ဗျာဒိတ် 4 - Marma

ဂေါင်းခင်ဘုံမာ ပလ္လင်တော်ကို မြင်ရခြင်း

¹ ယင်းနောက် ငါစာ ဂေါင်းခင်ဘုံမာ လမ်းခဝတစ်ခု ဖွင့်ရို့ဟိစာကို မြင်လီရေ။ အရာ ငါစာ စကားပြောသံတစ်ခုကို ကြားလီရေ။ ထိုစကားပြောသံစာ ဘောမှုတ်စာအသံနတူလီရေ။ အရာ သူစာ ငါ့ကို ပြောလီရေ၊ “ဒေ နေရာတို့ တက်လာလတ်။ နောက်က အမှန် ဖြစ်ပျက်ရဖို့စာ အကြောင်းတိကို ငါ နင့်ကို ပြမည်။”

² ယင်းခါ ငါစာ ချက်ချင်း သန့်ရှင်းသောဝိညာဉ်တော် ဆောင်ယူခြင်းကို ခံရပြီးကေ ဂေါင်းခင်ဘုံမာ ပလ္လင်တော်တစ်ခုကို မြင်ရလီရေ။ အရာ ထိုပလ္လင်တော်မာ တစ်ယောက် ထိုင်ရို့ ဟိလီရေ။

³ သူ့မာ မျက်နှာစာ နဂါးသွဲ့ကျောက်န ပတ္တမြားကျောက်ပိုင် တောက်ပြောင်လီရေ။ ထိုပလ္လင်တော် လေးဖက်လက်စိမာ သတင်းရည်သောက် ပေါ်ရို့ ဟိလီရေ။ ထိုသတင်းရည်သောက်စာ ကျောက်စိမ်းပိုင် လလက်တောက်ရို့ ဟိလီရေ။

⁴ ထိုပလ္လင်တော်ကို အရာလည်း ပလ္လင် နှစ်ဆယ်နလေးခု ဝန်းရို့ ဟိလီရေ။ ထိုပလ္လင် နှစ်ဆယ်နလေးခုမာ ဂေါင်းဆောင်အကြီး နှစ်ဆယ်နလေးပါး အဝတ်ဖြူ ဝတ်ပြီးကေ ထိုင်ရို့ ဟိလီရေ။ အရာ သူရို့ အဂေါင်းမာ ရွှေသရဖူ ဆောင်းရို့ ဟိလီရေ။

⁵ ထိုပလ္လင်တော်အထဲက လျှပ်ပြက်လီရေ အရာ ကြောက်လန့်စရာ အသံန မိုးကြိုးစာအသံလည်း ထွက်လီရေ။ အရာ ထိုပလ္လင်တော် ရှိက ဆီမီးကျိုင် ခုနစ်ချောင်း တောက်ရို့ ဟိလီရေ။ ထိုဆီမီးကျိုင် ခုနစ်ချောင်းစာ ထာဝရဘုရား၏ ဝိညာဉ်တော်ခုနစ်ပါး ဖြစ်တေ။

⁶ ယင်း ပလ္လင်တော် ရှိက မှန်ကျောက်ပိုင် ပပြောင်လလက်တောက်စာ မှန်ပင်လယ် တစ်ခု ဟိလီရေ။ ထိုပလ္လင်တော် လေးဖက်လက်စိက အသက်ရှင် သတ္တဝါလေးပါး ဟိလီရေ။ သူရို့ ခန္ဓာတစ်ကိုယ်လုံးမာ မျက်စိအပြည့် ဟိလီရေ။

⁷ ပထမ အသက်ရှင် သတ္တဝါမာ မျက်နှာစာ ခြင်္သေ့ မျက်နှာနတူလီရေ၊ ဒုတိယ အသက်ရှင် သတ္တဝါမာ မျက်နှာစာ နွားတွီး မျက်နှာနတူလီရေ၊ တတိယ အသက်ရှင် သတ္တဝါမာ မျက်နှာစာ လူမျက်နှာနတူလီရေ အရာ စတုတ္ထ အသက်ရှင် သတ္တဝါမာ မျက်နှာစာ ပျံနီစာ စွန်ပုတ်ကြီး မျက်နှာနတူလီရေ။

⁸ ထိုအသက်ရှင် သတ္တဝါလေးပါးစုံမာ အတောင်ခြောက်ဖက်စီ ဟိလီရေ။ ထိုအတောင်တိမာ မျက်စိအပြည့် ဟိလီရေ။ ထိုသတ္တဝါလေးပါးစာ ညဉ့်ပါ-ရက်ပါ မနားဘိုင်းန ဒေပိုင် ပြောရို့ နီကတ်လီရေ၊ “အနန္တတန်ခိုးနပြည့်စုံစာ အသျှင်ထာဝရဘုရား သန့်ရှင်းပါရေ၊ သန့်ရှင်းပါရေ၊ သန့်ရှင်းပါရေ။ သူစာ အယင် ဟိလီရေ၊ ဒေဂုလည်း ဟိရေ အရာ နောက်အနာဂါတ်မာလည်း ကြွလာဖို့။”

⁹ ပလ္လင်တော်မာ ထိုင်နီစာ အသျှင်ထာဝရဘုရားစာ ထာဝရအသက်သျှင် ဖြစ်တေ။ ထိုသတ္တဝါတိစာ သူ၏ ဘုန်းတန်ခိုးကို ချီမွမ်းရို့၊ ရိုသေခြင်းပြုရို့ အရာ ကျေးဇူးတင်ရို့ နီကတ်တေ။

¹⁰ တစ်ချိန်တည်းမာ ထိုဂေါင်းဆောင်အကြီး နှစ်ဆယ်နလေးပါးစာ ပလ္လင်တော်မာ ထိုင်နီစာ အသျှင်ကို ရှိခိုးရို့ နီကတ်တေ။ ထိုအသျှင်စာ ထာဝရပတ်လုံး အသက်ရှင်နီရေ။ ထိုဂေါင်းဆောင်အကြီးရို့စာ သူ၏ ပလ္လင်တော်ရှိက ကိုယ်ရို့ အဂေါင်းက သရဖူတိကို ချွတ်ထားရို့ ပြောကတ်လီရေ၊

¹¹ “အိုး အကျွန်ရို့မာ အသျှင်၊ အကျွန်ရို့မာ ထာဝရဘုရား၊ ကိုယ်တော်စာ ဘုန်းတန်ခိုး၊ ရိုသေခြင်း၊ အရာ တန်ခိုးကို ရဖို့ထိုက်တန်ပါရေ။ အကြောင်းကား ဟိသမျ အားကုံးကို ကိုယ်တော် ဖန်ဆင်းလီပါရေ၊ အရာ ကိုယ်တော်၏ အလိုတော်အတိုင်း ဟိသမျ အားကုံး ဖြစ်ပေါ်လီပါရေ၊ ယင်းအတွက်န ထို ဟိသမျ အားကုံး တည်မြဲနီပါရေ။”