Orubara 4 - Ebibulia 2001

Emyoga y'Abalevita Abakohati

¹ Omukama akagambira Musa na Aroni ati,

² “Omu Balevita mubaremu Abakohati, kuhonderana n'amahiga gabo n'ebika byabo.

³ Mweme aha b'emyaka makumi gashatu kutembera kimoi kugoba aha myaka makumi gatanu, abakushobora kukwata emyoga, bakakora emilimo omw'Ihema ly'Omuterano.

⁴ Okumanya ebintu ebitakatifu muno omw'Ihema ly'Omuterano, gube mwoga gw'Abakohati.

⁵ Abasisiire kabaraijaga kusimbura, Aroni n'abatabani batahe omw'Ihema ly'Omuterano, bahananture orutimbe aha rusika, barushwekese Esanduku ly'Endagano.

⁶ Ahanyuma bagishwekese empu z'embuzi ezishoneraine, aho babe nirwo baraho omwendo gwa kibururu, bashokemu n'emigamba yayo.

⁷ Aha meza y'Omukate gw'Obusinge bareho omwendo gwa kibururu, bateho n'esahani, n'esahani ezihango ez'obunuma, epakuli, n'enyabya z'ebihongo by'okunywa. Haikarweho n'omukate.

⁸ Bashube ebyo babibunze omwendo ogulikutukura, bongereho n'empu z'embuzi ezishoneraine, bagishokemu n'emigamba yayo.

⁹ Bakwate omwendo gwa kibururu bagushwekese ekinara ky'etara n'etara zakyo, makasi zakyo, eterei, n'ebikwato byakyo byona ebyo bafukamu amajuta g'okuhemba.

¹⁰ Ekinara ekyo hamoi n'ebikwato byakyo byona babishembe omu mpu z'embuzi ezishoneraine, bakikome aha migamba y'okukitwaza.

¹¹ Altare y'ezahabu bagishwekese omwendo gwa kibururu, bongereho empu z'embuzi ezishoneraine, bagishokemu n'emigamba yayo.

¹² Bakwate ebikwato byona ebikozibwa ahatakatifu, babite omu mwendo gwa kibururu, babishwekese empu z'embuzi ezishoneraine, babikome aha migamba yabyo ey'okubitwaza.

¹³ Altare bagyeye eijwi, bagishwekeho omwendo gwa zambarau.

¹⁴ Bagiteho ebikwato byayo byona ebikozibwa honene: Eby'okuyoza omuliro, euma, ebitihyo, ebeseni, n'ebikwato byayo ebindi byona. Bagishwekeho empu z'embuzi ezishoneraine, bamare bagishokemu emigamba yayo.

¹⁵ Orwo Aroni n'abatabani baramaraga kushweka ahatakatifu n'ebyamwo byona, abasisiire kabaraijaga kwimukya, aho Abakohati baije babitware. Kyonkai ebintu ebitakatifu batalibaikwataho bakafa. Ebi nibyo bintu by'Eihema ly'Omuterano ebyo Abakohati baratwaraga.”

¹⁶ “Eleazari mutabani wa Aroni omukuhani aralebeleraga amajuta g'okuhemba, obunuma obulikunukage n'ensano elikuhongwa buli kiro, n'amajuta g'okusiiga. Alebelere n'Eihema lyona n'ebyamwo byona, amanye ahatakatifu n'ebikwato byamwo.”

¹⁷ Omukama agambira Musa na Aroni ati,

¹⁸ “Oruganda rw'Abakohati bataliruchwa mu Balevita.

¹⁹ Mubatwaze kurungi, barore, batalifa aha rw'enshonga y'okugoba aha bintu ebitakatifu muno. Aroni n'abatabani batahe omw'Ihema, bahe buli muntu omulimogwe n'omugugu ogwo aratwara.

²⁰ Kyonkai aba abalikuhabwa emilimo, Eihema batalitahamu bataija bakabona ebitakatifu muno bakafa.”

Emyoga y'Abagerishoni

²¹ Omukama agambira Musa ati,

²² “Abagerishoni nabo obabare, kuhonderana n'amahiga gabo n'ebika byabo.

²³ Obare kwema aha b'emyaka makumi gashatu kuhika emyaka makumi gatanu: Abalikushobora kukora emilimo bona omw'Ihema ly'Omuterano.

²⁴ Abagerishoni eikora lyabo kutwara emigugu.

