মার্ক 14 - Marma

ဂေါင်းဆောင်ရို့ ယေရှုကို အသီသတ်ဖို့ ကြံခြင်း

¹ ဒေ ရက်စာ လွတ်မြောင့်ခြင်းပွဲန တဆီးမထည့်စာမုန့်ပွဲ မကျခင် နှစ်ရက်အယင်က ဖြစ်တေ။ ယဇ်ပုရောဟိတ်အကြီးရို့န ကျမ်းဆရာရို့စာ ယေရှုကို အထဲမာအထဲ ဖမ်းရို့ အသီသတ်ဖို့အတွက် နည်းလမ်း ရှာနီကတ်လီရေ။

² သူရို့စာ ပြောကတ်လီရေ၊ “ပွဲနိမာ မဖမ်းကေ့။ လူရို့အထဲမာ ရောင်းရင်းသပ်ရို့ ဖြစ်နိုင်ရေ။”

ယေရှု အဂေါင်းမာ ရီမွှီးဆီသွန်ခြင်း

³ ယေရှုစာ ဗေသနိရွာမာ ရှိမုန်နာမည်န အနူရောဂါက ကောင်းသူ အိမ်မာ ဟိလီရေ။ ယေရှု စားပွဲမာ စားသောက်ဖို့ ထိုင်လီရေခါ မိန်းမတစ်ယောက် ကောင်းကောင်း တန်ဖိုးဟိစာ ရီမွှီးဆီအစင်ကို ကျောက်ဖြူဗူးတစ်လုံးမာ ထည့်ရို့ ယူလာလီရေ။ သူစာ ကျောက်ဖြူဗူးကို ခွဲရို့ ထို ရီမွှီးဆီကို ယေရှု အဂေါင်းမာ သွန်လီရေ။

⁴ ယင်းခါ ရှိမုန်အိမ်မာ ရောက်ရို့ ဟိသူရို့အထဲက တစ်ချိုးလူရို့စာ မန်ပါရို့ ကိုယ်ရို့အချင်းချင်း ပြောကတ်လီရေ၊ “ဒေ ရီမွှီးဆီကို ဇာဖို့ ဒေပိုင် ဖျက်ဘိုက်စာလည်း?

⁵ ဒေ ရီမွှီးဆီကို ရောင်းရေဆိုကေ ငွေသားတန်းကား အချပ်သုံးရာထက် ပိုရို့ ရလီဖို့ အရာ ထိုတန်းကားတိကို ဆင်းရဲသားရို့ကို လှူဖို့ ရလီဖို့။” ယင်းပိုင် သူရို့စာ ထိုမိန်းမကို အပြစ်တင်ကတ်လီရေ။

⁶ ယင်းခါ ယေရှုစာ သူရို့ကို ပြောလီရေ၊ “ဟုတ်ပျာ၊ နင်ရို့ ဒေ မိန်းမကို ဇာဖို့ စိတ်ဒုက္ခ ပီးကတ်စာလည်း? သူကား ငါ့အတွက် ကောင်းမြတ်စာ အလုပ်ကို လုပ်နီရေ။

⁷ ဆင်းရဲသားရို့ကား အမြဲတိုင်း နင်ရို့နအတူ ဟိကတ်တေ အရာ နင်ရို့ လိုရေခါ သူရို့ကို ကူညီဖို့ ရကတ်တေ။ ယေကေလည်း ငါကား အမြဲတိုင်း နင်ရို့နအတူ ဟိဖို့ မဟုတ်။

⁸ သူစာ ကိုယ်တတ်နိုင်စာကို လုပ်လီရေ။ သူစာ ငါ့ကို သင်္ဂြိုဟ်ဖို့အတွက် အယင်ကပင် ငါ့ခန္ဓာမာ ရီမွှီးဆီ သွန်ချလီရေ။

⁹ ငါ နင်ရို့ကို အမှန် ပြောရေ၊ ကမ္ဘာတစ်လုံးမာ သတင်းကောင်းကို ဟောပြောရေခါ ဒေ မိန်းမကို အောက်မိဖို့အတွက် သူလုပ်စာ အလုပ်အကြောင်းကိုလည်း ဟောပြောရလိမည်။”

