Orubara 8 - Ebibulia 2001

Etara n'ekinara kyazo

¹ Omukama akagambira Musa ati,

² “Ogambire Aroni oti, K'oragya kuhemba etara omushanju, ozakize mbali ekinara kyazo kilikuleba.”

³ Aroni yakorakwo, yahemba etara ezo kwakiza mbali ekinara kyazo kyabaire kilebire, nk'okwo Omukama yahangiire Musa.

⁴ Kandi ekinara kikaba kihesirwe kiti: Kyona kikaba kikozirwe omu zahabu kwema aha maguru kugoba aha matagi. Ekinara ekyo Musa akakikora omu ntwaza eyo Omukama yamuragiire.

Okweyeza n'okwezibwa kw'Abalevita

⁵ Omukama akagambira Musa ati,

⁶ “Oyahure Abalevita omu Baisiraeli, obeze.

⁷ Orwo oraija kubeza ogire oti: Obamaisilire amaizi g'okubahasilira, buli omoi orumoiso rumurabe aha mubili gwona, bafure ebijwaro byabo, bere.

⁸ Ahanyuma bakwate enumi y'ekigeto hamoi n'ekihongo ky'ensano nungi ekigigendaho, etabirainwe n'amajuta, naiwe oteho ekigeto ky'enumi aha rw'enyatano y'amafu.

⁹ Abalevita obateke omu maisho g'Eihema ly'Omuterano, omare ohuruze enteko yona ya Isiraeli.

¹⁰ Orwo oramara kuteka Abalevita omu maisho g'Eihema, Abaisiraeli babatekeho emikono.

¹¹ Aroni ahongere Omukama Abalevita abo, ekyo kihongo ky'Abaisiraeli ky'okuchunkeza, bate nibakolera Omukama.

¹² Ahanyuma Abalevita bate emikono aha mitwe y'enumi. Enumi ezo, emoi ogitambire Omukama aha rw'ekihongo ky'enyatano y'amafu, endijo ogimutambire aha rw'ekihongo ky'okwokibwa aha rw'okwatilira Abalevita.

¹³ Abalevita obateho kuta nibahwera Aroni n'abatabani, obahongere Omukama ekihongo ky'okuchunkeza.”

¹⁴ “Nikwo orayahura otyo Abalevita omu Baisiraeli, mara barabaga bange.

¹⁵ Orwo oramara kubahura otyo, okabeza n'okubahonga ekihongo ky'okuchunkeza, batahe omw'Ihema bakore emilimo.

¹⁶ Aha rw'okuba bahwirwe omu Baisiraeli, babera kimoi bange. Mberonkeire, balya omwanya gwa bakaigura nda, emizigaijo yona y'Abaisiraeli.

¹⁷ Emizigaijo yona omuli Isiraeli eba yange, gwaba muzigaijo gwa muntu anga gw'ekitunganwa. Emizigaijo egyo nkagironka, kwema kiro ekyo naita emizigaijo y'Abamisiri.

¹⁸ Abalevita mbahwire omu Baisiraeli,

¹⁹ nabaha Aroni n'abatabani, kukolera Abaisiraeli omu Ihema ly'Omuterano n'okubatilira, Abaisiraeli abo batalija bakagoba ahatakatifu bakagwerwa ekibundo.”

²⁰ Musa na Aroni n'enteko yona ya Isiraeli bakora batyo Abalevita, nk'okwo Omukama yahangiire Musa kubakora.

²¹ Abalevita bayejuma amafu, bafura n'ebijwaro byabo. Aroni yabahongera Omukama ekihongo ky'okuchunkeza, yabagilira n'enyatano y'okubeza.

²² Ahanyuma bagya omw'Ihema kukora emilimo, bata kuhwera Aroni n'abatabani. Bakakora Abalevita okwo Omukama yahangiire Musa.

²³ Omukama akagambira Musa ati,

²⁴ “Ebi bikwete aha Balevita: Kubandiza aha b'emyaka 25 kutemba, abo babe nibo bata nibakora emilimo omw'Ihema ly'Omuterano.

²⁵ Kwema aha b'emyaka 50 abo eikora balilekere, batagendelera.

²⁶ Bakujuna Abalevita barumuna babo omu myoga yabo omw'Ihema ly'Omuterano, kyonkai ti bonene kuba nibo bakora myoga egyo. Abalevita obe nikwo obaha emyoga etyo.”