Orubara 2 - Ebibulia 2001

Emikaliire y'enganda omu rusisira

¹ Omukama akagambira Musa na Aroni ati,

² “Abaisiraeli bona basisiire mbali ebendera zabo zili, mara buli omoi abe aina akabonero k'orugandarwe. Hona mbali baraba bali basisiire balebire Eihema ly'Omuterano.

³ Ab'okusisira rubaju orw'oburugaizoba, balebire mbali eizoba lishabukira, ni balinya abaina ebendera y'orusisira rw'oruganda rwa Yuda, nk'okwo emitwe yabo eli. Mukuru w'oruganda ni Nashoni eya Aminadabu.

⁴ Eihelye okwo libazirwe lina abantu 74,600.

⁵ Ab'oruganda rwa Yuda batanwe ab'oruganda rwa Isakari. Mukuru wabo ni Netaneli eya Zuari.

⁶ Eihelye okwo libazirwe lina abantu 54,400.

⁷ Ab'oruganda rwa Zabuloni bahondereho. Mukuru wabo ni Eliabu eya Heloni.

⁸ Eihelye okwo libazirwe lina abantu 57,400.

⁹ Orubara rwona rw'abali omu rusisira rw'oruganda rwa Yuda, nk'okwo emitwe yabo eli, bantu 186,400. Omu kwimukya bate nibo baba nibebembera.”

¹⁰ “Rubaju orwa kasi hagyeyo ebendera y'orusisira rw'oruganda rwa Rubeni okwo emitwe yabo eli. Mukuru w'oruganda ni Elizuri eya Shedeuri.

¹¹ Eihelye okwo libazirwe bantu 46,500.

¹² Abarasisira bataine ab'oruganda rwa Rubeni b'oruganda rwa Simeoni. Omukuru wabo w'oruganda abe Sherumieli eya Zurishadai.

¹³ Eihelye okwo libazirwe bantu 59,300.

¹⁴ Aho ahonderweho oruganda rwa Gadi. Omukuru w'oruganda abe Eliasafu eya Reweli.

¹⁵ Eihelye okwo libazirwe bantu 45,650.

¹⁶ Orubara rwona rw'orusisira rwa Rubeni, okwo emitwe yabo eli, bantu 151,450. Aba nibo baraimukyaga bali ba kabili.”

¹⁷ “Aho Eihema ly'Omuterano libandure, kandi orusisira rw'Abalevita rwimukye nk'ensisira ezindi. Okwo balikusisira babe nikwo baimukya, buli rusisira omu mwanya gwarwo, nk'okwo ebendera zilikuhonderangana.”

¹⁸ “Ab'oruganda rwa Efuraimu basisiire rubaju orw'obugwaizoba, nk'okwo emitwe yabo eli. Elishama eya Amihudi abe mukuru wabo w'oruganda.

¹⁹ Eihelye okwo libazirwe lina abantu 45,500.

²⁰ Oruganda rwa Efuraimu ruhonderweho orwa Manase, mukuru w'oruganda ali Gamalieli eya Pedazuri.

²¹ Eihelye okwo libazirwe lina abantu 32,200.

²² Ahanyuma oruganda rwa Benjamini ruhondereho, omukuru warwo ali Abidani eya Gideoni.

²³ Eihelye okwo libazirwe lina abantu 35,400.

²⁴ Orubara rwona rw'ab'oruganda rwa Efuraimu abasisiire, okwo emitwe yabo eli, nibagoba abantu 108,100. Baraimukyaga bali ba kashatu.”

²⁵ “Rubaju orwa bikara hagyeyo ebendera y'orusisira rw'ab'oruganda rwa Dani nk'okwo emitwe yabo eli. Omukuru w'oruganda abe Ahiezeri eya Amishadai.

²⁶ Eihelye okwo libazirwe lina abantu 62,700.

²⁷ Abarasisira bataine Ahiezeri b'oruganda rwa Asheri. Omukuru w'oruganda abe Pagieli eya Okarani.

²⁸ Eihelye okwo libazirwe lina abantu 41,500.

²⁹ Ahanyuma ahondwereho ab'oruganda rwa Nafutali, mukuru w'oruganda ali Ahira eya Enani.

³⁰ Eihelye okwo libazirwe lina abantu 53,400.

³¹ Orubara rwona rw'abali omu rusisira rw'oruganda rwa Dani bantu 157,600. Baraimukyaga bali b'enzindo, omu mihonderanganire y'ebendera.”

³² Aba nibo Baisiraeli nk'okwo babazirwe kuhonderana n'enganda zabo. Bona ababazirwe omu nsisira nk'okwo emitwe yabo yabaire eli, bakaba bali bantu 603,550.

³³ Kyonkai Abalevita tibabalirainwe na Baisiraeli bandi, nk'okwo Omukama yahangiire Musa.

³⁴ Abaisiraeli nikwo bakozire batyo. Ebyo Omukama yahangiire Musa bakabikwata byona, basisiraga kuhonderana n'ebendera zabo; baimukyaga, buli omoi omu rugandarwe, omw'ihigalye.