2 TIMOTHI 1 - Pathian Lekhabū Ānthiang

Chubai Thōna

¹ Paul, Pathian zōtdāna, Khristā Isuona āom damna chongtin anga, Khristā Isuo kuitīrin,

² ka nāipasal madit Timothi kōma: Pā Pathian lē Khristā Isuo koini na Puma lungkhamna, riangvāina lē phūkdāina chu om rase.

Iamruo Āni Ranga Lungngamna Chong

³ Ka chipui ngāiin ei thō u anga sia le sa riatna anthiang le a dorbō kei dompū Pathian chu rāisānna ka mantung. Sūn zān mongluia zār kei zongnāna ka na riattit.

⁴ Ka rāisānna ei kip theina ranga, na mitrathī ka mandon le, anā mū ranga kei zōt a ni.

⁵ Nanga iamna dik āom ha ka malunga a chui a, hava ha na pī Lois kōma lē na nu Euniki kōma alei om chu a ni. Na kōmā'm āom ngēt tī ka riat.

⁶ Na chunga ka kut kei bāng ātā Pathian phāmpēk na kōma āom chu ānchuong ranga kei na manriat a ni.

⁷ Asik chu Pathianin anchina rathā ni mak ei na pēk, tenchu ranak, anditna lē anrēngtheina rathā kēng ei na pēk.

⁸ Hasikhan, koini na Puma rui ānriatpū āni chu anzakpui nō tānla, ama sika ānkhumpū um nā'n zakpui nō ro. Tenchu thangahui sika Pathian rātna anga āntaktiarnāna hin na tiarpui ro.

⁹ Amā'n a na sandam a, kuina anthianga a na kui a, hava ha koini na sinthō anga ni mak. Tenchu ama a derdīn lē a lungkhamna anga, hun anphut mān ātā Khristā Isuona koini a na lei pēk suo anga a ni.

¹⁰ Tenchu koini na Sandampū Khristā Isuo ei hong ānlangna zāra atun chu anlanga om zei a. Amā'n thīna chu a hong pei a, thangahui amanga damna lē thitheiluina chu a hong manlang zei.

¹¹ Hatuka hava ranga han koi hi namtei ngāi kōma chongrilpū, kuitīr lē mīnchūpū ranga ānruot kā nī na.

¹² Hasikhan a ni, hiva antak ngāi hī'm kei tiar, tenchu anzak mak ung a, asik chu kei iampū hi kei riat kēng, hanūk chu a kōma kei mansiak chu sovā nikhuo tika rang han asadima a na vongpē thei ti adik phita kei ānngam a ni.

¹³ Khristā Isuona iamna le anditna a dōn chunga ka kōm ātā nei manchong āsa nei rangāi dōra ha a enruo anga dōntit ro.

¹⁴ Pathianin na kōma āvong ranga tinratuo āsa ei na mansiak ha koini na sūnga om Rathā Ānthiang le han vongtit ro.

¹⁵ Aloma Asia rama āom ngāi dōrā'n koi ei na māk u rui ha na riat a, amāni bila han Fugela lē Hermogenes um anchel u na.

¹⁶ Pumā'n Onesifora ngāi insūngkuona lungkhamna pēk rase, asik chu amā'n ei na manhar chachak a ni, hanūk chu zīngzir kei ānkhit um nā'n zakpui mak.

¹⁷ Tenchu Rōm-a a hong ātung han a nā rok sabaka, a na hong mū na.

¹⁸ Hava nikhuo tika Puma kōm ātā riangvāina ei mantheina ranga Pumā'n phalpē rase. Asik chu Efesi khuona a om lāia hasō ei ādom sabak zia ha na riat hale.