Amos 1 - Pathian Lekhabū Ānthiang

¹ Tekoa-na berapū ngāi kāra mī khat Amos a chong, nīnū hong kum anni māna, Zuda rēng Uzia hunlāi lē Israel rēng Zoas a nāipasal Zeroboam a hunlāia, Israel ngāi ruia ei mū chu:

² Zehova chu Zion ātā anhum, Zerusalem ātā a rōl hong masuok in ti; Berapū ngāi sūlring mun chu anngūi u'n ti, Kārmel sīp chu chuoi in ti.

Damaska chunga Ruirilna

³ Zehova'n hintin hin a ti: Damaska hekhēlna anthum sika lē Manli sika, ei ānsiksakna rang chu makhīr nō ning, Asik chu Giliad chu thīr sāng anchīlna le han a lei āchīl u na.

⁴ Tenchu Hazael a ina moi hong masul ka ting Hava moiin Ben-Hadad rēng-in ngāi chu hāl biang in ti.

⁵ Damaska suokkhār ankalna hā'm khiak ka ting, Aven phāiruoma āom ngāi um pei biang ka ting, Hatuka rēngsunrol anlekpū Bet-Eden ātā'm pei biang ka ting. Suria mi ngāi chu Kir rama selkeia sē u'n ti, Koi, Zehova'n ka ti.

Gaza Chunga Ruirilna

⁶ Zehova'n hintin hin a ti: Gaza hekhēlna anthum sika lē manli sika, Ei ansinsakna rang chu khāipē nō ning, Asik chu amā'n nam pumpui chu Edom kōma anbetōk ranga selkeia a rē na.

⁷ Tenchu Gaza rakulbang chunga moi hong masul ka ting. Hava hān rēng-in ngāi chu hāl biang in ti.

⁸ Asdod-a āompū chu hiva nātā pei biang ka ting, Askelon ātā rēngsunrol anlekpū'm, Ka kut chu Ekron aduia ālek ka ting, Hatuka Filistia mi maniang ngāi chu anpei biang in ti, Koi, Puma, Zehova'n ka ti.

Tura Chunga Ruirilna

⁹ Zehova'n hintin hin a ti: Tura hekhēlna anthum sika lē manli sika, Ei ānsinsak rang chu khāipē nō ning, Asik chu amā'n nam pumpui chu Edom kōma anbetōk ranga selkeia a rē na, Paruol nīna dānkhitna chu riattit mak a.

¹⁰ Tenchu Tura rakulbang chunga moi hong masul ka ting. Hava hān rēng-in ngāi chu hāl biang in ti.

¹¹ Zehova'n hintin hin a ti: Edom masial anthum sika lē manli sika, Ei ansinsak rang chu khāipē nō ning, Asik chu a paruol khendāi le ei razūl sika, A riangvāimūna dōra ei āthing zit a, A taksitna chu ei manlang chian sika, A taksitna lum chu tāituona ei vong sika.

¹² Tenchu Teman chunga moi hong masul ka ting, Hava hān Bozra rēng-in ngāi chu hāl biang in ti.

Ammon Chunga Ruirilna

¹³ Zehova'n hintin hin a ti: Ammon hekhēlna anthum sika lē manli sika, Ei ansinsak rang chu khāipē nō ning, Asik chu amānī'n a ramrī ei manlian thei una rang, Giliad-a nupang anrāi ngāi chu a phor u na.

¹⁴ Tenchu Raba rakulbang chunga moi le bel ka tia, Rāldui lāia ānkhēk rasā le Phāivuo lāia thirum rahū anga; A rēng-in ngāi chu hāl biang in ti.

¹⁵ A rēng ngāi chu selkeia sē u'n tia, Ama le a milian ngāi munkhata, Koi, Zehova'n ka ti.