Isaia 1 - Pathian Lekhabū Ānthiang

¹ Amoz a nāipasal Isaia'n, Zuda rēng ngāi, Uzia, Zotham, Ahaz lē Hezekia ngāi hunlāia, Zuda lē Zerusalem a ruia anlārna ei mū chu a ni.

Zuda ngāi Siatna

² O anvān ngāi, rangāi u ro, O phil, na kuor sung ro! Asik chu Zehova'n a ti: “Ka nāi ngāi chu kei vāi a kei manlian a ni, Tenchu amāni chu koi aduia a sel u na.

³ Sarāttangin a puma a riat a, Sakuorparin a pū burakuong a riat a, Tenchu Israel-in riat mak a, Ka mi ngāiin riattheina reng dōn u mak.”

⁴ Ohoi, nam asiat, siatna ābit mi ngāi, Asa nōk athō khūk ngāi, Diklui taka sin a thō chachak sanāi ngāi! Amānī'n Zehova chu sūlkiang a heng u na, Amānī'n Israel ngāi Ānthiangpū chu a sumdem u na, Nūksīr a son u na.

⁵ Hong sik mo anrazīka nei om rēt u rang? Nei la sel chian u rang mo? Lū pumpuia na zei, Malung pumpuia chuoi zei.

⁶ Kephā nātā lusīp tenpei ei damna mun om lāi mak, Liamna ngāi, āndul nūk ngāi lē sābē khir ngāi, Hava ngāi chu anhīpa anthuom mak a, Sariak lē'm antuoi mak a.

⁷ Na ram ngāi chu aram biang zei, Na khopui u ngāi chu moi le anhāl biang zei, Na ram u ngāi chu ramtei mi ngāiin Na makung una a sāk hiam u zei, Ramtei mi ngāiin ei rūn anga aram biang zei.

⁸ Zion sānū chu theirapom rahuona bokrop anga, Sakma rahuona inchū anga, Rālduiin ei āhuol khopui anga anmāka a om a.

⁹ Āthōtheikiarpū Zehova'n Amaniang alaktē na mākpē nō sela chu, Koini chu Sodom anga ni zei ma ni ba, Koini chu Gomora anga ni zei ma ni ba.

¹⁰ Nangni Sodom āvongpū ngāi, Zehova chongkam chu rangāi u ro. Nangni Gomora mi ngāi, Koini na Pathian ei manchūna ngāia na kuor sung u ro.

¹¹ Zehova'n a tī: “Ka kōma nei ānbōl una ātampā hi Hong mo kei lōt rang? Koiin beratang hālbiang dāli lē Ranvāi athāi ngāi chu kā dōn lup a. Koiin sarāttang mo ole beratē mo ole, Kēl ngāi thisen chu phām mak ung.

¹² “Ka matona ānlang ranga nei hong una hin, Ka tuomāi ānthin ranga, Tū mo a na zong u?

¹³ Omzebui dāli ngāi hong chōi u lāi nō ro, Marimhui hi ka ranga antīrruo kēng. Thā thar, sabat lē khōmpui āpāi, Masialna lē khōmpui anthiang hi diriei thei mak ung.

¹⁴ Na thā thar lē anthang suo pānta ngāi chu Ka nunnā'n a mūmāk. Hiva ngāi hi ka lupuok a hong āchang, Hiva ngāi āpēl chu kā pōng zei.

¹⁵ Na kut na phar u tikle, Nangni nātā ka māi thup ka ting; Zār na zong lup u nā'm, Na rangāipē u nō ning. Na kut u ngāi chu thisen a bit kēng.

¹⁶ Na ning una ansūk u tānla, anthiang u ro. Ka mit makung ātā na sinthō salui u ngāi chu khāi u ro. Āsiat sin āthō mong u ro.

¹⁷ Sin āsā thō hi anchū u ro; Ādik chu ārok u ro, Ānpēngsōmpū chu chūnngō thō u ro, Pābui ngāi chunga ruirilnadik mang u ro, Arōng chu san u ro.

¹⁸ “Hong u tānla, lōkōna mandon u rei, Zehova'n a tī. Nei siat una ngāi chu senlār anga a ni ngalā'm, Sūmtang anga lang in ti. Senduk anga asenā'm, Beramul anga nī'n ti.

¹⁹ Nā zōt u na, na tel u ten, Ram marā āsā chu sāk u na ti.

²⁰ Tenchu na heng a, nā sel u ten, Khendāiin nā vol u'n ti, Asik chu Zehova mūrin ei tī a ni.”

Khopui Mi ngāi Nunsiatnā

²¹ Iamruo khopui chu hontin mo nōtizuor ei hong nī'n zei! Ama ha ruirilnadik ābit a ni. Amāna han dikna ommun a khuor a, Tenchu atun chu mīthatpū kēng a om a ni zei.

²² Na sumrū chu thīr-ēksia kēng a ni zei, Na theirapomningtī chu tī'n pol kēng a ni zei.

²³ Na milian ngāi chu asel u na, Anru ngāi lōm a chang u zei. Mi tinin sumzīk ā dit u, Rātpāk ngāi a razūl u. Pābui ngāi chunga ruirilnadik thō u mak, Arōng ngāi rui um poisak u mak.

²⁴ Hasikhan Puma, Āthōtheikiarpū Zehova, Israel-a Mi Ranakaneiin hintin hin a ti: “Uf, ka rāldui ngāi ātā ka ninga zōk ka tia, Ka rāldui ngāi chu phubā lāk ka ting.

²⁵ Ka kut chu nangni aduia thāk ka ting, Na thīr-ēksia ngāi chu mansāi ka ting, Na thīrpol dōra rathial ka ting.

²⁶ Aphāmāna anga han na ruirilpū ngāi chu man-om rēt ka ting, Na huongvārsakpū ngāi chu aphuta anga han. Hava suona han dikna khopui, Iamruo khopui tīna anpāia om na ti,”

²⁷ Zion chu ruirilnadik lē anratana om in ti, Ansīra a hong ākīr ngāi um dikna le anratana om in ti.

²⁸ Ānsialpū ngāi lē mīsiat ngāi chu munkhata siat biang u'n ti, Zehova āheng ngāi chu siat bianga om u'n ti.

²⁹ Asik chu na ningōl basār kung ngāi sika amāni chu anzak u'n ti. Nei āthang rahuon ngāi sika anzaka om na ti.

³⁰ Asik chu nang chu basār buo ei chul chachak anga ni na ti, Tī bui rahuon anga ni na ti.

³¹ Ranakanei chu moi kāina anga nī'n ti, A sinthō chu moi chuongzap ang nī'n ti, Āninī'n u chu munkhata kāng u'n ti, Tūtē'n a that thei om u nō ni.