Orubara 5 - Ebibulia 2001

Abantu abahagaire

¹ Omukama akagambira Musa ati,

² “Ragira Abaisiraeli bona babinge omu rusisira buli mubembe, na buli omoi araba aina ekilikumurugamu, na buli muntu ahagaire aha rw'okukwata aha mufu.

³ Mubinge omushaija n'omukazi omu rusisira orwo ndikuturamu na inywe bataruhagaza.”

⁴ Abaisiraeli bakora batyo okwo Omukama yagambiire Musa, bababinga omu rusisira.

Okwatira entambara

⁵ Omukama agambira Musa ati,

⁶ “Ogambire Abaisiraeli oti, ‘Orwo omushaija anga omukazi arakoraga obufu bwona bwona, atabaire mwesigwa ahali inye, omuntu ogwo arabaga aina entambara.

⁷ Obufubwe obwo yakora abwechuze mara agire enyatano egobire aha rw'obufu obwo. Enyatano eyo yagira agyongereho ekichweka kyayo ekya katanu akihe owo yaba afakaliire.

⁸ Kyonkai kifakalirwa kayakuba yafire mara atainaho munyaruganda wa kutora nyatano egyo, aho enyatano egyo bagihe Omukama, bagigeleke aha mpaya y'entaama ey'okwatilira omuntu aina omushango, mara etwarwe omukuhani.

⁹ Kandi ebihongo byona, buli kimoi, ebyo Abaisiraeli balikuletera omukuhani, bibe by'omukuhani ogwo.

¹⁰ Ebihongo ebyo buli muntu alikuleta bibe by'omukuhani.’ ”

Abakazi abo baibabo barabubiraga

¹¹ Omukama agambira Musa ati,

¹² “Ogambire Abaisiraeli oti, K'omukazi arahemukaga akagokera iba,

¹³ akasiyana kyonkai mushaijawe atabimanyiire, nawe atamanyikire n'orwo yahagara, n'ow'okumugamba atazokire n'orwo atakwatirwa aha mugogo;

¹⁴ k'omushaija alibubira mukaziwe ogwo ayahagara, anga akamububira atahagaire,

¹⁵ amutwalire omukuhani hamoi n'ekihongo ky'okumwatilira, nk'ekilo emoi eya efa y'eshayiri. Atakisheshaho majuta anga kukitaho bunuma, aha rw'okuba kihongo ky'ensano ekyazarukana omw'ibuba. Ekihongo ekyab'ekyo nikiijukisa entambara ekozirwe mara nikigimanyisa omu bantu.”

¹⁶ “Omukuhani atware omukazi ogwo omu mabona g'Omukama amwemeleze.

¹⁷ Akwate amaizi g'omugisha omu kikwato ky'eibumba, aihye eitaka omu maisho g'ekiikaro, alinage omu maizi ago agashalize.

¹⁸ Omukuhani ayemeleze omukazi ogwo omu mabona g'Omukama, amuzingurure eishoke aha mutwe, amukwase omu mikono ekihongo ky'ensano ekilikwijukisa entambara, nikyo kihongo ky'ensano ekilikuzarukana omw'ibuba. Omukuhani akwate amaizi galikukambarara agaletera abantu omuraamo.

¹⁹ Ahanyuma anahize omukazi ogwo nagamba ati, ‘K'oraba otagenzire na mushaija, otahagaire, mara nomanya okwo oli muk'omushaija, aho amaizi aga agakambaraire agaletera abantu omuraamo ogakireho.

²⁰ Nawe k'oraba ohemukire, mara okwo nomanya okwo oli muk'omushaija, okahagara, okabyama n'omushaija atali wawe,

²¹ aho,’ (Omukuhani agambiire omukazi ayenahire kubi, amugambiire ati) ‘Omukama akurame n'abantu bakuchweho omugani, ofe ebyawe ogumbare.

²² Amaizi aga gatahye omuraamo omu rubunda rwawe, ofe ebyawe ogumbare.’ Omukazi agambe ati, ‘Amina, Amina.’ ”

²³ “Aho omukuhani ahandike emiramo egi omu kitabo, ashube agifuze amaizi galikukambarara,

²⁴ aganyoise omukazi gamushase muno.

²⁵ Amwihye ekihongo ky'ensano omu mikono ekizarukaine omw'ibuba, akichunkeze omu mabona g'Omukama amare akitware alutare.

²⁶ Aha kihongo ky'ensano ayoreho ekikamato akyokeze ahali alutare, ahanyuma ashube anyoise omukazi amaizi.

²⁷ Orwo araba yamunyoisize amaizi ago, k'araba abaire ahagairekwo akagokera iba, amaizi agaletera abantu omuraamo garamutaha omu mubili gamushase muno, afe ebye, agumbare, abe muraamwa omu bantu.

²⁸ Kyonkai k'omukazi araba tahagaire, nayera, aho tabe kantu mara alizara n'abana.

²⁹ Eli nilyo iteka elirahonderwaga orwo omushaija arabubaga, anga, k'omukazi muk'omushaija arahemukaga akahagara.

³⁰ Anga orwo omushaija aragiraga eibuba akabubira mukaziwe. Omukazi bamwemeleze omu maisho ga alutare, omukuhani akore emichonchozo egi yona.

³¹ Omushaija talikwatwa mushango, kyonkai omukazi omushango nigumukwata k'araba afakairekwo.”