Hebrāi 1 - Pathian Lekhabū Ānthiang

Vānpalāi ngāi Nēka Nāipasal Alian

¹ Tianlāi han hun ateteia, lampui ateteia koini na chipui ngāi kōma deari ngāi amanga Pathianin chong a lei ril a ni.

² Hiva nikhuo aheka hin a Nāipasal amanga koini kōma chong a ril a. Ama chu alompei chunga dōngluopūna ā ruot a. Ama zāra maniapūr um ei sin a ni.

³ Ama chu Pathian lianna raāng lē ama ramīl āphuozek a ni. A sinthōtheina chong le han alompeia amā'n ei madōm kiar a ni. Amā'n koini masial ngāi dōra a mansāi suole han chung ansānga Ālian khīt a chang tianga a vā'n sut a.

⁴ Ama chu vānpalāi ngāi nēka ālian ei ni sika amāni nēka raming ahui ei raput a ni.

⁵ Asik chu Pathianin vānpalāi ngāi kāra tū kōm mo hiva chong hi ei la ril, “Nang chu ka Nāipasal nā ni. Avian ka na mazir zei.” (Sām 2:7) Hatuka, “Ama a Pā chang ka ti, Ama chu ka Nāipasal chang in ti,” (2Sa 7:14; 1Kh 17:13) a ti rēt a.

⁶ Hanūk chu a nāipasal atontīr maniapūra a hong tīr rang lāi han, amā'n, “Pathian vānpalāi ngāi dōrā'n ama chu a mōk u rase,” (Dān 32:43) a tī na.

⁷ Vānpalāi ngāi ruia amā'n, “Amā'n a vānpalāi ngāi chu rathāna a sin a, A dorbōndom ngāi chu moidona a sin a,” (Sām 104:4) a tī na.

⁸ Tenchu Nāipasal kōma, amā'n, “O Pathian, na chōmphāng chu tāituon tāituon tenpei kēng. Na rēngram rēngsunrol chu dikna rēngsunrol a ni.

⁹ Nangin dikna chu nā dit a, siatna chu na mūmāk. Hasikhan Pathian, na Pathianin rāisānna sariak le han Na lōm ngāi nēka han lāisā ei na mankhēr a ni,” (Sām 45:6-7) a tī na.

¹⁰ Hatuka, “O Puma, nangin aphuta han phil bulsutna chu na lei phun a. Anvān ngāi hi na kut sinthō a ni.

¹¹ Hava ngāi chu anpei in tia, tenchu nang chu om na ti. Hava ngāi chu raliang anga anruo u'n ti.

¹² Puon anga a zuol in na ti, Hava ngāi chu anthūl u'n ti. Tenchu nang chu amun bang ni na ti. Na kum ngāi chu hek pial nō ni,” (Sām 102:25-27) a tī na.

¹³ Tenchu hova vānpalāi ngāi kōma mo Pathianin, “Na rāldui ngāi chu pātalunga ka sin māseng, Ka chang tiang ansut ro,” (Sām 110:1) ei la ti?

¹⁴ Vānpalāi ngāi hi tū mo? Hiva ngāi hi ratha dorbōndom ngāi a ni u na. Amāni chu sandamna āluo ngāi rang dorbōndom ranga Pathian tīr a ni u na.