Dāntīrantōn 1 - Pathian Lekhabū Ānthiang

Mōsi a Chongril Mānsana

¹ Hiva chongkam ngāi hi Zordan tidung suolam tiang mibuiram, Suf anūk tianga Arava phāizōla, Paran lē Tofel, Laban, Hazerot lē Dizahab ram kongkāra Israel ngāi dōra kōma Mōsī'n ei ril chu a ni.

² Horeb muolpui ātā Kades-Barnia chu Seir muolpui lampui apala ni sōmleikhat lam a ni.

³ Kum 40na kuma, tha sōmleikhatna, nikhat nikhuona han, hintin hin a hong ānī na, Zehova'n amāni ngāi ranga a chongpēk ngāi dōra chu Mōsī'n Israel nāi ngāi kōma a ril a.

⁴ Hiva hi amā'n Hesbon-a om Amor mi ngāi rēng Sihon lē Basan rēng Og, Edrei-a le Astarot-a āom chu a that suona a ni.

⁵ Zordan suolam tiang varāla Moab rama, Mōsī'n hiva dān rilthiang chu a phut a,

⁶ “Zehova koini na Pathianin Horeb muolpuia a nā chongpui a, ‘Hiva muolpuia hin āsōtpā ommun na khuor u zei.

⁷ Suok u tānla, anzin u ro. Amor mi ngāi tāngram tianga lē, a ravēla Arava munzōl lē, tāngram ngāia lē, Sefela ram lē, Negev ram lē, tipui rauop lē, Kanān mi ngāi omna ram lē Lebanon-a, tidung alian Eufretis tidung tenpeia sē u ro.

⁸ Entā, hiva ram chu na maton una ka rē. Va lūt u tānla ram chu va luo u ro. Hiva ram hi amāni le a nūka alā hong rang khūk ngāi āpēk ranga, na pā u Abraham, Isak lē Zakob ngāi kōma Zehova'n chong a lei tin a ni,’ a tī na,” a tī na.

Mōsī'n Ruoipū ei Āthangna

⁹ Mōsī'n a kōm una hintin hin a tī na: “Hava hunlāi han na kōm u na, ‘Ka thei daka chu na mator u nō ning.

¹⁰ Zehova na Pathian u'n a na maphung u na, entā, avian hin nangni chu anvāna ārsī anga kēng nei tam a ni u zei.

¹¹ Zehova na pā u ngāi Pathianin atuna nei ni u nēka thep asānga na mantam u rase. Na kōm una chong ei tin anga bōr na pēk u rase!

¹² Hontin mo ka thei daka nangni nei ānpōn u na, na puokrik u le nei ānkhal una ngāi kei mator rang?

¹³ Na nam u ngāi kāra mihian, āriatthei mī lē riatna āsā dōn mi ngāi chu āthang u ro. Amāni ngāi chu na chung una alūna sin ka ting,’ ka lei tī na.

¹⁴ Nangnī'n, ‘Koini nei thō rang nangin nei na ti chu ā sā,’ tīna na na masang u na.

¹⁵ “Hantin han na nam u ngāi lusī ngāi, mihian lē riatna āsā ādōn mi ngāi chu ka lāk a, na chung una alusīna ka sin a. Mī 1,000 chunga lusī, mī 100 chunga lusī, mī 50 chunga lusī, mī sōm chunga lusī lē na nam u ngāi ranga miliana ka sin a.

¹⁶ Hava huna na ruirilpū u ngāi chu chong ka pēk a, ‘Na ūnāi ngāi kongkāra rui chu rangāi u ta, ama lē a paruol ole a bila om ramtei mī kongkāra adik taka rui rilpē u ro.

¹⁷ Ruirilnāna mimandang dōn u nō tānla; mīsīn lē milian chong rangāi rit u tānla. Mī tūtē āchi nō tānla, asik chu ruirilna chu Pathian tā kēng. Na rang una rui azēk antak sabak chu ka kōma hong chōi u tānla, koiin lei rangāi ka ting,’ ka tī na.

¹⁸ Hava hunlāi han nei thō u rang dōra chu na kōm una chong ka na pēk zit suo u zei.

Ram Āsī ranga Mīsīpū ngāi ei Āntīrna

¹⁹ “Zehova koini na Pathian chongpēk anga han Horeb ātā nā'n phet a, Amor mi ngāi muolpui lampui tiang nei hong mū mibuiram anchiruo lē ālian chu na hong pial a. Hatuka Kades-Barnia chu na hong ātung a.

²⁰ Hatuka koiin na kōm u na, ‘Zehova koini na Pathianin ei na pēk rang Amor mi ngāi muolpui chu na hong ātung u zei.

²¹ Entā, Zehova na Pathian u'n ram chu na maton una a rē na. Zehova na pā u ngāi Pathianin na kōm una ei tī anga han kal u tānla, va luo u ro. Āchi u nō ro, na dok um manchuoi u nō ro,’ ka tī na.

²² “Nangni na lom una ka kōla na hong u na, ‘Koini na matona mī lei tīr u rei, amānī'n ram chu koini ranga lei va en u rase, hatuka nei va kalna rang lampui le nei sēna rang khopui ngāi ruitāng chu na hong manthei u rase,’ na ti u na.

