Eclesiastes 1 - Ti Baro a Naimbag a Damag Biblia

Awan Serserbi ti Biag

¹ Daytoy dagiti sao ti Mannursuro, ti anak ni David a nagari idiay Jerusalem.

² Awan serserbi ti amin a banag. Awan serserbida, kinuna ti Mannursuro. Awan serserbi ti biag; wen, awan amin serserbina.

³ Iti unos ti panagbiagmo, agtrabaho ken agbannogka ngem ania ti pakakitaan iti amin nga aramidmo?

⁴ Tumaud ken lumabas dagiti kaputotan ngem agtalinaed ti daga nga awan pagbaliwanna.

⁵ Lumgak ken lumnek pay laeng ti init; agsubli iti naggapuanna ket masapul a mangrugi manen.

⁶ Agpa-abagatan ti angin, agpa-amianan—agrikusrikos sa agsubli manen.

⁷ Agturong iti taaw ti amin a karayan, ngem saan a mapno ti taaw. Agsubli ti danum iti pangrugian dagiti karayan ket mangrugi manen.

⁸ Agtungpal iti pannakautoy ti amin a banag ket narigat a sapulen dagiti balikas a mangyebkas iti daytoy. Saan a mapnek ti matatayo kadagiti makitana; saan met a mapnek ti lapayag kadagiti mangngegna.

⁹ Maulit-ulit laeng dagiti pasamak. Ti naaramid idin, maaramidto manen. Awan ti baro a banag iti entero a lubong.

¹⁰ Awan ti makapagkuna nga adda baro a banag. Awan! Ngem napasamak amin daytoy idi adayo pay a mayanaktayo.

¹¹ Awan ti makalagip iti napasamak iti napalabas. Kadagiti aldaw a mapasungad awanto ti makalagip kadagiti mapasamak ita ken iti masakbayan.

Dagiti Padas ti Mannursuro

¹² Siak ti Mannursuro a nangituray iti Israel manipud iti Jerusalem.

¹³ Inkeddengko nga usigen ken adalen dagiti amin a mapaspasamak ditoy lubong. Intuding kadatayo ti Dios ti nasaem a kinadaksanggasat.

¹⁴ Naimatangak ti amin a napasamak iti daytoy a lubong, ket nasarakak nga awan kapaypay-anda; mayarig iti panangkamat iti angin.

¹⁵ Dimo malinteg ti killo. Dimo mabalin a bilangen ti awan.

¹⁶ Kinunak iti bagik, “Nagbalinak a naindaklan a tao. Nasirsiribak nga adayo ngem iti siasinoman a sinarunok iti trono ti Jerusalem. Ammok ti pudno a kaipapanan ti kinasirib ken pannakaammo.”

¹⁷ Inkeddengko nga adalen ti paggiddiatan ti pannakaammo ken kinamaag, kinasirib ken kinamauyong. Ngem natakuatak a kasko la kamkamaten ti angin.

¹⁸ Ad-adu ti pakariribukam no nasirsiribka; ad-adu met ti sagabaem no adu ti maammoam.