Anthokna 1 - Pathian Lekhabū Ānthiang

Faro'n Israel ei Pēngsōmna

¹ Hiva ngāi hi a ni Israel nāipasal ngāi raming Āiguptā-na āhong ngāi chu, amāni lē a insūngkuo chip Zakob a bila a hong u na:

² Ruben, Simeon, Levi lē Zuda,

³ Isakhar, Zebulun lē Benzamin,

⁴ Dan, Naftali, Gad lē Aser.

⁵ Zakob a taksā ngēt ātā āsuok dōra chu mī 70 a ni u na (Zosef chu Āiguptā-na a lei om zēt suo a ni).

⁶ Zosef a thī na, a paruol ngāi dōra lē amāni khūk dōra a thi u na.

⁷ Tenchu Israel nāi ngāi chu marā a hong dōn u na, ansōn sabak u na, a pung u na, ranak a hong ānei sabak u na, hā ram chu a sip ziak u na.

⁸ Hatuka Āiguptā-na han Zosef riatlui rēng athar chu a hong ānthui a.

⁹ Amā'n a mi ngāi kōma, “Entā, Israel nāi ngāi nam hi koini nēka atama, ranakanei u zei.

¹⁰ Thota, hiva ngāi le hin ahian sabaka ompui u rei. Hanōkten a pung lam ving u ngāi, anduina tika rāldui ngāi tianga a kop a, koini a nā'n duipui a, hiva ram ātā asuoka a sē lam ving u ngāi,” a tī na.

¹¹ Hasikhan puokrik lē amāni a dūk anna ranga a chung una sinthō āvēngpū ngāi a phun u na. Faro rang neinun ei mankhōmna rang, Pithom lē Rameses khopui chu a sin u na.

¹² Tenchu a dūk ei manna u tuk, amāni chu a pung u na, ansōn riam u na. Israel nāi ngāi sika a rathā ta u na.

¹³ Hasikhan Āigupta mi ngāiin, Israel nāi ngāi chu antak sabaka suok sin a manthō u na.

¹⁴ Amāni chu sin antakna tin lē ratāt sina, philpok sina lē phāia sin dōra le han ei dam una chu a mankhapē u na. A sinthō una dōrāna antak sabaka suok anga dorbō a mandom u na.

¹⁵ Hatuka Āiguptā rēngin Hebrāi kūrmālōmā ngāi a chongpui a, angkhatpū raming chu Sifra lē angkhat rēt pū raming chu Pua a ni.

¹⁶ Amā'n, “Hebrāi nupang ngāi rang nāi annei sin na thō u le han, amāni chu nāi neina muna na mu u le, pasal a ni ten that u tānla, tenchu nupang a ni ten, ama chu dam rase,” a tī na.

¹⁷ Tenchu kūrmālōmā ngāiin Pathian āchi u na, Āiguptā rēngin chong ei pēk anga thō u mak a. Nāitē pasal ngāi chu a mandam u na.

¹⁸ Hatuka Āiguptā rēngin kūrmālōmā ngāi a pāi a, amāni kōma, “Hong sika mo hiva neinun nei thō u lē pasal nāitē ngāi nei mandam u?” a tī na.

¹⁹ Kūrmālōmā ngāiin Faro kōma, “Asik chu Hebrāi nupang ngāi hi Āigupta nupang ngāi ang ni u mak. Asik chu amāni hi a chak u na, kūrmālōmā ngāi a hong u mān, nāi a lei ānei u chachak a,” a ti u na.

²⁰ Hasikhan Pathianin kūrmālōmā ngāi chunga ei satna ei manlang, mi ngāi chu a hong āpung u na, ranakanei sabak u na.

²¹ Kūrmālōmā ngāiin ei āchi u sika, Pathianin insūngkuo a pēk a.

²² Hatuka Faro'n a mi ngāi dōra chong a pēk a, “Nāipasal anzir dōra chu Nail tidunga nei pei u rang, nāinupang dōra chu adama nei mazōk u rang,” a tī na.