²³ “Hava chongkamin a na manphām a. Hatuka na mi ngāi bila mī sōmleianni, a nam tina angkhat senga kā thang a.

²⁴ Amāni ngāi chu anphet u na, muolpui ngāia a vā kal u na, Eskol phāiruoma a hong u na, ram chu a va sī u na.

²⁵ Amānī'n hava rama theimarā senkhat chu a kut le a lāk u na, koini na kōma a hong chōi u na. Hatuka thang chu a na hong ril u na, ‘Zehova koini na Pathianin ram ei na pēk rang hi āsā a ni,’ a ti u na.

Israel-in Zehova aduia a Sel

²⁶ “Hanum ni sela, avā kal rang nuom u mak chē na, tenchu Zehova na Pathian u chongpēk aduia nā sel u na.

²⁷ Na puon-in u ngāia bādō na thō u na, ‘Zehova'n ei na mūmāk sika, Amor mi ngāi kuta anā'n betōk ranga lē ānsiat biang ranga, Āigupta ram ātā ei na hong ruoi a ni.

²⁸ Hon mo koini nei sē rang? Koini na paruol ngāiin, “Mi ngāi chu koini na nēka aliana ansāng u kēng. Khopui ngāi chu ālian lē anvān atōna rakul anei a ni. Anakim ngāi khūk ngāi um na va mū na,” tīna na malung dok a lei manchuoi u zei a,’ na tī u na.

²⁹ “Hatuka na kōm u na, ‘Na rathā manta u nō ro, amānī'm āchi u nō ro.

³⁰ Zehova na Pathian u, na maton una āsēpū'n, Āigupta rama na mit makung una ei na thōpē u ngāi dōra anga han nangni ranga na duipē u'n ti.

³¹ Hiva mibuiramā'm hantin dēn han ei thō chu na mū na. Mī'n a nāipasal ei pēl anga han, lampui tuonsōta hiva mun na hong āsuok u māseng tenpei, Zehova na Pathian u'n ei na hong pēl u a ni,’ ka tī na.

³² Hanum ni sela, hiva ngāi dōra sikā'm, Zehova na Pathian u chu iam u mak chē na.

³³ Ama chu chubuk nei khuor una rang mun a nā'n vānpē u ranga lē kal nei chōi una rang lampui a nā'n mū u ranga, nei ānzin unāna zāna moi le han hatuka sūna ansūm le han na maton una a sē na.

Zehova'n Israel a Sinsak

³⁴ “Zehova'n na chong rasā u chu a lei riat a, a tak asī na, hatuka khomāk ansam a.

³⁵ ‘Ataktaka, hiva khūk salui ngāi bila angkhat ngalin na pā ngāi āpēk ranga ka lei tin ram āsā chu mu u nō ni.

³⁶ Zefune a nāipasal Kaleb rongin ha ram chu va mu in ti. A lei vā thin suo ram chu ama le a nāi ngāi chu pēk ka ting, asik chu apumpuia Zehova a zī na,’ a tī na.

³⁷ Nangni na sika Zehova chu ka chungā'm a tak asī na, ‘Nang um hava rama lūt nō ta ni.

³⁸ Tenchu Nun a nāipasal Zosua, na matona ānding chu hava rama lūt in ti. Ama chu lungngam sak ro, asik chu amā'n Israel chu hava ram ha va manluo in ti,’ a na tī na.

³⁹ ‘Na nāipangte u ngāi, rāllāk neinun ranga nei bē u ngāi lē avian āsā lē āsiat riatna la dōnlui na nāi u ngāi chu lūt u'n tia, amāni chu pēk u ka tia, hava han amānī'n luo u'n ti.

⁴⁰ Ten nangni chu, suok u tānla Tipui Sen lama mibuirama anzin u ro,’ a tī na.

⁴¹ “Hatuka nangnī'n na na masang u na, ka kōma, ‘Zehova aduia āsia nei thō kēng a ni zei. Zehova koini Pathianin chong ei na pēk ngāi dōra anga va kal a, rālkāp in ti,’ na ti u na. Mi dōrā'n rālkāp rālthuom le nā'n vō suo u le kēng, muolpuia ākal ranga abei cheka nei la bē u a ni.

⁴² Hatuka Zehova'n ka kōma, ‘Amāni ngāi chu ril ro, “Nangni chu va kal u nō ro, rālkāp u nō ro, asik chu koi chu na kār una om mak ung; hanōkten chu na rāldui u ngāi matona andōka om na ti,” ti ro,’ a tī na.

⁴³ Hantin han ka nā chongpui u na. Hanum ni sela, rangāi u mak chē na. Tenchu Zehova chongpēk aduia nā sel u na, anphu sabaka muolpuia na kal u na.

⁴⁴ Hatuka hava muolpuia āom Amor mi ngāiin nangni chu a na hong dui u na, khuoiin ei razūl anga nangni chu a na hong razūl u na, Seir ātā Horma tenpeia na razīk u na.

⁴⁵ Hatuka na hong ākīr u na, Zehova matona na hong āchap u na. Tenchu Zehova'n na rōl rasā u chu lei rangāi mak a, a kuor um lei sung mak a.

⁴⁶ Hava muna nei om u hun andona chu, Kades-a nikhuo tampā nā om u na.