ƐSITA 5 - Mende Bible Portions

Ɛsita i Mahei kɛ Haman Lolinga Mɛhɛɛ Mɛ Gomɛ ma

¹ Foloi yee sawei ma, Ɛsita i ngi nyaha maha mayii wielɔ kɛ i loonga kitilewemei gohu wɛlei bu mahei wɛlei bu, mahei jɛmɛɛ lengahu. Mahei yɛ heini ngi maha heimei lɔ ngi wɛlei gohu maha wɛlei lamei leengahu.

² Kia lekee mahei i nyaha Mahei Ɛsita lɔni i looni kitilewemei, ngi hinda nɛɛlɔ ngi wɛ, kɛ i ngi ganigbɔlu likpɔi loonga ngi leenga na yɛ ngi yeya. Na wooma Ɛsita liilɔ kɛ i jaanga a tikpɔi mahui.

³ Mahei ndeilɔ ngi ma yɛɛ, “Gbɛ mia, nyaha Mahei Ɛsita? Gbɔɔ bi longɔ la? Ta felɔ bi wɛ, ina bɛ nya mahawui yee kaka yila le.”

⁴ Na wooma Ɛsita ndeilɔ yɛɛ, “Ina i nɛɛlɔ mahei wɛ, mahei kɛ Haman ti wa ha mɛhɛɛ mɛ gomei na hu ngi hu gbatɛnga mahei va.”

⁵ Na wooma mahei ndeilɔ yɛɛ, “Wa a Haman kaka, kɔɔ mu na wie Ɛsita longɔ la.” Fale mahei taa Haman ti wailɔ mɛhɛɛ mɛ gomei hu na Ɛsita i yɛ hugbatɛni.

⁶ Kia ti yɛ a ndɔ gbɔli, mahei ndeilɔ Ɛsita ma yɛɛ, “Gbɛ mia bi longɔ la? A wielɔ bi gama. Tawao gbɔɔ bi mɔli ma? Kɛ bɛ nya mahawui ye kaka yila le, a wielɔ.”

⁷ Na wooma Ɛsita ndeilɔ yɛɛ, “Ji mia nya longɔ la kɛ na nya mɔli le:

⁸ Ina nya hinda nɛɛnga mahei wɛ, tawao ina i nɛɛnga mahei wɛ kɔɔ i na ve nya longɔ la, tawao i na ve nya longɔ ngi mɔli, mahei taa Haman ti wa sina mɛhɛɛ mɛ gomei na hu ngi hugbatɛnga ti va, tawao na wooma nga pielɔ kia mahei i ndenga la.”

Haman Hugbatɛ Wienga Mɔldekai Waa va

⁹ Haman gbuailɔ a foloi na a kohunɛɛ kɛ ndiinɛɛ. Kɛɛ ji Haman i Mɔldekai lɔni mahei gɔlɔi lama, kɛ i tɔnga kɛ ii hiyeni tawao ngi maa ii gbɛlini ngi gulɔ, ngi lii lewelɔ Mɔldekai ma;

¹⁰ na hu gbi Haman tayekpe huhouilɔ, kɛ i yaa ngi yee kohu. Na wooma i pielɔ ti ngi ndiamɔisia kɛ ngi nyahei Sɛlɛsi loli,

¹¹ tawao Haman i ngi gbateisia ti nyandeyii lelɔ ti ma, ngi hingalengeisia ti jikei, kɛ toomeisia mahei i yɛ fenga ngi wɛ, kɛ kia i yɛ ngi loonga mahangeisia mahu kɛ nasia ta yenge mahei va.

¹² Haman yɛpɛlɔ gbɔma yɛɛ, “Nyaha Mahei Ɛsita ii mɛhɛɛ mɛ gomei hugbatɛni numu gbi va kɛlekee nya vulii kɛ mahei. Sina bɛ i nya lolinga, maa mahei.

¹³ Na hu gbi ji kpɛlɛɛ ɛɛ kpekpeya wie a nge ina lekee nyaa Juumɔi Mɔldekai lɔma heini mahei gɔlɔi lama.”

¹⁴ Na wooma ngi nyahei Sɛlɛsi kɛ ngi ndiamɔisia gbi ti ndeilɔ ngi ma tɛɛ, “Ti numu hɛlɛmei gbatɛ ngi yaalɛyii hou nuu gbɔyɔngɔ mahu lɔɔlu, tawao a ngendei nde mahei ma kɔɔ ti Mɔldekai hɛlɛ ma; na wooma wa mahei a li mɛhɛɛ mɛ gomei hu a kohunɛɛ.” Ndahin ji nɛɛlɔ Haman wɛ, kɛ i numu hɛlɛmei gbatɛnga.