ƐSITA 4 - Mende Bible Portions

Mɔldekai Kpɔma Mɔlinga Ɛsita gama

¹ Ji Mɔldekai kɔlɔni gbɔɔ kpɛlɛɛ i yɛ wienga, i ngi maa guleisia blamblailɔ, i bɛki gula hawa yililɔ kɛ nduvui, kɛ i ta waa blanga ndia, a yele lakpa waa gula;

² i lilɔ mahei gɔlɔi lamei, ajifa numu gbi ɛɛ jɔkɔ mahei gɔlɔi hu a bɛki gula.

³ Kpaalata gbi hu, mia gbi lekee mahei layei kɛ ngi jawei wanga na, ngɔlɔwoo a yɛlɔ Juubleisia lia, a suu houla kɛ ngɔlɔwoo kɛ ndii yani, tawao ti gbotoma ta lalɔ bɛki gulei hu kɛ nduvui hu.

⁴ Ji Ɛsita nyaha bɔilopoisia kɛ numu nuningɔisia ti wani ti nde ngi ma, nyaha mahei lii nyani lɔ wa; i kulangaa yoyoilɔ Mɔldekai mayili va, kɔɔ nahi i ngi bɛki gulei gbua ngi ma; kɛɛ i mawalilɔ ti ma.

⁵ Na wooma Ɛsita i Hataki lolilɔ mahei numu nuningɔisia yee ngila, na ti yɛ loko looni ngi ma ngi va, kɛ i ndenga ngi ma kɔɔ i li Mɔldekai gama kɔɔ i kɔɔ gbɔɔ i yɛ wie kɛ gbɛ va le i yɛ wie.

⁶ Hataki lilɔ Mɔldekai gama ngiti wai yaa ta wai hu mahei gɔlɔi lamei gulɔ,

⁷ kɛ Mɔldekai hugɛnga a ngie gbɔɔ i yɛ wienga a ngie, kɛ navoi jikei na Haman yɛ ndenga fe va mahei lamagbatɛmeisia Juubleisia ti waa va.

⁸ Mɔldekai bɛ i sawa nyɛingɔ velɔ ngi wɛ na ti feni Susa ti waa va, kɔɔ i magɛ a Ɛsita i hungɛ a ngie, tawao i nde ngi ma li va mahei gama kɔɔ i ngi maanɛnɛ, i manuma gɛ a ngi nungeisia.

⁹ Hataki lilɔ kɛ i hungɛnga a Ɛsita gbɔɔ Mɔldekai i yɛ ndeni.

¹⁰ Na wooma Ɛsita yɛpɛilɔ Hataki gama kɛ i ngowili venga ngi wɛ Mɔldekai va, yɛɛ,

¹¹ “Mahei bɔilopoisia gbi kɛ nungei nasia ti mahei gbaalateisia hu ti kɔɔlɔ kɛ ina hindo gbi ɔɔ nyaha gbi lilɔ mahei gama kitilewemei gohui nahi tii ngi lolini, sawa yakpe mia i na; ti kpɛlɛɛ ta ti waalɔ. Kɛlekee mahei i ngi ganigbɔlu likpɔi lambo numu gama, ta mia a pie numu na i yɛ ndɛvu hu. Nya vulii tii yaa nya lolini wa va mahei gama folo nuu gbɔyɔngɔ mahu puu (30) va.”

¹² Ji ti ndeni Mɔldekai ma gbɔɔ Ɛsita i yɛ ndeni,

¹³ Mɔldekai ndeilɔ ti ma Ɛsita gbɛmbo va, “Baa gili la kɛ mahei wɛlɛbu ba welalɔ tewengɔ Juublaa wekeisia gbi ma.

¹⁴ Ajifa ina bi londoilɔ a watii ji nyikɔ, laha kɛ mbawoya a walɔ Juubleisia gama a gbua kaka weka ma, kɛɛ bia kɛ bi kɛkɛ bondei wa haalɔ. Yee mia kɔlɔngɔ? Kɛnga bi wanga mahaya baagɔmei bu lɔ a watii ji nyikɔ.”

¹⁵ Na wooma Ɛsita ndeilɔ Mɔldekai ma yɛɛ,

¹⁶ “Li, bi Juubleisia kpɛlɛɛ lɛma ti Susa, tawao wu suu hou nya va, tawao waa mɛhɛɛ mɛ ɔɔ waa kpɔli hinda wie folo sawa va, kpindii ɔɔ folo. Nya, kɛ nya nyahabɔilopoisia mua bɛ ma suuhou lɔ kia wa pie. Na lewengɔi wooma, nga lilɔ mahei gama, kia bɛ sawei ii kɛni hii; tawao ina ngi haailɔ, ngi haa.”

¹⁷ Mɔldekai lilɔ na wooma kɛ i na gbi wienga kia Ɛsita i ndeni la ngi ma.