ယေရှုကို ဖမ်းပီးဖို့ ယုဒ အခွင့်ရေး ရှာခြင်း

¹⁰ ယင်းနောက် တပည့်တစ်ဆယ့်နှစ်ယောက်အထဲက ယုဒရှကာရုတ်နာမည်န တပည့်တစ်ယောက်စာ ယေရှုကို ဖမ်းပီးဖို့အကြံန ယဇ်ပုရောဟိတ်အကြီးရို့တို့ လားခလီရေ။

¹¹ သူရို့စာ ယုဒရှကာရုတ် စကားကို ကြားရို့ ကောင်းကောင်း ပျော်ကတ်လီရေ အရာ သူ့ကို တန်းကား ပီးဖို့ အာမခံကတ်လီရေ။ ယင်းခါ ယုဒစာ ယေရှုကို ဖမ်းပီးဖို့အတွက် အခွင့်ရေး ရှာရို့ နီလီရေ။

အဆုံးခေါက် လွတ်မြောင့်ခြင်းပွဲကို စားခြင်း

¹² တဆီးမထည့်စာမုန့်ပွဲ ပထမနိမာ လွတ်မြောင့်ခြင်းပွဲအတွက် သိုးဆိတ်သျှေတိကို လှီးရို့ ထားရလီရေ။ ယင်းအတွက်န တပည့်ရို့စာ ယေရှုကို မီးကတ်လီရေ၊ “ကိုယ်တော်အတွက် အကျွန်ရို့ ဇာမာ လွတ်မြောင့်ခြင်းပွဲကို အဆင်သင့် လုပ်ပါဖို့စာလည်း?”

¹³ ယေရှုစာ တပည့်နှစ်ယောက်ကို ဒေပိုင် ပြောရို့ ရွှတ်လိုက်လီရေ၊ “နင်ရို့ မြို့ထဲတို့ လားခီကတ်။ နင်ရို့ မြို့ထဲတို့ ဝင်ကတ်တေခါ ယောက်ျားတစ်ယောက် ရီအိုးခွက်တစ်လုံး ရွက်ရို့ လားစာကို မြင်ရကတ်လိမည်။ နင်ရို့ သူ့နောက်က လိုက်လီကတ်။

¹⁴ သူဝင်ဖို့စာ အိမ်က အိမ်သျှင်ကို ပြောလီကတ်၊ ‘ငါ ကိုယ့်တပည့်ရို့နအတူ လွတ်မြောင့်ခြင်းပွဲကို စားဖို့အတွက် ဧည့်ခံစာ အိမ်ခန့် ဇာမာလည်း ဟို့ ဆရာ မီးလိုက်ပါရေ။’

¹⁵ ယင်းခါ သူစာ နင်ရို့ကို အထက်မာ ဆင်ထားစာ အိမ်ခန့်ကြီး တစ်ခန့်ကို ပြပီးလိမည်။ ထိုအိမ်ခန့်မာ အားကုံးစာ အဆင်သင့် လုပ်လီကတ်။”

¹⁶ သူရို့ မြို့ထဲတို့ ဝင်လားခကတ်တေခါ ယေရှု ပြောပြလိုက်စာပိုင်တထန် ဟိသမျ အားကုံးကို မြင်ရကတ်လီရေ အရာ လွတ်မြောင့်ခြင်းပွဲကို စားဖို့အတွက် ဟိသမျ အားကုံး အဆင်သင့် လုပ်ကတ်လီရေ။

¹⁷ ယင်းနောက် နီဝင်လာရေခါ ယေရှုစာ တပည့်တစ်ဆယ့်နှစ်ယောက်ကို ယူရို့ မြို့ထဲတို့ ဝင်လီရေ။

¹⁸ သူရို့ စားသောက်ကတ်တေခါ ယေရှုစာ ပြောလီရေ၊ “ငါ နင်ရို့ကို အမှန် ပြောရေ၊ နင်ရို့အထဲက တစ်ယောက် ငါ့ကို ရန်သူရို့အလက်မာ ဖမ်းပီးလိမည် အရာ သူစာ ငါနအတူ ထိုင်ရို့ စားသောက်နီရေ။”

¹⁹ ယင်းခါ တပည့်ရို့စာ စိတ်ဒုက္ခ ရကတ်လီရေ အရာ တစ်ယောက်ပြီးကေ တစ်ယောက် မီးကတ်လီရေ၊ “အသျှင်၊ ထိုသူစာ အကျွန်ပါလော?”

