Filemon 1 - Pathian Lekhabū Ānthiang

Chubai Thōna

¹ Paul, Khristā Isuona ānkhit le ka paruol Timothi'n, na mal madit lē na sinthōpui Filemon a kōma lē,

² koini na ūnāi andit Apfia lē, na sipai changpui Arkipa kōma lē na ina kuibing ankhōm ngāi kōma:

³ Pathian, koini na Pā lē Puma Isuo Khristā lungkhamna lē phūkdāina na kōm una om rase.

Filemon Anditna lē Iamna

⁴ Ka zārzongnāna na raming kei china kei na riattit u chachak anga hin ka Pathian kōma rāisānna chong ka mantung babanga.

⁵ Asik chu Puma Isuona nei iamna rui le mīnthiang ngāi dōra takchunga na mi maditna rui ha ka lei riat chachak a.

⁶ Khristā Isuona koinīna a sin asa tin rēng riattheina dōn amanga, nei iamna nei ānsempuina chu sinthōtheia ei om theina ranga, zār ka zong.

⁷ Ka paruol, na mi maditna le hin achālaka rāisānna le lungngamna nei man a ni, asik chu nang na sika mīnthiang ngāiin malung harna ei man u a ni.

Paul-in Onesima Ranga ei Mathēmna

⁸ Hasikhan nang nei thō rang tuk sin nei thō thei ranga chong a na pēk theina khop Khristā-na anngamna a dōn kā nī na.

⁹ Hanum ni sela, anditna sika hin koi Paul ātar tak, atun tenā'm Khristā Isuo sika ankhum nei na riat chunga kei na hong mathēm a, kei na zong a ni zei.

¹⁰ Ankhumna-ina kā om lāia nāipasal kei nei, Onesima ranga na kōma kei na hong mathēm a, kei na zong a ni zei.

¹¹ Māna han na ranga ei nemnabui a ni, tenchu atun chu nang lē koi ka ranga ānem sabak kēng a ni zei.

¹² Ka malung thungna khīt, ama hi na kōm dēna ka hong tīr rēt zei. Na lei pompē ro.

¹³ Ama hi ka bila a dōn chian ranga kei zōt a ni, asik chu thangahui sika kei ānkhuma hin amā'n nang na rathūla ka dorbō a na dompē sabak thei a.

¹⁴ Tenchu nang nei phalna anchelluia ītē ti zōt mak ung a, asik chu hava sin āsa ha nei thō khakhak rang na ti mak ung a, tenchu nang na malung sūng ātā nei zōt anga nei thō chang rase.

¹⁵ Atuna hun atōmtē ranga na kōm ātā ei rot hi tāituona nei man rētna ranga a ni thei a.

¹⁶ Suok anga ni lāi mak, tenchu suok nēka paruol andit anga, aliaktēna koi ka ranga, ama chu ka ranga andit aruoi a ni, nang na rang vāng chu taksa tianga le Puma tianga paruol andit anga nei man rēt theina rang a ni.

¹⁷ Hasikhan koi na lōm changpui anga na na bē ten, koi nei na phām anga hin amā'm lei phām ro.

¹⁸ Hanūk chu na chunga masial ei thō mo a om ole hong mo ei āntāng mo a om hava ngāi ha chu koi kei āntāng anga na bēpē ro.

¹⁹ Koi Paul-in hiva ngāi hi ka kut ngēt le kei hong maziak a ni, koi ngētin na thuon ka ting. Tenchu nang na pum len hi ka kōma nei āntāng rui chu aril lelē rang zōt mak ung.

²⁰ Ka paruol andit, Puma matona na kōm ātā alaktē luo chu rāisānna āman ranga kei phām a ni, Pumāna hin ka malung chu na manharpē ro.

²¹ Hē nei tel thei zia ka riat a, achālaka kā'n ngam a, hasikhan koiin kei ril ngāi nēka hin atam vura thō'n na ti kei riat sika, na kōma kei maziak a ni.

²² Hanūk angkhat rēt chu, kei tungna rangin khat na lei mansūkpē ro, asik chu na zārzong una zāra na kōm una a na hong āpan len thei ranga kā'n iam a.

Chongbē Hekna

²³ Khristā Isuo sika kei ānkhitpui Epafra hān chubai a na hong thō u.

²⁴ Havan tin dēn han ka sinthōpui ngāi Mark, Aristarka, Dema, Lūk ngāiin um chubai a na hong thō u.

²⁵ Koini na Puma Isuo Khristā lungkhamna chu na rathāna om rase. Amen.