ইব্রীয় 3 - Marma

မောရှေထက် ယေရှု ကြီးမြတ်ခြင်း

¹ ယင်းအတွက်န သန့်ရှင်းစာ ညီအစ်ကိုမောင်နမှရို့၊ နင်ရို့ အားကုံးသူ ထာဝရဘုရား၏ ခေါ်ခြင်းကို ခံရကတ်ပျာ။ နင်ရို့ ယေရှု အကြောင်းကို ကောင်းကောင်း စိတ်ဝင်စားကတ်။ ထာဝရဘုရားစာ ယေရှုကို ငါရို့တို့ ရွှတ်လိုက်လီရေ။ ယေရှုစာ မဟာယဇ်ပုရောဟိတ်တစ်ပါး ဖြစ်တေ။ ငါရို့ သူ့ကို ကျုံကတ်တေ။

² ထာဝရဘုရားစာ ယေရှုကို မဟာယဇ်ပုရောဟိတ် အရာမာ ခန့်ထားလီရေ။ မောရှေစာ ထာဝရဘုရား၏ မိသားစုအထဲမာ သစ္စာအပြည့်န ဟိသမျ တာဝန်ကို ထန်းဆောင်လီရေ။ ယင်းပိုင်တထန် ယေရှုလည်းသောက် ထာဝရဘုရား၏ ရှိမာ သစ္စာ ဟိလီရေ။

³ အိမ်ဆောက်သူစာ အိမ်ထက် ပိုရို့ အများကြီး ချီမွမ်းခြင်းကို ခံရရေ။ ယင်းပိုင်တထန် ယေရှုလည်းသောက် မောရှေထက် ပိုရို့ အများကြီး ဘုန်းတန်ခိုးကို ခံရဖို့ ထိုက်တန်ရေ။

⁴ အိမ်တိုင်းကို တစ်ယောက် မဟုတ်ကေ တစ်ယောက် ဆောက်ကတ်တေ၊ ယေကေလည်း ဟိသမျ အားကုံးကို ထာဝရဘုရား ဆောက်လီရေ။

⁵ မောရှေစာ သစ္စာဟိစာ ကျွန်တစ်ယောက်အဖြစ် ထာဝရဘုရား၏ မိသားစုကို ပြုဇုလီရေ။ အရာ နောက်အနာဂါတ်မာ ထာဝရဘုရား ဟောပြောဖို့စာ အကြောင်းတိကို သူစာ လူရို့ဘားမာ ပြောပြလီရေ။

⁶ ယေကေလည်း ခရစ်တော်စာ သားတော်အဖြစ် ထာဝရဘုရား၏ မိသားစုကို သစ္စာအပြည့်န အုပ်ချုပ်ထားရေ။ ငါရို့ ကျုံသူရို့ရာ ထာဝရဘုရား၏ မိသားစု ဖြစ်ကတ်တေ။ ငါရို့စာ ရဲဝံ့သတ္တိန ပျော်ပါးခြင်းကို ထားရို့ အဆုံးတိုင်အောင် ထာဝရဘုရားကို မျှော်လင်းရို့ နီရေဆိုကေ ငါရို့ အမှန် ထာဝရဘုရား၏ မိသားစု ဖြစ်ကတ်တေ။

ထာဝရဘုရား၏ လူရို့ အနားရဖို့စာ အကြောင်း

^7-8 ယင်းအတွက်န သန့်ရှင်းသောဝိညာဉ်တော်စာ ပြောလီရေ၊ “ဒေနိ နင်ရို့ ထာဝရဘုရား၏ စကားတော်ကို နားထောင်ကတ်တေဆိုကေ နင်ရို့မာ အဖိုးအဖီးအစိုင်လာရို့ပိုင် နင်ရို့ စိတ်နှလုံးကို မကျန်းစီကေ့! သူရို့စာ ငါ့ကို ဆန့်ကျင်ဖက် လုပ်လီကတ်တေ၊ အရာ သူရို့စာ သဲကန္တာရတောပြင်မာ ငါ့ကို စုံစမ်းလီကတ်တေ။

