LUKIN 1 - Pathian Lekhabū Ānthiang

Chongmaruoina

¹ Koini kāra rui a hong ātung, rachi ngāi adōntēna ānziak ranga mi tamtakin a lei pūt u na.

² Aphut len ātā mita āmū ngāi lē Pathian chong dorbōndom ngāiin koini kōma ei na betōk u anga,

³ O Theofila lalchiruoi tak, aphut len ātā asadima rachī kei thūn ngāi chu, koiin um na kōma adōntēna ānziak hi asa ka tī na.

⁴ Hankēng anchūna na lei man ngāi chu ādik ti nei riattheina rang.

Vānpalāiin Baptispū Zohan ei Ānzirna rang Rui a Puong

⁵ Zudāi rama rēng Herod a hunlāia, Abiza raphom mi chāizūng khat a om a, a raming chu Zakaria a ni. A thāinū chu Aron a khūka mī a ni, a raming chu Elizabet a ni.

⁶ Aninī'n u chu Pathian mitmūna midik a ni u na, Puma chongpēk ngāi lē a dānphun ngāi dōra chu demnābuia a zī u na.

⁷ Tenchu Elizabet chu āching ei ni sika nāi nei u mak a, āninī'n u chu akum atam sabak a ni u na.

⁸ Zakaria chu a raphom u dōn a chuk lāi a, a chāizūng sin chu Pathian makunga a thō lāi han,

⁹ Chāizūngnīna dān anga, Puma tempula alūta marimhui āhāl ranga, sema-ena a dōn a chuk a.

¹⁰ Marimhui a hāl lāitak han, mipui ngāi dōra chu apanga zār a lei zong u na.

¹¹ Puma vānpalāi khat, marimhui hālna māichām chang tiang andinga a kōm a hong anlang a.

¹² Zakaria'n ama chu ei mū le anlāirak a, ā chi sabak a.

¹³ Tenchu vānpalāiin a kōma, “Zakaria ā chi nō ro, asik chu na zārzongna chu anriata om zei. Na thāinū Elizabet ha nāipasal mazir in tia, a raming chu Zohan phuo na ti.

¹⁴ Nang chu phāma na rāisān in ti. Ama ei ānzir sika mi tamtak a rāisān in ti.

¹⁵ Asik chu ama chu Puma mitmūna lian in tia, theirapomningtī lē rakzū nēk pial nō ni. A nū tekok len ātā Rathā Ānthiang abita om in ti.

¹⁶ Amā'n Israel mi ngāi tamtak chu Puma a Pathian u kōma hong makhīr rēt in ti.

¹⁷ Hatuka pā ngāi malung chu nāi ngāi tianga ei makhīrna rang lē, hetellui ngāi chu midik hianna tianga ei makhīrna ranga lē, mi ngāi chu Puma ranga ansina lē ansūk vang ranga, ama chu Eliza rathāna lē sinthōtheināna Puma matona sē in ti,” a tī na.

¹⁸ Zakaria'n vānpalāi kōma, “Hontin mo kei riat rang? Kā tar zei a, ka thāinū'm akum a tam zei a,” a tī na.

¹⁹ Vānpalāiin a masang a, a kōma, “Koi hi Gabriel kā ni, Pathian makunga ānding chachak kā ni. Nang anā chongpui rang lē hiva thangahui ngāi anā'n tung ranga a hong āntīr kā ni.

²⁰ Entā, ka chongkam ngāi ahun taka ei hong tung rang nei iam nōk sika, nang chu hiva ngāi a hong ākip māseng chongkuluia lē chongtheilui om in na ti,” a tī na.

²¹ Mipuiin Zakaria chu a lei ngāk u na. Tempul sūnga ei sōt sika a boi a dong u na.

²² A hong āsuok le chu amāni chu chongpui thei lāi mak a. Kut le ei pāi a, chongtheilui ei om sika, amānī'n tempul sūnga anlārna ei mū kēng tī a riatthei u na.

²³ A dorbōndomna hun a hek le chu a ina a sē na.

²⁴ Hava nikhuo ngāi suole han, a thāinū Elizabet chu nāi a vong a, ama chu tha rangā anthup a.

