Ezra 1 - Pathian Lekhabū Ānthiang

Babulon Selkei Hekna

¹ Pārsia rēng Kores ei vong kum khatnāna han, Zeremia a mūr amanga Zehova chongkam chu ei hong kip theina ranga, Zehova'n Pārsia rēng Kores a rathā chu a mathor a, a rēngram pumpuia a manpuong a, hava ha anziakā'm a siak a:

² Pārsia rēng Kores-in hintin hin a ti: Zehova vān Pathianin phila rēngram ngāi dōra chu ka kōm a na pēk a. Zuda rama Zerusalem-a han a in āsin ranga chong a na pēk a.

³ Nangni a mi ngāi dōra kāra tū mo ā om? A Pathian chu a bila om sela, Zuda rama Zerusalem-a sē rase, Zerusalem-a Zehova Israel ngāi Pathian in chu va sin rase. (Ama hi Pathian a ni).

⁴ Tūkareng ommun ei khuorna mun angkhat peia anmāka alā om ngāi chu, ei om una muna mi ngāiin Zerusalem-a om Pathian in ranga nuompēk dāli panga sumrū, rāngkachak, neinun lē ranvāi le han san rase. a tī na.

⁵ Hatuka Zuda lē Benzamin insūng lusi ngāi, chāizūng ngāi lē Levi mi ngāi, Zerusalem-a Zehova in āsin ranga, Pathianin a malung ei mathor ngāi dōra chu anthui u na.

⁶ Rāisān taka neinun ei pēk u ngāi panga, a ravēla om mi ngāiin sumrū le ansin tinratuo, rāngkachak, neinun, ranvāi le neinun alu amanga a kut u chu a manrātpē u na.

⁷ Rēng Kores-in um, Nebukadnezar-in Zehova ina neinun Zerusalem ātā ei hong chōia, a pathian ngāi ina ei siak ngāi chu a rasuo na.

⁸ Hava ngāi chu Pārsia rēng Kores-in sum āvongpū Mithredat a kut amanga a hong rasuo na, hava ngāi chu a tel a, Zuda milian Sesbazar a kōma a betōk a.

⁹ Ei tamzāt chu hiva dōr hi a ni: Rāngkachak khēng 30, Sumrū khēng 1,000, Chemtē 29,

¹⁰ Rāngkachak bāngtok 30, Sumrū bāngtok hava ang dēn 410, Tinratuo atei 1,000.

¹¹ Rāngkachak lē sumrū tinratuo dōra chu 5,400 a ni. Selkei ngāi chu Babulon ātā Zerusalem-a a hong ruoi lāi han Sesbazar-in hiva ngāi dōra hi ei hong chōi sā a ni.