Aphutna 1 - Pathian Lekhabū Ānthiang

Maniapūr Ansinna Rui

¹ Anphuta Pathianin anvān ngāi lē phil a sin a.

² Phil ha ramīl abui lē ārong a ni. Tī ānthūk chunga āzīng a om a. Pathian Rathā chu ti chunga a lēng a.

Ni Khatna

³ Pathianin, “Raāng om rase,” a tī na, hantin han raāng chu a hong āom a.

⁴ Pathianin raāng chu asāna a mū na. Hatuka Pathianin āzīng ātā raāng chu a sensāi a.

⁵ Pathianin raāng chu sūn a phuo na, āzīng chu zān a phuo na. Hankēng khului lē zīng ha, ni khatna a ni.

Ni Annina

⁶ Pathianin, “Ti lāia vānbōruok om rase, vānbōruokin tī chu tī nātā sensāi rase,” a tī na.

⁷ Hantin han Pathianin vānbōruok chu a sin a, vānbōruok thuoia tī om lē vānbōruok chunga tī om chu a sensāi a. Havan tin han a hong āom a.

⁸ Pathianin vānbōruok chu anvān a phuo na. Hankēng khului lē zīng ha, nī annina a ni.

Ni Anthumna

⁹ Pathianin, “Anvān thuoia ti ngāi chu munkhata anchun rase, tāng ahul chu anlang rase,” a tī na, hatuka havan tin han a hong āni na.

¹⁰ Pathianin tāng ahul chu Phil a phuo na, munkhata tī ānchun chu tipui a phuo na. Pathianin hava ha asāna a mū na.

¹¹ Pathianin, “Philin chiak ngāi, rū dōn chimuru kung ngāi, a chī ei nī anga rū dōna theimarā ānsuok theikung ngāi, a chī phil chunga āom chu manmōng rase,” a tī na. Havan tin han a hong āni na.

¹² Philin chiak ngāi, chimuru ei nī a anga rū dōn chimuru ngāi, a chī ei nī a anga rū dōna theimarā ānsuok theikung ngāi chu a manmōng a. Pathianin hava ha asāna a mū na.

¹³ Hankēng khului lē zīng ha, nī anthumna a ni.

Ni Manlina

¹⁴ Pathianin, “Zān ātā sūn ei sensāina ranga anvān vānbōruoka raāng ngāi om rase, hava ngāi ha andangna lē hunbi ngāi, nikhuo lē kum ngāi riattheina rang ni rase, a tī na.

¹⁵ Phil chunga raāng āpēk ranga anvān vānbōruoka raāng ngāi om rase,” a tī na. Hatuka havan tin han a hong āni na.

¹⁶ Hatuka Pathianin raāng alian anni a sin a: raāng alian uolpū chu sūn chunga ruiril ranga lē raāng asīn uolpū chu zān chunga ruiril ranga a sin a. Ārsi ngāi um a sin a.

¹⁷ Pathianin hava ngāi ha phil chunga raāng āpēk ranga anvān vānbōruoka a siak a.

¹⁸ Sūn lē zān chunga ruiril ranga, āzīng ātā raāng ansensāi ranga anvān vānbōruoka, a siak a. Pathianin hava ha asāna a mū na.

¹⁹ Hankēng khului lē zīng ha, ni manlina a ni.

Ni Rangana

²⁰ Pathianin, “ti ngāi hin nukanei tin atam sabaka bit rase, va ngāi chu phil chunga anvān vānbōruoka zuong rase,” a tī na.

²¹ Hankēng Pathianin tipuia nukanei alianpā ngāi lē tīna nukanei sīngansa thei tin atam sabaka, a chī u ang chipa lē manthā dōn va tin a chī ang chipa a sin a. Hava ha Pathianin asāna a mū na.

²² Pathianin amāni ngāi chu bōr a pēk a, “Marā tampā dōna pung u ro, tipuia ti ngāi chu manbit u ro. Phil chunga va ngāi chu pung rase,” a tī na.

²³ Hankēng khului lē zīng ha, ni rangana a ni.

Ni Arukna

²⁴ Pathianin, “Philin nukanei tin a chi ngāi ang chipa: ranvāi, nukanei ālōn thei lē phila ramsa tin, a chī ei ni ang chipa, hong rasuo rase,” a tī na. Havan tin anga a hong āni na.

²⁵ Pathianin phila a chī ang chipa ramsa ngāi, a chī ang chipa ranvāi ngāi, a chī ang chipa phila ālōn nukanei dōra a sin a. Hava ha Pathianin asāna a mū na.

Pathian ei Ānphuopui Miring Ansin

²⁶ Hatuka Pathianin, “Koini ramīla koini anā phuozeka miring sin u rei, amāni chu tipuia nga ngāi chunga, chunga āzuong va ngāi chunga, ranvāi ngāi chunga, phil pumpui chunga, phila ālōn nukanei ngāi dōra chunga ningneina dōn u rase,” a tī na.

²⁷ Hantin han Pathianin ama ramīl anga miring a sin a. Pathian ramīla ama chu a sin a. Amāni chu pasala lē nupanga a sin a.

²⁸ Pathianin amāni chu bōr a pēk a, Pathianin amāni kōma, “Marā tampā dōna pung u ro, phil chunga bit u tānla, hava ha na racham thuoia rē u ro. Tipuia nga ngāi chunga, chunga zuong va ngāi chunga, phil chunga nukanei alōn dōra chunga ningneina dōn u ro,” a tī na.

²⁹ Pathianin, “En ro, phil pumpui chunga rū dōn chimuru kung tin, a rū nei theimarā thingkung tin chu, ka na pēk u. Hivā hi nangni rang nēksāk chang in ti, a tī na.

³⁰ Phila ālēng ran tin, chunga āzuong va tin lē damna ādōn phila ālōn nukanei tin ngāi rang um, a nēksāk u rang sūlbuoring tin ka pēk u na,” a tī na. Hatuka havan tin han a hong āni na.

³¹ Hatuka Pathianin ama ei sin ngāi dōra chu ataktaka asa sabaka a mū na. Hankēng khului lē zīng ha, nī arukna a ni.