²⁵ Amā'n, “Mi ngāi kāra ka muolphuina ei na lākpē na ranga, hiva huna Pumā'n a na en a, ka chunga hintin hin a na lōt a,” a tī na.

Vānpalāiin Isuo ei Ānzirna Rang Rui a Puong

²⁶ Thā ruk changna han Pathianin vānpalāi Gabriel chu Galili rama Nazaret khopuia,

²⁷ David a khūka pasal khat a raming Zosef a ranga ānbiak suo nungāk ānthiang kōma a tīr a. Hava nungāk ānthiang raming chu Mari a ni.

²⁸ Vānpalāi chu a kōma a hong a, “Na rāi mansān ro! Ditbingna āchang bīk! Puma chu na kōma om. Nang chu nupang ngāi kāra bōrsāng atung kēng nā ni,” a tī na.

²⁹ Tenchu ama chu ei mū na, a chongril ngāia anpōn sabak a. Hong chubai būkna mo tīna a mandon a!

³⁰ Hatuka vānpalāiin a kōma, “Mari, na rathā manta nō ro. Nang chu Pathian ditbingna āchang kēng nā ni.

³¹ Entā, na tekoka nāi vong in na tia, nāipasal khat mazir in na ti. A raming chu ISUO phuo na ti.

³² Ama chu milian hong nī'n tia, ānsāng khīt Nāipasal tīna anpāi in ti. Puma Pathianin a pā David a chōmphāng chu pēk in ti.

³³ Zakob a insūng chunga tāituona ruiril in ti. A rēngram chu ei hekna om nō ni,” a tī na.

³⁴ Mari'n vānpalāi kōma, “Hiva hi hontin mo ei ni thei rang? Pasal ngal la riat mak ung?” a tī na.

³⁵ Vānpalāiin a kōma a masang a, a kōma, “Rathā Ānthiang chu na chunga hong in ti. Ānsāng khīt rātnā'n na hong dūng in ti. Hasikhan, a hong ānzir rang mī ānthiang ha Pathian Nāipasal anti in ti.

³⁶ Entā, na ūnāi Elizabet um atar suo nūka nāipasal a vong a. Āchingnū anti chachak hā'm atun hin thā ruk changna a ni zei.

³⁷ Pathian ranga ītē ni theilui om nō ni,” a tī na.

³⁸ Hankēng Mari'n, “Entā, Puma suoknū kā ni, na chong anga ka chunga hong tung rase,” a tī na. Hatuka vānpalāiin a māk a.

Mari'n Elizabet a Va Pan

³⁹ Hava lāi han Mari chu anthui a, tāngrama Zuda khopuia khata anrapa a sē na.

⁴⁰ Zakaria a ina a vā lūt a, Elizabet chu chubai a va būk a.

⁴¹ Elizabet-in Mari chubai būk ei riat le, a tekoka nāitē chu antōm a. Elizabet chu Rathā Ānthianga a bit a.

⁴² Ama chu anringpāna ankhēk a, “Nupang ngāi kāra bōrsāng atung kēng nā ni. Na tekoka mara chu bōrsāng atung kēng.

⁴³ Ka Puma a nū ka kōma ei honga hin hotuk rāvān asa mo kei ānlō hi?

⁴⁴ Entā, nei na phāmna chong ka kuor ngāiin ei riat le, ka tekoka nāitē chu rāisāna antōm a.

⁴⁵ A lei iamnū chu bōrsāng atung kēng, asik chu Pumā'n a kōma chong ei ril ngāi chu la hong kip in ti,” a tī na.

Mari'n Anpākna La Thō

⁴⁶ Mari'n, “Ka nunnā'n Puma a manpāk.

⁴⁷ Ka rathā chu ka Sandampū Pathiana a rāi asān a.

⁴⁸ A suoknū ei ānnuoizia chu a poisak a. Entā, atun ātā akhūk akhūka bōrsāng atungnū na ti u'n ti.

⁴⁹ Asik chu Ranakaneipū'n ka ranga sin alianpā ngāi thōpē na. A raming chu Ānthiang a ni.

⁵⁰ Ama ānchi ngāi chunga A lungkhamna chu akhūk akhūka āom kēng.

⁵¹ A bān le ei rātna a manlang a. A malung mandona chongpākansal ngāi chu ā thek rak a.

