Hosea 1 - Pathian Lekhabū Ānthiang

Chongmaruoina

¹ Zuda rēng ngāi Uzia, Zotham, Ahaz, Hezekia hunlāia lē Israel rēng Zoas a nāipasal Zeroboam a hunlāia Beēri a nāipasal Hosea kōma Zehova chongkam a hong ātung ha a ni.

Hosea a Thāinū lē a Nāi ngāi

² Hosea amanga Zehova'n chong aril a phut han, Zehova'n Hosea kōma: “Sē tānla nōtizuor thāinū va lāk ro, hatuka nōtizuor le han nāi nei ro, Zehova kōm ātā a lei ānkhāi u sika, ramin uirēna lian sabak a lei thō na,” a tī na.

³ Hantin han a sē na Diblaim a nāinupang Gomer chu a va lāka, ama chu anrāi a, ama ranga nāipasal a nei a.

⁴ Hatuka Zehova'n a kōma, “A raming chu Zezreēl (Pathianin ei ling) phuo ro, asik chu hun sōtluitē sūnga Zezreēl a thisen masuokna sika, Zehu a insūng chunga phubā lāk ka ting, Israel insūng rēngram chu hong manhek ka ting.

⁵ Hava nikhuo tik chu hintin hin hong nī'n ti, Zezreēl phāiruoma han Israel ngāi thalper chu khiak ka ting,” a tī na.

⁶ Amā'n nāi avong rēt a, nāinupang a nei a. Hatuka Zehova'n a kōma, “A raming chu Lo-Ruhama (lungkhamna man lui) phuo ro, asik chu Israel insūng chunga lungkham kei mū lāi nōk rang sika. Tenchu amāni chu alom una lāk rīt u ka ting.

⁷ Hanum ni sela, Zuda insūng chunga chu lungkham mū ka ting, amāni chu Zehova a Pathian u amanga mazōk u ka ting, koiin amāni chu thal sāilī le mo a ni ole, khendāi le mo a ni ole rālkāp le mo a ni ole, sakor le mo ole sakorpu ngāi le mo mazōk nō ning,” a tī na.

⁸ Hantin han amā'n Lo-Ruhama chu ranū a manngoi le chu, nāi a vong a, nāipasal a nei a.

⁹ Hatuka Zehova'n, “A raming chu Lo-Ami (ka mī ni lui) phuo ro, asik chu nangni chu ka mi ngāi ni u mak chē, koi um na Pathian u ni mak ung,” a tī na.

Israel Anding Tharrētna

¹⁰ “Tenchu Israel ngāi ei tamzāt chu tipui siatsāi ei tam anga nī'n ti, a māi phāsam le atel phāsam nī'n ti. Hatuka hintin hin hong nī'n tia, ‘Nangni chu ka mi ni u mak chē,’ ei antina muna han, hava muna han, ‘Nangni chu Pathian adam nāipasal ngāi kēng nā ni u,’ anti in ti.

¹¹ Hatuka Zuda nāi ngāi lē Israel nāi ngāi chu munkhata anbūm u'n ti, amāni a ning una ruoipū khat phun u'n ti, hava ram ātā hong suok u'n ti, asik chu Zezreēl anikhuo chu lian sabak in ti.”