Orubara 10 - Ebibulia 2001

Amakondere g'efeza

¹ Omukama akagambira Musa ati,

² “Oheshe amakondere gabili g'efeza. Orata kugatera kuhuruza enteko, n'okubamanyisa kukambura orusisira bakagenda.

³ Orwo gombili garaterwa, Abaisiraeli bahurure bakugobe aha kishasi ky'Eihema ly'Omuterano.

⁴ Kyonkai orwo lyaterwa eikondere limoi ely'okutatira, aho abebembezi, abakuru b'enganda za Isiraeli babe nibo bahurura bakakugoba.

⁵ Orwo oratera eikondere ly'okutatira, ensisira ezili obugwaizoba zibandure.

⁶ Orwo oratera eikondere ly'okutatira omurundi gwa kabili, ensisira ezili kasi zibandure. Eikondere ly'okutatira literwe kubamanyisa kababandura.

⁷ Orwo eihanga lili ly'okuhurura, eikondere literwe kyonkai litaterwa ikondere lya okutatira.

⁸ Abakuhani batabani ba Aroni batere amakondere ago kibe kiragoro ky'ebiro byona ahali inywe, amakiro gona kutera amakondere.

⁹ Kamulirwana endashana omu nsi yanyu, kutera omubisha alikubema kubi, mutere enzamba kutatira abantu. Aho inye Omukama Ruhanga wanyu ndibajuna, mbakize aha babisha banyu.

¹⁰ Kwakwo n'omu mashemelerwa: Aha biro bikuru byanyu ebiragiirwe n'aha kwema kw'okwezi, mutere amakondere orwo mulikutamba ebihongo by'okwokibwa n'ebihongo by'emilembe. Ebyo bilinsindika kubajuna. Inye ndi Mukama Ruhanga wanyu.”

Abaisiraeli nibakambura orusisira

¹¹ Aha kiro kya makumi gabili omu mwezi gwa kabili, guli mwaka gwa kabili Abaisiraeli barugire Misiri, ekichwi kiimuka aha kiikaro ekyo Omukama yabaire asingiiremu.

¹² Aho Abaisiraeli babanza kuruga mpora mpora omw'Irungu lya Sinai. Ekichwi kyemelera omw'Irungu lya Parani.

¹³ Elyo limukya lyabo lya mbere orwo Omukama yahangiire atyo Musa.

¹⁴ Ebendera y'orusisira rw'oruganda rwa Yuda niyo yaimukize mbere nk'okwo emitwe yabo yabaire eli. Eihe lyabo likaba nilikulirwa Nashoni eya Aminadabu.

¹⁵ Eihe ly'oruganda rwa Isakari likaba nilikulirwa Netaneli eya Zuari.

¹⁶ Eihe ly'oruganda rwa Zabuloni likaba nilikulirwa Eliabu eya Heloni.

¹⁷ Orwo bamazire kusimbura ekiikaro, Abagerishoni n'Abamerari abakyetwekaga baimukya orugendo.

¹⁸ Aho ahonderwaho ebendera y'oruganda rwa Rubeni. Bakasimbura kuhonderana n'emitwe yabo. Eihe lyabo likaba nilikulirwa Elizuri eya Shedeuri.

¹⁹ Kandi eihe ly'oruganda rwa Simeoni likaba nilikulirwa Shelumieli eya Zurishadai.

²⁰ Eihe ely'oruganda rwa Gadi likaba nilikulirwa Eliasafu eya Deweli.

²¹ Aho nirwo Abakohati bahondeireho, bashutwire ebintu ebitakatifu. Batakagobire, ekiikaro kikaba kyasimbirwe.

²² Ebendera y'eihe ly'oruganda rwa Efuraimu eimukya kuhonderana n'emitwe yabo. Ayabaire nakulira eihe elyo ni Elishama eya Amihudi.

²³ Eihe ly'oruganda rwa Manase likaba nilikulirwa Gamalieli eya Pedazuri.

²⁴ Eihe ly'oruganda rwa Benjamini likaba nilikulirwa Abidani eya Gideoni.

²⁵ Ahanyuma ahonderwaho eihe ly'oruganda rwa Dani. Eihe eli nilyo lyagendaga enyuma y'amahe agandi gona niligalinda. Likaba nilikulirwa Ahiezeri eya Amishadai.

²⁶ Eihe ly'oruganda rwa Asheri likaba nilikulirwa Pagieli eya Okarani.

²⁷ Eihe ely'oruganda rwa Nafutali likaba nilikulirwa Ahira eya Enani.

²⁸ Orwo Abaisiraeli baimukyaga kugenda, emigendere yabo ekaba nebaho kuhonderana n'amahe gabo.

Musa nashaba ishezara kugenda nabo

²⁹ Musa agambira ishezara, Hobabu eya Reweli Omumidiani ati, “Nitwimukya kugenda omu nsi eyo Omukama yagambiire ati, ‘Ndigibaha.’ Mbwenu oije tugende hamoi; turakukolerage. Omukama akaraganisa Isiraeli ebirungi.”

³⁰ Kyonkai Hobabu ashubamu Musa ati, “Chei, inye tindikwija kugyayo okwo. Ndagaruka owaitu omu banyaruganda bange.”

³¹ Musa amugira ati, “Ninkutagiliza otatusigaho. Nomanya okwo tulikwija kugenda nitusisira omw'irungu; mbwenu iwe twakugenzire notulebelera.

³² Katuragenda hamoi naiwe, kyona kyona ekyo Omukama aratukolera, kyonene kyonene ekyo nikyo na ichwe turakolera iwe.”

³³ Kityo Abaisiraeli baruga Sinai, bagenda orugendo rw'ebiro bishatu, bebembeirwe Esanduku y'Omukama y'Endagano, nibahiga ensi y'okuturamu.

³⁴ Buli orwo bafururaga orusisira bwamushana bayebemberwaga ekichwi.

³⁵ Buli orwo Esanduku yaturukaga kugenda, Musa yagambaga ati, “Waitu Mukama osingire, imuka, ababisha behigire bugyo; abakunoba bairuke.”

³⁶ Orwo Esanduku yagyaga ahansi, agamba ati, “Waitu Mukama osingire, garukira embaga yawe enkuyanja ya Isiraeli.”