Esther 1 - Pathian Lekhabū Ānthiang

Rēng Pāntā

¹ Ahasveros a rēng chang lāi han hintin hin a hong ānī na. Ahasveros chu India ram len ātā Ethiopia ram tenpeia ram 127 ramzobāk a vong a ni.

² Hava lāi han rēng Ahasveros chu a rēngram Susa rēngin a chōmphānga ansuta rui ei ril a ni.

³ A rēng changna kum anthum kāina kum han a milian ngāi dōra lē a suok ngāi dōra ranga nēksāk pāntā khat a thōpui a. Pārsia rama lē Media rama ningneina dōn ngāi, milian ngāi lē a ramzobāka ramoppū ngāi dōra chu a matona a om u na.

⁴ A rēngram anlianna ei ānchongzia lē a rēng changna ei ānlianna ei satzia chu nikhuo sōtpā, ni 180 a manlang a.

⁵ Hava nikhuo ngāi a theng suole han, rēngin Susa rēng-ina āom miring āsīn lē ālian aloma ranga, rēngin rahuon tuomāia ni sari nēksāk pāntā a manthō na.

⁶ Linen puonrīn ālang lē ādum a om a. Hava ngāi ha linen patri annīl lē patri dumaduk le han sumrū kuoirakit lē lungvār chopuia a khit u na. Ansutna ngāi chu rāngkachak lē sumrū, āsen, ālang, dumaduk lē āhāng lungvār le han ānbuok a ni.

⁷ Rāngkachak khuri le han abuongruo a sem u na, hava khuri ngāi chu antei chip a ni. Rēngin ei pēkanphalna anga, theirapomningtī chu atam sabaka a om a.

⁸ Hatuka theirapomningtī chu dān anga a buong u na, tūtē therkhaka manbuong u mak a. Asik chu pasal tinin ei nuom anga āthō ranga, rēngin a ina milian ngāi kōma chong a pēk a.

⁹ Rēngnū Vasti'm ni rase, Ahasveros rēngin a nupang ngāi dōra le han nēksāk pāntā a thōpui a.

Rēngnū Vasti Dingmun Anpei

¹⁰ Ni sari changna nikhuona rēng chu theirapomningtī le a malung rāi asān lāi han, amā'n rēng Ahasveros dorbōndom chachak dorbōndompū sari ngāi Mehuman, Biztha, Harbona, Bigtha, Abagtha, Zethar lē Karkas ngāi kōma chong a pēk a.

¹¹ Rēngnū Vasti chu a rēnglukhū ankhūna, a mēl satzia chu mipui lē milian ngāi matona a hong ānlang ranga, rēng matona a hong ānruoi ranga chong a pēk a. Asik chu Vasti hi aen mēl asa a ni.

¹² Tenchu rēngnū Vasti'n, rēng dorbōndompū ngāi amanga rēng chongpēk anga āhong ranga lei zōt mak a. Hasikhan rēng chu achālaka a tak asī na. A taksitna chu asūnga a kāng a.

¹³ Hasikhan rēngin mihian ngāi, hun ruia ariat ngāi a chongpui a. Hantin han dān lē ruirilna dān āriat ngāi ānkel chachak hi rēng ngāi thōdān ngal a ni.

¹⁴ Ama thuoi thapa mi ngāi chu Karsena, Sethar, Admatha, Tarsis, Meres, Marsena lē Memukan, Pārsia lē Media rama milian sari ngāi, rēng matona a mēl a vā'n lang thei ngāi le a rēngrama dingmun ansāng khīt a matona ansut chachak ngāi a ni u na.

¹⁵ “Dān anga rēngnū Vasti chunga hin hong mo ei ānthō rang? Amā'n rēng dorbōndompū ngāi amanga rēng Ahasveros a chongpēk ei tel nōk sika,” a tī na.

¹⁶ Hatuka Memukan-in rēng lē milian ngāi matona: “Rēngnū Vasti'n rēng chunga rong ni mak ei masial, tenchu rēng Ahasveros a thuoia om ram pumpuia milian ngāi dōra lē mitin chungā'm ei masial kēng.

¹⁷ Asik chu rēngnū'n hivan tina om ei thō hi nupang ngāi dōrā'n lei riat in tia, a mitmū una a tangsā u ngāi chu annuoia mu u'n ti, Amānī'n, ‘Rēng Ahasveros-in rēngnū Vasti chu ama matona āhong ranga chong a pēk a, tenchu hongpē mak a,’ ti u'n ti.

¹⁸ Avian len hin Pārsia rama lē Media rama nupang milian ngāiin, rēng a milian dōra kōma rēngnū a om thō chu na lei riat suo zei hava thap ha lei ti u'n ti. Hantin han anmūmākna lē taksitna liantak hong om in ti.

¹⁹ Rēngin asa a ti ten, ama nātā dāndet khat suok rase. Hava ha Pārsia lē Media dān lāia anziaka om rase, ei ānthūl thei lāi nōkna rang. Vasti chu rēng Ahasveros matona hong lāi nō rase. Hatuka rēngin ama nēka āsa bet kōma Vasti rēngnū sutmun chu pēk rase.

²⁰ Hatuka rēng dāndet ei sin rang chu a ram lianna mun tina anthek suo tikle, nupang ngāiin āsīn lē ālian a tangsā u ngāi lalchi thō chip u'n ti,” a tī na.

²¹ Hava chongkamin rēng lē milian ngāi dōra a rāi a mansān a. Rēngin Memukan a chongkam anga sin a thō na.

²² Hatuka amā'n rēng ramzobāk ngāi dōrana, a ramzobāk tina amāni horop anga lē a nam tina a chong ang chipa lekhā a mathuon a. Pasal tin chu a insūngkuo chipa a lusī ni rase, hatuka a nam chong chipa chong ril u rase.