Mwegesa 6 - Ebibulia 2001

¹ Omu nsi omu ndaboinemu eihano elindi elibi, mara lishasa muno abantu.

² Ruhanga aha omuntu eitunga, ebintu n'ekitinwa, ebyo ayegomba byona taliho ky'aburwa. Kyonkai Ruhanga wenene tamuha bushobora bwa kubishemelerwa. Atali mukama wabyo aba niwe abishemelerwa. Ekyo bushai mara naku ezibi.

³ K'omuntu yakuzara abaana kikumi, mara akarora nyingi, n'orwo yakurama atai, k'atashoboire kushemelerwa itungalye mara atazikiirwe mu kitinwa, nimbona nti nakirwa ayarugiremu ali nda.

⁴ Omwana ayarugiremu ali nda okuzarwakwe tikumugasira kantu, ashusha ayagya omu mwilima mara ayebeka.

⁵ Tabona mushana, kandi tagira ky'amanya. Nawe kandi abona emilembe kushaga.

⁶ Omuntu tagasirwa burora n'orwo yakurora emyaka 2,000. Isi bombili tibagya mwanya gumoi?

⁷ Byona ebyo omuntu akora akolera orubunda, kyonkai aikara ayenzire kulya.

⁸ Isi ni magobaki ag'omumanyi akiza omufera? Isi omunaku alikumanya okwo ararora omu bantu abona magobaki?

⁹ Hakili ebyo amaisho gabona kukira okugira engomba y'eki na kili. Ekyo nakyo bushai, kusa amani.

¹⁰ Ebirabaireho byona biketwa amabara, n'omuntu okwo ali namanyika, n'okwo atakuhankana n'alikumukiza mani ekyo nikimanyika.

¹¹ Ebigambo okukanya nikwo n'enshonga kukeya. Isi aho omuntu ebigambo bingi bimugashaki?

¹² N'ohai alikumanya ekili kirungi aha muntu omu burorabwe obugufi obutaina nshonga, oburora obuhingura nk'ekinyumanyumi? N'ohai ayakumugambira ebilibaho omu nsi orwo wenene aliba yafire?