⁹ နင်ရို့မာ အဖိုးအဖီးအစိုင်လာရို့စာ သဲကန္တာရတောပြင်မာ ဟိကတ်လီရေ၊ အရာ သူရို့စာ နှစ်ပေါင်းလေးဆယ်ပတ်လုံး ငါ့အလုပ်တိကို မြင်ကတ်လီရေ။ ယေကေလည်း သူရို့စာ ငါ့သည်းခံခြင်းကို စုံစမ်းလီကတ်တေ။

¹⁰ ငါ ဒေါသထွက်ရို့ သူရို့ကို ပြောလီရေ၊ ‘ဒေသူရို့မာ စိတ်နှလုံး အမြဲတိုင်း မှားယွင်းစာလမ်းမာ ဟိရေ၊ သူရို့ တစ်ခါလည်း ငါ့လမ်းကို မသိလီကတ်။’

¹¹ ယင်းအတွက်န ငါ ဒေါသထွက်ပြီးကေ အကျိန်ကိုင်ရို့ ပြောလီရေ၊ ‘သူရို့ တစ်ခါလည်း ငါ့အနားယူစာနေရာတို့ ဝင်ရကတ်လိမည် မဟုတ်။’”

¹² ငါ့ ညီအစ်ကိုမောင်နမှရို့၊ နင်ရို့ သတိထားကတ်! နင်ရို့အထဲမာ တစ်ယောက်လည်း မယုံသင်္ခါစိတ်န ဆိုးယုတ်စာစိတ် မဟိစီကေ့။ ယင်းပိုင်ဇတ် စိတ်စာ အသက်သျှင် ထာဝရဘုရားန ဝီးကွာစီရေ။

¹³ ယင်းထက်ပင် နင်ရို့ အသက်အရှင် ဟိသရိကာလာပတ်လုံး နိတိုင်း နင်ရို့ တစ်ယောက်ကို တစ်ယောက် အားပီးကူညီနီကတ်။ ယင်းပိုင်ဆိုကေ နင်ရို့ စိတ်နှလုံးစာ အပြစ်လိမ်လှည့်ခြင်းမာ ကျရို့ ကျန်းလိမည် မဟုတ်၊

¹⁴ အကြောင်းကား ငါရို့မာ ပထမဆုံး ဟိလီစာ ကျုံခြင်းတရားကို ငါရို့ အဆုံးတိုင်အောင် နနောင်းတည်းရို့ ထားရေဆိုကေ ငါရို့စာ ခရစ်တော်၏ လုပ်ဖေါ်ကိုင်ဖက် ဖြစ်ကတ်ပျာဆိုစာကို လူရို့ သိရကတ်လိမည်။

¹⁵ ကျမ်းစာမာ ရွီးရို့ ဟိရေ၊ “ဒေနိ နင်ရို့ ထာဝရဘုရား၏ စကားတော်ကို နားထောင်ကတ်တေဆိုကေ နင်ရို့မာ အဖိုးအဖီးအစိုင်လာရို့ပိုင် နင်ရို့ စိတ်နှလုံးကို မကျန်းစီကေ့!”

¹⁶ ပြောကြည့်န၊ ထာဝရဘုရား၏ စကားတော်ကို ကြားရို့ပင်လည်း ဆန့်ကျင်ဖက်လုပ်သူရို့စာ အသူရို့လည်း? အီဂျစ်ပြည်က မောရှေ ထုတ်ယူခသူရို့ မဟုတ်လော?

¹⁷ အရာ နှစ်ပေါင်းလေးဆယ်ပတ်လုံး ထာဝရဘုရား အသူရို့ကို ဒေါသထွက်လီစာလည်း? အပြစ်အကြောင်းန သဲကန္တာရတောပြင်မာ လဲရို့ သီလားခသူရို့ကို မဟုတ်လော?

¹⁸ “သူရို့ တစ်ခါလည်း ငါ့အနားယူစာနေရာတို့ ဝင်ရကတ်လိမည် မဟုတ်” ဟို့ ထာဝရဘုရား အသူရို့ကို အကျိန်ကိုင်ရို့ ပြောလီစာလည်း? ထာဝရဘုရား၏ စကားတော်ကို မလိုက်နာသူရို့ကို မဟုတ်လော?

¹⁹ ယင်းအတွက်န ငါရို့ မြင်ရစာကား၊ သူရို့စာ ထာဝရဘုရားကို မကျုံလီရေအတွက်န သူရို့ အနားယူစာနေရာတို့ မဝင်ရကတ်လီ။