²⁰ ယေရှုစာ သူရို့ကို ပြောလီရေ၊ “သူစာ ဒေ တစ်ဆယ့်နှစ်ယောက်အထဲက တစ်ယောက် ဖြစ်တေ။ သူစာ ငါနအတူ ခွက်မာ ပေါင်မုန့် နှစ်ရို့ စားနီရေ။

²¹ မနုသသားတော် အကြောင်းကို ကျမ်းစာမာ ရွီးရို့ ဟိရေအတိုင်း သူစာ သီရဖို့၊ ယေကေလည်း သူ့ကို ရန်သူရို့အလက်မာ ဖမ်းပီးဖို့သူစာ အမင်္ဂလာဟိရေ။ သူစာ လူ့ဇာတိအဖြစ် မွီးဖွားခြင်းကို မခံယူလီကေပင် သူ့အတွက် ပိုရို့ ကောင်းလီဖို့သိ။”

အသျှင်၏ ပွဲတော်မင်္ဂလာ

²² သူရို့ စားသောက်ကတ်တေခါ ယေရှုစာ ပေါင်မုန့်ကို ယူရို့ ထာဝရဘုရားကို ကျေးဇူးတင်လီရေ အရာ သူစာ ထိုပေါင်မုန့်ကို ဖဲ့ပြီးကေ တပည့်ရို့ကို ပီးရို့ ပြောလီရေ၊ “ယော၊ ယူကတ်၊ ဒေ ပေါင်မုန့် ငါ့အသား ဖြစ်တေ။”

²³ ယင်းနောက် သူစာ စပျစ်ရည် ခွက်ကို ယူရို့ ထာဝရဘုရားကို ကျေးဇူးတင်လီရေ အရာ တပည့်ရို့ကို ပီးလီရေ။ သူရို့ အားကုံးသူ ထိုခွက်က စပျစ်ရည်ကို သောက်ကတ်လီရေ။

²⁴ ယင်းခါ ယေရှုစာ သူရို့ကို ပြောလီရေ၊ “ဒေ စပျစ်ရည်စာ ငါ့သွီး ဖြစ်တေ။ လူအများကြီးအတွက် ငါ့မာ ဒေ သွီးကို သွန်းလောင်းပီးဖို့။ လူရို့အတွက် ငါ့မာ ဒေ သွီးန ထာဝရဘုရား၏ စာချုပ်အသစ်ကို ထိုးရေ။

²⁵ ငါ နင်ရို့ကို အမှန် ပြောရေ၊ ထာဝရဘုရား၏ နိုင်ငံတော်မာ ငါ စပျစ်ရည်အသစ်ကို မသောက်သကြား ငါ အရာတစ်ခါလည်း စပျစ်ရည် မသောက်ပျာ။”

²⁶ ယင်းနောက် သူရို့စာ တေခြင်းတစ်ပုဒ် ဆိုပြီးကေ မြို့က ထွက်ရို့ သံလွင်တောင်တို့ တက်ကတ်လီရေ။

ပေတရု ငြင်းဖို့စာ အကြောင်း

²⁷ ယင်းနောက် ယေရှုစာ ကိုယ့်တပည့်ရို့ကို ပြောလီရေ၊ “နင်ရို့ အားကုံးသူ ငါ့ကို စွန့်ရို့ ထွက်ဗြီးကတ်လိမည်၊ အကြောင်းကား ကျမ်းစာမာ ရွီးရို့ ဟိရေ၊ ‘ငါ သိုးဆိတ်ကျောင်းသားကို သတ်ဘိုက်လိုက်ဖို့။ ယင်းအတွက်န သိုးဆိတ်တိ ကစက်ကရဲ ဖြစ်ကတ်လိမည်။’

²⁸ ယေကေလည်း ငါ သီရာက ပြန်ရှင်ထမြောင့်ပြီးရေနောက် ငါစာ နင်ရို့ထက်အယင် ဂါလိလဲပြည်နယ်တို့ ကြွဖို့။”

²⁹ ယင်းခါ ပေတရုစာ ပြောလီရေ၊ “အားကုံးသူ ကိုယ်တော်ကို စွန့်ရို့ ထွက်ဗြီးကတ်ကေလည်း အကျွန် မထွက်ဗြီးပါ။”

³⁰ ယေရှုစာ သူ့ကို ပြောလီရေ၊ “ငါ နင့်ကို အမှန် ပြောရေ၊ ဒေနိ ညဉ့်မာ ကြက်နှစ်ချိန် မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။”

