Efesi 1 - Pathian Lekhabū Ānthiang

Chubai Thōna

¹ Paul, Pathian zōt anga Isuo Khristā kuitīrin, Efesi khuona mīnthiang ngāi lē Khristā Isuona a iamruo ngāi ranga kei maziak.

² Pathian koini na Pā lē Puma Isuo Khristā lungkhamna lē phūkdāina na kōm una om rase.

Khristā-na Ratha Bōrsāng ngāi

³ Pathian lē koini na Puma Isuo Khristā Pā chu anpāka om rase. Amā'n Khristā-na chungvān muna ratha bōrsāng dōra le bōrsāng ei na pēk.

⁴ Amā'n maniapūr ansin mān ātā Pathian makunga anditna le manūbuia ei na manlang theina ranga Khristā zāra ei na thang a ni.

⁵ Ama ei nuom ang le ei zōt anga Isuo Khristā zāra anāia anā pom ranga aphāmān ātā a na lei ruotsā nā nī na.

⁶ A lungkham lianna ei ānpāk theina ranga ei maditpū zāra a lungkhamna chu manbuia ei na pēk.

⁷ Pathian a lungkhamna ei tamzia anga ama thisen zāra koinī'n ratanna lē dān ānrakān ātā anduolna nei man a ni.

⁸ Alompeia hianna le riatna tin le han a lungkhamna chu ātam sabaka ei na pēk a ni.

⁹ Asik chu amā'n asat ei mandon ang taka, aphāmān ātā a malung derdīn anga, a kōma a malung vong chong maruk anthup chu koini na kōma ei na manriat a ni.

¹⁰ Alompeia chungvān lē maniapūra om ngāi dōra hi Khristā thuoia ei siak zit theina ranga, a hunbī a hong ākipa dorbōndom ranga, a malung vong anga chong maruk anthup chu ei hong manriat theina rang a ni.

¹¹ Ama a malung vong anga alompeia a thō na, a malung derdīna ei mansūk anga koini hi aphāmān ātā a na lei ruotsā nā nī na. Havan tin han Khristā zāra alompeia dōngaluopui nei hong chang thei a ni zei.

¹² Asik chu koini Khristā-na ansabeina mānsa ngāi hi Pathian anlianna ānpāk ei hong chang theina rang.

¹³ Nangnī'm hava chongtak chong, na sandam una thangahui chong ha nei rangāi u na, Khristā-na aiam nei hong ni u a ni. Hatuka nei iam u sika chong antina Rathā Ānthianga sīlmōr anzēm suo kēng nā ni u zei.

¹⁴ Hava Rathā ha Pathian ei ānlianna anpākna ranga, amā'n ei na rachōka ei ratanna rang dōngluopui mān ankhāpna a ni.

Ratha Hianna ranga Zārzongna

¹⁵ Nangni ngāi bila han Puma Isuo chunga nei iam una lē mīnthiang ngāi dōra chunga anditna nei dōn u ha ka lei riat a.

¹⁶ Hantin han koi um ni sela ka zārzongna bila hin na raming u ngāi chip aril mongluia rāisānchong nangni ngāi sika ka mantung chachak.

¹⁷ Koini na Puma Isuo Khristā Pathian, Anlianna Pā chu nangnī'n nei riat riam thei una hianna lē anlārna Rathā chu ei na pēk thei una ranga zār kei na zongpē u chachak a ni.

¹⁸ Amā'n ei na pāi una ansabei, mīnthiang ngāi anlianna bila dōng āluopui āchang ranga ei na pāi zia u nei riatthei una rang na malung mit ei na manvārpē theina ranga zār kei na zongpē u a ni.

¹⁹ Koini āiam ngāi takchunga thōtheina ankhīna bui ei rātnazia nangnī'n nei riatthei una rang kei zong chachak a ni. Hava thōtheina ha ama kōma om ranak rātna le han ei thō a ni.

²⁰ Hava thōtheina ranak ha Khristā takchunga ei manga athī ngāi bil ātā ei hong mathui a ni. Hatuka chungvān rama han a chang tianga ei mansut a ni.

²¹ Alom pei chunga ruirilna, ningneina, thōtheina le anlalna ngāi dōra lē hiva huna le nangkan huna raming dōra a lā'n phuo rang tin chunga ansāng khīta ei siak a ni.

²² Pathianin alompeia Khristā ke thuoia ā siak zit suo zei a. Hanūk chu alompei chunga ama a lu changna ranga kuibinga ei pēk a ni.

²³ Kuibing ei kipna chu Khristā, alompeia aloma ei kipna a ni. Hatuka hava kuibing ha ama a taksā a ni.