anliana a om,’ la ti u'n na ti.”

Puma Lalchi ei Thō u nōkna

⁶ “Nāipasalin a pā rang lalchi a thō na, Suokin a puma rang lalchi a thō na. Koi hi Pā kā ni ten hon tiang mo ka lalchina ei om? Puma kā ni ten hon tiang mo kei āntonna ei om? Nangni chāizūng ka raming peidar asak ngāi, na kōm una koi, Āthōtheikiarpū Zehova'n ka ti. “Hanum nangnī'n, ‘Hontin chang mo na raming peidar nei sakna?’ nei ti u.

⁷ Ka māichāma sāk ānnim dāli a dar a. “Tenchu nangnī'n, ‘Hontin chang mo koinī'n nei na mannim?’ nei ti u. ‘Zehova dōkham chu antīr aruoi,’ tīna na mannim u na.

⁸ “Anbōlna ranga āchō dāli nei dar u ha, āsiat ni mak mo? Ākhor lē āna dāli nei hong dar u ha, āsiat ni mak mo? Hava ha na ramoppū va pēk u ta! Na chung una a rāisān ni mo? Rāisān taka na lei pom u ni mo?” Āthōtheikiarpū Zehova'n a ti.

⁹ Koini chunga lungkham ei na mūna ranga, Pathian lungkhamna zong u ro. “Na kut u nātā hiva anga dālī hi, rāisān taka na pom thei u ni mo?” Āthōtheikiarpū Zehova'n a ti.

¹⁰ “Akoronga ka māichāma moi ei ānhāl nōkna ranga, na kār una suokkhār ākhār ranga tū mo ā om? Na chung una phāmna rēng dōn mak ung,” Āthōtheikiarpū Zehova'n a ti. “Na kut una neinun andar um pom nō ning.

¹¹ “Anī ei suok ātā ei lūt tenpei, Namtei ngāi kāra ka raming chu anliana om in ti. Mun tina ka raminga marimhui andar in ti, Dāli anthiang um andar in ti. Asik chu ka raming chu nam tin kāra anliana om in ti,” Āthōtheikiarpū Zehova'n a ti.

¹² “Tenchu, ‘Zehova dōkham chu ānnim kēng, hivana theimarā lē nēksāk ngāi um antīr aruoi kēng,’ tīna hava ha nangnī'n na mannim u na.

¹³ Nangnī'n, ‘Hontina chāmsōlanvoina mo hi!’ na ti u na, na nār nei āthing u,” Āthōtheikiarpū Zehova'n a ti. “Nangnī'n ānruk, ākhor lē ānā, hiva ang dāli nei hong chōi u! Na kut u nātā hiva hi lei pom ning mo?” Zehova'n a ti.

¹⁴ “Tenchu āhuongpū chu khomāk tung rase, a ranruol bila atang a dōn uoma, khomāk ansama, tenchu Zehova kōma dem akāi ei hong dar sika. Asik chu rēng alian kā ni. Ka raming chu nam tin kāra anchiruo kēng,” Āthōtheikiarpū Zehova'n a ti.