³¹ ယေကေလည်း ပေတရုစာ အားတင်ရို့ ပြောလီရေ၊ “အကျွန် ကိုယ်တော်နအတူ သီဖို့ကျကေလည်းသောက် ကိုယ်တော်ကို အကျွန် မသိ ဟို့ တစ်ခါလည်း မငြင်းပါ။” အခြားတပည့်ရို့လည်း အားကုံးသူ တစ်ခွန်းတည်း စကားကို ပြောကတ်လီရေ။

ဂေသရှေမန် ဥယျာဉ်မာ ယေရှု ဆုတောင်းခြင်း

³² ယင်းနောက် ယေရှုန သူ့တပည့်ရို့စာ ဂေသရှေမန်ဆိုစာ ဥယျာဉ်တစ်ခုတို့ ကြွလီရေ။ ယင်းနေရာမာ သူစာ တပည့်ရို့ကို ပြောလီရေ၊ “ငါ ဆုတောင်းနီသရိကို နင်ရို့ ဒေမာ ထိုင်ရို့ စောင့်နီကတ်။”

³³ ယင်းနောက် သူစာ ပေတရု၊ ယာကုပ် အရာ ယောဟန်ကို ကိုယ်နအတူ ခေါ်ယူလားခလီရေ။ ယင်းခါ သူ့မာ ကောင်းကောင်း စိတ်ဆိုးရို့ ဝမ်းနည်းလီရေ။

³⁴ သူစာ တပည့်ရို့ကို ပြောလီရေ၊ “ငါ့မာ စိတ်ဒုက္ခ ရောက်ရို့ ငါ သီဖို့စာပိုင် တွိနီဗျာ။ နင်ရို့ ဒေ နေရာမာ မအိပ်ဘိုင်းန စောင့်နီကတ်။”

³⁵ ယင်းနောက် သူစာ တစ်ဖဲ့အဝီးတို့ ကြွပြီးကေ မြေပြင်မာ အပြားဝပ်ရို့ ဆုတောင်းလီရေ၊ အကြောင်းကား ဖြစ်နိုင်ရေဆိုကေ သူဒုက္ခ-ဝေဒနာ ခံရဖို့စာအချိန် ပျောက်ကင်းစီချင်လီရေ။

³⁶ သူစာ ဒေပိုင် ဆုတောင်းလီရေ၊ “အိုး အာဗ္ဗာ၊ အကျွန့် အဖ၊ ကိုယ်တော်ကား ဟိသမျ အားကုံးကို လုပ်နိုင်ပါရေ။ အကျွန် ခံရဖို့စာ ဒုက္ခ-ဝေဒနာကို ပျောက်ကင်းစီပါ။ ယေကေလည်း အကျွန့် အလိုအတိုင်း မဟုတ်ပါ၊ ကိုယ်တော်၏ အလိုတော်အတိုင်း ဖြစ်ပါစီ။”

³⁷ ယင်းနောက် သူစာ တပည့်ရို့တို့ ပြန်လာရေခါ သူရို့ အိပ်မောကျရို့ ဟိကတ်စာကို မြင်လီရေ။ သူစာ ပေတရုကို ပြောလီရေ၊ “ရှိမုန်၊ နင် အိပ်စာလော? တစ်နာရီပင် အနိုးမနီနိုင်လော?

³⁸ အပြစ်သွေးဆောင်ခြင်းမာ မကျရအောင် မအိပ်ဘိုင်းန ဆုတောင်းနီကတ်။ စိတ်က ချင်ကေလည်း ကိုယ်ခန္ဓာစာ အားနည်းရေ။”

³⁹ ယင်းနောက် သူစာ အရာတစ်ပြန် ကြွရို့ အယင်ပိုင်တထန် ဆုတောင်းလီရေ။

⁴⁰ ယေရှု ပြန်လာရေခါ သူရို့ အရာတစ်ပြန် အိပ်မောကျရို့ ဟိကတ်စာကို မြင်လီရေ၊ အကြောင်းကား သူရို့စာ ကောင်းကောင်း အိပ်ချင်ရို့ ဟိကတ်လီရေ။

