Anlangna 1 - Pathian Lekhabū Ānthiang

Chongmaruoina

¹ Isuo Khristā anlangna, sōtluitēna rui a hong ātung rang ngāi, a suok ngāi kōma ānmū ranga ei pēk ruia, amā'n a vānpalāi amanga Zohan a kōma ei hong tīr lē ei hong manriat chu a ni.

² Ama chu Pathian chong, Isuo Khristā ruia lē ei mū ngāi dōra ānriatpū a ni.

³ Hiva dēchong riltheina chong ansiar le ānngāi tak chu rāvān asa kēng, hanūk chu hiva asūnga chong anziak ngāi dōra āzī tak chu rāvān asa kēng. Asik chu hun a hong ānāi kēng a ni zei.

Kuibing Sari Kōma Chubai Thōna

⁴ Koi Zohan-in, Asia rama kuibing sari āom ngāi kōma kei maziak: Āom lē āom suo lē a la hong āom rang pū kōm ātā lē, a chōmphāng matona Ratha sari āom ngāi kōm ātā lungkhamna lē phūkdāina na kōm una om rase.

⁵ Isuo Khristā, āriatpuipū iamruo, āthi ngāi ātā ānthuirēt atontīr lē phila rēng ngāi chunga ruirilpū kōm ātā lungkhamna lē phūkdāina chu na kōm una om rase. Koini a nā'n dita, a thisen le koini nei siatna ngāi anā'n ratanpū,

⁶ koini na Pathian ranga rēng lē chāizūnga anā sinpū kōma anlianna lē anlalna chu tāituon tāituona om rase. Amen.

⁷ Entā, ama chu ansūm bila a hong, ama chu mit dōrā'n mu in ti, ama āsun ngāiin um mu u'n ti. Phila nam tin chu ama sika la chapchān u'n ti. Havan tin han a ni! Amen.

⁸ “Koi hi Alfā lē Omega, Aphutna lē Amongna kā ni. Āom lē āom sā lē alā hong rang, Āthōtheikiarpū kā ni,” Pumā'n a ti.

Miring Nāipasal Anlārna

⁹ Na paruol u koi Zohan hi Isuo Khristā sika dūk a na diarpui, khuo le tīna antakna anā tiarpuipū'n, Pathian chong lē Isuo Khristā āriatpui sika Patmos muolanlān ei ti una muna om kā nī na.

¹⁰ Puma nikhuona Rathā'n a na maruoi a, hatuka ka nūk tianga bekul maring anga maringpui khat ka riat a.

¹¹ Hava rasā hān: “Koi hi Alfā le Omega, Atontīr lē Ahekna kā ni. Nangin nei la mu rang ngāi hi lekhazuola maziak ro. Hatuka chu hava ha Asia rama Efesi, Smurna, Pergamos, Thuatira, Sardis, Filadelfia le Laodikia kuibing sari āom ngāi kōma mathuon ro,” a tī na.

¹² Hatuka ka kōma anā chongpui hē ha āen ranga ka nūk tiang kā'n hoia lēmchuongna rāngkachak sari ka mū na.

¹³ Hava lēmchuongna sari malāi taka tū khat lek mo, “Miring Nāipasal aphuozeka,” (Dnl 7:13) a kephā tenpei puon anchuol ansil lē a rōpa rāngkachak kōngkhit le akōng ākhit chu ka mū na.

¹⁴ A lū lē a sam chu beramul angui anga angui, arial anga āvār, a mit ngāi chu moi achuong anga āchuong a ni.

¹⁵ Hatuka a kepha ngāi chu moia anling kāngsa vār ang a ni. A rōl maring chu tī tampā rasā ang a ni.

¹⁶ Hatuka a chang kuta ārsi sari a dōn a, a mūr ātā khendāi kiang anni mariam angei chu a suok a. Hatuka a māi chu anīsā lum lāitaka a ni ēl ang a ni.

¹⁷ Ama chu kei mū le athi anga a kekunga kā'n luoi len a. Hatuka amā'n a chang kut chu ka chunga a bāng a, ka kōma: “Āchi nō ro. Koi hi Atontīr lē Ahekna kā ni.

¹⁸ Koi hi adama āom kā ni, kei thi, tenchu entā, tāituona ādam kā ni. Amen. Ka kuta kēng thīna lē āthi khuo chābī chu ei om.

¹⁹ Hasikhan nangin nei mu suo ngāi rui hi maziak ro. Atuna āom suo ngāi le hiva suole han nangkana a hong āom len rang ngāi rui um maziak ro.

²⁰ Ka chang kuta ārsi sarī āom nei mū lē rāngkachak lēmchuongna sari ngāi chongrīl anthup chu hiva hi a ni: Ārsi sari ngāi chu kuibing sari ngāia vānpalāi ngāi a ni u. Hatuka lēmchuongna sarī nei mu ngāi chu kuibing sari ngāi a ni,” a tī na.