ƐSITA 8 - Mende Bible Portions

Ti Ndeilɔ Juubleisia ma kɔɔ tia bɛ ti Lapi Gbɔma

¹ Yee foloi na ma, Mahei Aasuɛlɔsi i Haman wɛlei velɔ nyaha Mahei Ɛsita wɛ, Juubleisia ti juwui; kɛ Mɔldekai wanga mahei gulɔ, ajifa Ɛsita yɛ ndenga yɛ yee mia a ngie ngi gama.

² Na wooma mahei ngi lokohu gani wumbuilɔ na i yɛ kpuani Haman yeya, kɛ i fenga Mɔldekai wɛ. Fale Ɛsita i Mɔldekai loilɔ Haman wɛlɛ mahu.

³ Na wooma Ɛsita yɛpɛlɔ gbɔma mahei gama; i gulailɔ ngi gɔwɔbu, a wɔlɔ tawao a ngi maanɛnɛ kɔɔ i Haman Agagaitimɔi giliya nyamui yaa wote kɛ hindei na i yɛ hugbatɛni Juubleisia va.

⁴ Mahei i kanigbɔlu likpɔi lamboilɔ Ɛsita leenga,

⁵ kɛ Ɛsita hiyenga kɛ i loonga mahei gulɔ. I ndeilɔ yɛɛ, “Ina i nɛɛlɔ mahei wɛ, tawao ina nya hinda nɛɛnga ngi wɛ, tawao ina hindei wɔnangɔi mahei gulɔ, tawao ina i lumailɔ ma, ti kɔleisia nyɛin gbekpa va kɔlei nasia gulɔ Haman Agagaitimɔi Hamidata hindoloi i nyɛini Juubleisia waa va mahei gbaalateisia gbi hu.

⁶ Ajifa nga yee gu ngi kpundei nasia lɔ ti wama nya nungeisia mahu? Ɔɔ nga yee loo ngi hunyani na lɔ wama nya nungeisia gama?”

⁷ Na wooma Mahei Aasuɛlɔsi ndeilɔ nyaha Mahei Ɛsita ma kɛ Juumɔi Mɔldekai ma yɛɛ, “A tɔ lɛ, ngi Haman wɛlɛ venga Ɛsita wɛ, tawao ti ngi hɛlɛnga numu hɛlɛ wuli ma, ajifa i yɛ gilinga Juubleisia waa va.

⁸ Ba nyɛinlɔ kia ba lola kɔlooni Juubleisia ma, mahei biyei hu, kɛ bi nda gbɔwunga a mahei gani; ajifa sawei na nyɛingɔ mahei biyei hu tawao nda gbɔwungɔ a mahei gani numu ɛɛ nga wote.”

⁹ Ti mahei gɔlɔ nyɛinbleisia lolilɔ a watii na, ngawui yee sawei hu, na yɛni a Sivan yawui, foloi yee nuu gbɔyɔngɔ mahu sawei ma; kɛ ti sawei nyɛinga, kɔlooni na kpɛlɛɛ ma Mɔldekai ndeni, Juubleisia gama, mahawu mahangeisia gama, gɔmineisia, kɛ kpaalata mahubleisia i hiye India i too Itiopia, kpaalata hɔndɔ yila kalɛ nuu gbɔyɔngɔ mahu wɔfila (127), kpaalata gbi ngi nda gɔlɔ nyɛinyii hu kɛ nungeisia gbi gama ti nda gɛnyɛyei hu, kɛ gbɔma Juubleisia gama ti gɔlɔ nyɛinyii hu, kɛ ti gɛnyɛyei hu.

¹⁰ I kɔlei nyɛinlɔ Mahei Aasuɛlɔsi biyei hu, i ti laa gbɔwu a mahei gani, kɛ i ti yoyonga a tutuisia ti heini soisia mahu ti ti makɛni mahei huangeisia lia.

¹¹ Kɔlei jisia hu wee mahei pielɔ Juubleisia ti yɛ ta waa gbi hu ti lɛma kɔɔ ti ti lɛvuisia mabawo, ti nasia jukuu, ti ti waa tawao kɔɔ ti kɔgulu gbi lɛvui hunyani ɔɔ kpaalatei na a kɔ wɛlɛ ti ma, taa ti lengeisia kɛ ti nyahangeisia, kɛ ti hakeisia gapu va,

¹² folo yakpe ma Mahei Aasuɛlɔsi gbaalateisia kpɛlɛɛ hu, foloi yee puu mahu sawei ma, ngawui yee puu mahu felei hu, na yɛni a Adaa yawui.

¹³ Mahoungɔ ti kɔlɔ nyɛingɔ ve kia sawei na kpaalata gbi hu kɛ ti pienga nungeisia gbi ti kɔɔ, tawao Juubleisia ta yɛlɔ magbatɛ hu foloi na ma kɔɔ ti hinda hunyɔɔ ti juwuisia gama.

¹⁴ Fale tutuisia ti heilɔ maha joisia mahu ti li kaka na wie va mahei kpɔndani ti ma. Ti yee sawei ji veilɔ Susa la wai hu.

¹⁵ Na wooma Mɔldekai gbuailɔ mahei gulɔ, maha loma guhangaa ti ngi ma bulungɔ tawao kolengɔ, taa kanigbɔlu maha bɔlɔ waa, kɛ pɔpu gula nyande vɛngɔ, kia Susa la wai yɛ a yele gula a kohunɛɛ.

¹⁶ Juubleisia va fofo kɛ kohunɛɛ kɛ baagɔma yɛlɔ na.

¹⁷ Kpaalata gbi hu kɛ ta waa gbi hu, mia gbi mahei yɛpei kɛ ngi jawei wani na, kohunɛɛ yɛlɔ na Juubleisia lia, mɛhɛɛ mɛ gomɛ kɛ ndɛvu volo. Li ma gulɔ, nungaa gboto ti ndɔɔlei hu ti ndeilɔ tɛɛ Juubleisia mia a tie ajifa Juubleisia ti ma luwei gulanga ti ma.