⁴¹ သူစာ တတိယခေါက် တပည့်ရို့တို့ ပြန်လာရို့ ပြောလီရေ၊ “နင်ရို့ ဒေဂုလည်း အိပ်ရို့ နားနီကတ်သိယလော? ဟုတ်ပျာ။ ကြည့်၊ မနုသသားတော်ကို လူဆိုးရို့အလက်မာ ဖမ်းပီးဖို့စာအချိန် ရောက်နီဗျာ။

⁴² ထ၊ ငါရို့ လားကတ်မည်။ ငါ့ကို ရန်သူရို့အလက်မာ ဖမ်းပီးဖို့သူ ရောက်နီဗျာ။”

ယေရှုကို ရန်သူရို့ ဖမ်းခြင်း

⁴³ ယေရှု စကားပြောနီတုံးမာ ယုဒရှကာရုတ်စာ ယင်းနေရာတို့ ရောက်လာလီရေ။ သူစာ တပည့်တစ်ဆယ့်နှစ်ယောက်အထဲက တစ်ယောက် ဖြစ်တေ။ သူနအတူ လူအများကြီး ဒုတ်န ဒါးန ပါလတ်ကတ်လီရေ။ ထိုလူရို့စာ ယဇ်ပုရောဟိတ်အကြီးရို့၊ ကျမ်းဆရာရို့ အရာ ဂေါင်းဆောင်ဝါကြီးရို့က ရွှတ်လိုက်သူရို့ ဖြစ်ကတ်တေ။

⁴⁴ ယေရှုကို ရန်သူရို့အလက်မာ ဖမ်းပီးလီသူ ယုဒရှကာရုတ်စာ ယင်းအယင်က လူရို့ကို အမှတ်တရတစ်ခု ပီးရို့ ပြောလီရေ၊ “ငါ နမ်းရို့ နှုတ်ဆက်ဖို့သူစာ ယေရှု ဖြစ်တေ။ နင်ရို့ သူ့ကို ဖမ်းရို့ အစောင့်န ယူလားကတ်။”

⁴⁵ ယင်းအတွက်န ယုဒရှကာရုတ်စာ စိုက်စိုက် ယေရှုတို့ လာပြီးကေ၊ “ဆရာ!” ဟို့ ခေါ်ရို့ ယေရှုကို နမ်းလီရေ။

⁴⁶ ယင်းခါ ထိုလူရို့စာ ယေရှုကို ဖမ်းကတ်လီရေ။

⁴⁷ ယေရှုအနားမာ ရပ်ရို့ ဟိလီသူရို့အထဲက တစ်ယောက်စာ ကိုယ့်ဒါးရှည်ကို ထုတ်လီရေ အရာ သူစာ မဟာယဇ်ပုရောဟိတ် ကျွန်ကို ခွတ်ရို့ နားရွက်တစ်ဖက် ဖြတ်ချလိုက်လီရေ။

⁴⁸ ယင်းနောက် ယေရှုစာ လူရို့ကို ပြောလီရေ၊ “သူခိုး-ဒါးမြကို ဖမ်းဖို့ လာစာပိုင် ဒုတ်န ဒါးတိကို ယူရို့ ကိုယ်ဘင်ရို့ ငါ့ကို ဖမ်းဖို့ လာကတ်စာလော?

⁴⁹ ငါ နိတိုင်း ဝိပဿနာကျောင်းမာ ကိုယ်ဘင်ရို့ ရှိက သွန်သင်ပီးရို့ နီလီရေ၊ ယေကေလည်း ကိုယ်ဘင်ရို့ ယင်းခါ ငါ့ကို မဖမ်းလီကတ်ကား! အမှန် ဘုရားသတင်းပို့သူရို့ ရွီးထားခစာ ကျမ်းစာတိ ပြည့်စုံရဖို့။”

⁵⁰ ယင်းခါ တပည့်ရို့ အားကုံးသူ ယေရှုကို စွန့်ရို့ ထွက်ဗြီးလားခကတ်လီရေ။

⁵¹ ယေကေလည်း လူပျိုတစ်ယောက် ကိုယ်ရုံတစ်ပိုင်းတည်း ရုံရို့ ယေရှု နောက်က နောက်က လိုက်လီရေ။

⁵² လူရို့ သူ့ကို ဖမ်းကတ်တေခါ သူစာ ကိုယ်ရုံကို ချွတ်ဘိုက်ခရို့ ခခဲတတုံး ထွက်ဗြီးလားခလီရေ။