²⁵ Batware entimbe z'ekiikaro, Eihema ly'Omuterano n'eby'okulishwekesa, n'empu z'embuzi ezishoneraine ezilibunzire. Batware n'ekisika ky'omulyango gw'Eihema ly'Omuterano,

²⁶ entimbe za nyakabuga, n'ekisika ky'omulyango gwa nyakabuga ezingoire ekiikaro na alutare n'emiguha yabyo, n'ebikozo byona by'emilimo. Ebili by'okukorwa bonene babikore byona.

²⁷ Aroni n'abatabani nibo balikuha Abagerishoni emilimo: Ebyo baragiirwe kutwara n'ebyo balikuragirwa kukora. Ebyo barataga kutwara obibakwase gube mwoga gwabo.

²⁸ Eli nilyo ikora ly'Abagerishoni omw'Ihema ly'Omuterano. Omw'ikora lyabo Itamari mutabani wa Aroni omukuhani abe niwe abalebelera.”

Emyoga y'Abalevita ba Merari

²⁹ “Abamerari nabo obabare kuhonderana n'amahiga gabo n'ebika byabo.

³⁰ Obare kwema ab'emyaka 30 kugoba aha myaka buli omoi alikushobora kukora emilimo omw'Ihema ly'Omuterano.

³¹ Eikora lyabo lyona hamoi omw'Ihema ly'Omuterano ni kushutura ebintu: Efuremu z'ekiikaro n'emihingo yakyo, enyomyo n'amaguru gazo,

³² n'enyomyo za nyakabuga obuzingora n'amaguru gazo, enkondo, emiguha n'ebyabyo byona ebilikubigendaho. Buli omoi na ibara omukwase ebintu ebyo aratwara.

³³ Eli lyona ikora ly'Abamerari omw'Ihema ly'Omuterano. Itamari mutabani wa Aroni omukuhani niwe mulebelezi wabo aha ikora elyo.”

Abalevita nibabarwa

³⁴ Musa na Aroni n'abebembezi b'enteko babara Abakohati kuhonderana n'amahiga gabo n'ebika byabo.

³⁵ Bakema aha baina emyaka 30 kuhika emyaka 50. Buli omoi ayabaire nashobora kukora emilimo omw'Ihema ly'Omuterano bakamubara.

³⁶ Orubara rwabo omu mahiga gabo bakagoba abantu 2,750.

³⁷ Orwo nirwo rubara rw'Abakohati bona abakoraga omw'Ihema ly'Omuterano, abo Musa na Aroni babazire nk'okwo Omukama yahangiire Musa.

³⁸ Orubara rw'Abagerishoni omu mahiga gabo n'omu bika byabo,

³⁹ kwema aha b'emyaka makumi gashatu kuhika emyaka makumi gatanu, buli omoi ayabaire nashobora kukora emilimo omu Ihema ly'Omuterano,

⁴⁰ orubara rwabo omu mahiga gabo n'omu bika byabo bakagoba abantu 2,630.

⁴¹ Oru nirwo rubara rw'Abagerishoni omu mahiga agabo, bona abakoraga omw'Ihema ly'Omuterano, abo Musa na Aroni babazire nk'okwo Omukama yahangiire.

⁴² Orubara rw'Abamerari omu mahiga gabo n'omu bika byabo,

⁴³ kwema aha b'emyaka 30 makumi gashatu kugoba aha b'emyaka 50 buli omoi ayabaire nashobora kukora emilimo omw'Ihema ly'Omuterano,

⁴⁴ orubara rwabo omu mahiga gabo bakaba bali bantu 3,200.

⁴⁵ Aba nibo balinya ababazirwe omu ruganda rw'Abamerari. Nibo Musa na Aroni babazire nk'okwo Omukama yahangiire Musa.

⁴⁶ Abalevita bona abo Musa na Aroni n'abebembezi ba Isiraeli omu mahiga gabo n'omu bika byabo,

⁴⁷ kuruga aha b'emyaka 30 kugoba aha b'emyaka 50, buli omoi ayabaire nashobora kukora emilimo omw'Ihema ly'Omuterano n'okutwara emigugu,

⁴⁸ bakaba bali bantu 8,580.

⁴⁹ Musa hakabara Abalevita, kandi buli omoi yamuha omwoga gw'okuheleza anga kugira ekyo arata kutwara, nk'okwo Omukama yabaire amuhangiire.