⁵² Ranakanei ngāi chu a chōmphāng ātā a masum a. Ānnuoi ngāi chu a mansāng a.

⁵³ Ānchām ngāi chu neinun asa le a mankhop a. Ānchong ngāi chu kut koronga a mansē na.

⁵⁴ Ama a lungkhamna riattitna ranga, A suok Israel chu a san a.

⁵⁵ Koini na pā ngāi kōma, Abraham lē a chi ngāi kōma tāituona a lei ril anga han,” a tī na.

⁵⁶ Mari chu Elizabet a bila thānthum tāng a om a. Hatuka a ina a kīr a.

Baptispū Zohan ei Ānzirna rui

⁵⁷ Elizabet chu nāi ei nei hun a hong āsuok a, nāipasal a mazir a.

⁵⁸ Ama chunga Pumā'n a lungkhamna alian sabaka ei manlang tī chu a inkōlmī ngāi lē a ūnāi ngāiin a riat u le chu, a rāi a mansānpui u na.

⁵⁹ Hintin hin a ni, nī riat changnāna, nāitē sertan ranga a hong u na. A pā raming anputa a raming chu Zakaria tīna a phuo rang a zōt u na.

⁶⁰ Tenchu a nū'n, “Ni mak, a raming chu Zohan kēng ei ānti rang,” a tī na.

⁶¹ Tenchu amānī'n a kōma, “Na ūnāi ngāi bila tūtē hiva raming anphuo om mak!” a ti u na.

⁶² A pā'n hong raming mo ei phuo zōt tī riatna ranga a kut le a chongpui u na.

⁶³ Amā'n anziakna lungpēk khat a zong a, “A raming chu Zohan,” tīna a maziak a. A boi a dong kiar u na.

⁶⁴ Anlāiseka a mūr anlongpē na, a malei sīngansapē len a, a hong āchong a, Pathian a manpāk a.

⁶⁵ Akōl akianga āom ngāi dōra chu a rathā a ta u na. Zudāi tāngram pumpuia hiva rui chu anril susup a.

⁶⁶ Hiva rui āriat dōrā'n a malunga, “Hiva nāitē hi imo mo hong chang ni?” a ti u na. Puma kut chu a chunga om kēng.

Zakaria'n Anpākna La a Thō

⁶⁷ A pā Zakaria chu Rathā Ānthianga a bit a, dēchong a ril a,

⁶⁸ Amā'n, “Puma, Israel ngāi Pathian chu anpāka om rase. Asik chu amā'n a mi ngāi ei hong kan a, a hong ratan a.

⁶⁹ Amā'n a suok David a insūnga, Koini na ranga sandamna raki a masuok a.

⁷⁰ Maniapūr ansiang len ātā a deari ānthiang Ngāi mūr amanga a lei puong anga.

⁷¹ Koini na rāldui ngāi lē a nā'n Mūmāk ngāi dōra kut ātā nei zōkna ranga.

⁷² Koini na chipui ngāi kōma a lungkhamna a lei tin ānlang ranga Lē a dānkhit ānthiang chu ei riattitna rang.

⁷³ Khomāk ansama, koini na chipui Abraham kōma chong a lei tin chu,

⁷⁴ Na rāldui ngāi kut ātā ei na mazōk a, Anchina buia a dorbō nei ādom theina ranga na phal in ti.

⁷⁵ Na damsūnga anthianga lē adika a makunga a dorbō nei ādom theina ranga.

⁷⁶ Nang, nāitē, Ānsāng khīt deari anti na ti. A lampui ngāi āsin ranga Puma matona lei sē na ti.

⁷⁷ Ei siat una anduola, A mi ngāi chu sandamna ruia anriat ranga.

⁷⁸ Koini na Pathian lungkhamsāltī zāra Chung ātā ni suokin a na hong kan a.

⁷⁹ Azīng kāra lē thīna ralīma ānsut ngāi chu raāng āpēk ranga. Phūkdāina lampuia koini na ke kal anchōi ranga,” a tī na.

⁸⁰ Nāitē chu a hong ālian a, rathāna a hong ārāt a. Israel ngāi kōma ei ānlangna nikhuo a suok māseng chu mibuirama a om a.