မဟာတိုင်ဘင်အဖွဲ့သားရို့ ယေရှုကို စစ်ဆေးခြင်း

⁵³ ထိုလူရို့စာ ယေရှုကို ဖမ်းရို့ မဟာယဇ်ပုရောဟိတ်တို့ ယူလားခကတ်လီရေ။ ယင်းနေရာမာ ယဇ်ပုရောဟိတ်အကြီးရို့၊ ဂေါင်းဆောင်ဝါကြီးရို့ အရာ ကျမ်းဆရာရို့စာ တစ်စုတည်း စုရို့ ဟိကတ်လီရေ။

⁵⁴ ယင်းခါ ပေတရုစာ အဝီးကနီရို့ ယေရှု နောက်က နောက်က လိုက်ပြီးကေ မဟာယဇ်ပုရောဟိတ် အိမ်တတ်ဂွင်းတို့ ဝင်လီရေ။ အရာ သူစာ ယင်းနေရာမာ အစောင့်သားရို့နအတူ ထိုင်ပြီးကေ မီးနှူရို့ နီလီရေ။

⁵⁵ ယဇ်ပုရောဟိတ်အကြီးရို့န မဟာတိုင်ဘင်အဖွဲ့မာ ဟိသမျ လူရို့စာ ယေရှုကို သီဒါဏ်ပီးဖို့အတွက် မုတ်သားသက်သီ ရှာကတ်လီရေ၊ ယေကေလည်း သူရို့စာ ယေရှုကို သီဒါဏ်ပီးဖို့ ရလတ်အောင် သက်သီ တစ်ခုလည်း မရကတ်လီ။

⁵⁶ ယေရှုကို ဆန့်ကျင်ရို့ လူအများကြီး မဟုတ်မမှန်စာ သက်သီ ပီးကတ်လီရေ၊ ယေကေလည်း သူရို့ ပီးကတ်စာ သက်သီတိစာ မကိုက်ညီလီ။

⁵⁷ ယင်းခါ လူလိုင်းကေယောက် ထရို့ သူ့ကို ဆန့်ကျင်ရို့ ဒေပိုင် မဟုတ်မမှန်စာ သက်သီ ပီးကတ်လီရေ၊

⁵⁸ “‘လူအလက်န ဆောက်စာ ဝိပဿနာကျောင်းကို ငါ ဖြိုချဘိုက်လိုက်ဖို့ အရာ သုံးရက်အထဲတွင်းမာ လူအလက်န မဆောက်စာ ဝိပဿနာကျောင်းကို ငါ ဆောက်ဖို့’ ဟို့ သူပြောစာစကားကို အကျွန်ရို့ ကြားလီကတ်ပါရေ။”

⁵⁹ ယေကေလည်း ဒေချိန်းခေါက်လည်း သူရို့ ပီးကတ်စာ သက်သီ မကိုက်ညီလီ။

⁶⁰ ယင်းခါ မဟာယဇ်ပုရောဟိတ်စာ အားကုံးသူ ရှိက ထရို့ ယေရှုကို ပြောလီရေ၊ “ဒေသူရို့ နင့်ကို ဆန့်ကျင်ရို့ ဇာ ဇာ သက်သီ ပီးကတ်တေလည်း? နင် တစ်ခုလည်း အဖြေမပီးဗျာလော?”

⁶¹ ယေကေလည်း ယေရှုစာ အဖြေမပီးဘိုင်းန တိန်းရို့ နီလီရေ။ မဟာယဇ်ပုရောဟိတ်စာ အရာတစ်ပြန် သူ့ကို မီးလီရေ၊ “နင် မင်္ဂလာနပြည့်စုံစာ ထာဝရဘုရား၏ သားတော်ဆိုစာ ခရစ်တော်လော?”

⁶² ယေရှုစာ ပြောလီရေ၊ “ဟုတ်တေ၊ ငါ ထိုသူ ဖြစ်တေ။ နောက်အနာဂါတ်မာ မနုသသားတော်ကို အနန္တတန်ခိုးနပြည့်စုံစာ ထာဝရဘုရား၏ ညာဖက်က ထိုင်ရို့ဟိစာန ဂေါင်းခင်မာ မိုးရိပ်ထက်က တက်ရို့ ကြွလာစာကို ကိုယ်ဘင်ရို့ မြင်ရကတ်လိမည်။”

⁶³ ယင်းခါ မဟာယဇ်ပုရောဟိတ်စာ ကိုယ့်အဝတ်ကို ဆုတ်ရို့ ပြောလီရေ၊ “ငါရို့မာ အရာ သက်သီပီးဖို့ ဇာလိုသိယလည်း?

⁶⁴ ဒေဂု ဒေသူ ထာဝရဘုရားကို တရိုက်ရို့ စကားပြောစာကို ကိုယ်ဘင်ရို့ ကိုယ်တိုင် ကြားလိုက်ကတ်တေ။ ကိုယ်ဘင်ရို့ ဇာပိုင် မှတ်ကတ်တေလည်း?” ယင်းခါ သူရို့ အားကုံးသူ ယေရှုကို သီဒါဏ်ခံဖို့ ထိုက်တန်ရေ ဟို့ ဆုံးဖြတ်ကတ်လီရေ။

⁶⁵ ယင်းခါ လူလိုင်းကေယောက် သူ့ခန္ဓာမာ တန်းဆီးဘိုက်ကတ်လီရေ အရာ သူ့ကို မျက်နှာဖုံးပြီးကေ လက်သီး ထိုးရို့ မီးကတ်လီရေ၊ “နင် ဘုရားသတင်းပို့သူ မဟုတ်လော? ပြောကြည့်န၊ နင့်ကို အသူဘုတ်စာလည်း?” ယင်းနောက် အစောင့်သားရို့စာ သူ့ကို ယူလားရို့ ပါးသတ်ကတ်လီရေ။

ယေရှုကို ပေတရု ငြင်းခြင်း

⁶⁶ ပေတရုစာ အောက်က အိမ်တတ်ဂွင်းမာ နီလီရေခါ မဟာယဇ်ပုရောဟိတ်မာ ကျွန်မသျှေတစ်ယောက်စာ ယင်းနေရာတို့ လာလီရေ။

⁶⁷ သူစာ ပေတရုကို မီးနှူရို့ မြင်လီရေ အရာ သူ့ကို အလှပ ကြည့်ရို့ ပြောလီရေ၊ “ဒေ အမောင်လည်းသောက် ထိုနာဇရက်မြို့သျှေသား ယေရှုနအတူ ပါလီရေ။”

⁶⁸ ယေကေလည်း ပေတရုစာ ငြင်းလီရေ၊ “နင် ဇာ ပြောရေလည်းဆိုစာကို ငါ သိလည်း မသိ၊ နားလည်းမလည်။” သူစာ ထိုစကားကို ပြောရို့ ပြင်က လမ်းခဝနားတို့ လားလီရေ။ ယင်းခါ ချက်ချင်း ကြက်ဖတစ်ကောင် တွန်လီရေ။

⁶⁹ ထိုကျွန်မသျှေစာ ပေတရုကို မြင်ရို့ သူ့အနားမာ ရပ်ရို့ ဟိလီသူရို့ကို ပြောလီရေ၊ “ဒေ အမောင် ထိုလူရို့အဖွဲ့သား တစ်ယောက် ဖြစ်ပါရေ။”

⁷⁰ ပေတရုစာ အရာတစ်ပြန် ငြင်းလီရေ။ တစ်နားနီရေခါ သူ့အနားမာ ရပ်ရို့ ဟိလီသူရို့လည်း ပြောကတ်လီရေ၊ “နင် အမှန် ထိုလူရို့အထဲက တစ်ယောက်ရာ၊ အကြောင်းကား နင်လည်းသောက် ဂါလိလဲပြည်နယ်သားရာ။”

⁷¹ ယင်းခါ ပေတရုစာ အကျိန်ကိုင်ရို့ ပြောလီရေ၊ “ငါ မုတ်သားစကား ပြောရေဆိုကေ ထာဝရဘုရား ငါ့ကို ကျိန်ဆဲထည့်ပါစီ။ ငါ ယင်းသူကို မသိ။”

⁷² အရာ ချက်ချင်း ဒုတိယခေါက် ကြက်တွန်လီရေ။ ယင်းအယင်က ယေရှုစာ ပြောလီရေ၊ “ကြက်နှစ်ချိန် မတွန်ခင်အယင်က နင် ငါ့ကို မသိ ဟို့ သုံးခေါက်တိုင်အောင် ငြင်းလိမည်။” ယင်းခါ ပေတရုစာ ယေရှု ပြောလီစာ စကားကို တွက်ရရို့ ငိုလီရေ။